close
| 圍燒張震遠 射人先射馬 |
CY頭號謀臣張震遠做主席嘅商品交易所因資金耗盡，要放棄個自動交易牌，如果搵唔到一億美金資金，可能要「自然死亡」！本來生意失敗係平常事，時也命也啫，但因佢同CY關係密切，政圈中「對頭人」趁機點火，射人先射馬，先燒張震遠，睇嚟最後會攻向CY。
商交所單嘢出街後，疑似唐營人馬嘅立法會證券業議員張華峰，以及泛民大佬何俊仁，都即刻高調發炮，質疑證監會寬待張震遠，認為應即時停商交所牌，並委任會計師徹查盤數，證監會冇咁做有特殊對待之嫌。
張震遠是CY頭號謀臣，「對頭人」趁商交所出事，瞬即點起火頭，先燒張震遠，目標係燒埋CY。
張華峰舊年以些微票數擊敗「梁營」人馬李君豪，代表證券界入局，之後加入「唐粉」為主嘅經民聯，近期佢對CY頻頻開火，話佢冇改善經紀經營環境，又砌限奶令唔妥，所以今次率先出手，政圈人士唔覺得奇怪。
至於仁哥出聲，原因更簡單，泛民一直搵機會挫CY威信，呢次CY頭馬失蹄，泛民自然食住上，提出將事件交去立法會委員會討論，如果挑出更多問題，就繼續追殺落去。
政圈老友指，CY嘅「對頭人」一定趁佢病攞佢命，點起火頭，如果燒得起，就將火勢擴大，追查張震遠有冇特殊關係，然後燒CY；就算燒唔起，亦可挫低張震遠聲譽，令佢以後再難在權力核心更上層樓，等於綁住CY隻右手，對CY一樣有殺傷力。所以商交所單嘢一定有下文！
全站熱搜
留言列表
