土匪雞翼刀削麵$30雞翼以指天椒、孜然粉醃製過，表面仲加咗炸蒜，辣口好惹味！ 

潮𡃁便當

頭頭碰着麵

香港人近年被拉麵迫瘋了，新店開個不停，排個不停，但停一停睇一睇，全港仲有好多新麵店默默耕耘，至新嘅煲仔麵、全蛋麵，傳統一點越南麵、懷舊車仔麵，去到邊都俾麵纏身！

大角咀驚喜　$20煲仔麵

煲仔飯就食得多，大角咀一間新開的鶯記，就化身成煲仔麵。老闆李先生，本身從事製鞋業，喜歡研究煮食，加上經常在內地工作，被雲南麵條湯底吸引，稍加心思設計成煲仔麵。麵是台灣來貨刀削麵，經千挑萬選，最後選一隻浸得耐仍能保持嚼勁的，唔會愈食愈變糊塗。湯底方面以豬骨、雞、印尼南薑、洋蔥、大蒜、京蔥等材料共冶一爐，上菜時伴些少雪菜鹹鹹香香，好開胃。而下午茶賣大包，$20一煲，抗通脹之選。

香醋話梅骨刀削麵$30豬軟骨以鎮江陳醋、浙醋、紅曲米、花雕等醃製，其間加入話梅，入口軟腍，酸酸甜甜，成日唔開胃嘅女生都食慾大增。 

吉列龍蝦球$20龍蝦球口感好似個彈彈波咁，炸得亦唔油膩，好難抗拒。 

川椒皮蛋$20皮蛋看似普通，但配以自家調配的麻辣汁，略帶麻味不持久，唔想認真過口癮就啱！

食客 Richard& Sarah教育及大專生

第一次嚟呢度，叫咗雞翼同麵，麵好彈牙，湯底唔鹹。

麵款選擇★★★
（除了刀削麵，店內亦有越南河粉及檬粉提供。）
味道選擇★★★
（午市及下午茶有 6款口味，晚市 5款。）
座位情況★★
（ 14個坐位，以 2人座為多。）

鶯記砂鍋麵

地址：大角咀鐵樹街 16號富多來商場 1期地下 10號鋪
電話： 6570 7815
營業時間： 12nn-11:30pm

懷舊 style　新食辣螺車仔麵

長沙灣順寧街有一間裝修到好似 50、 60年代街頭風的嗱喳麵（即車仔麵）店開業，取名「嗱喳街」。車仔麵有雞湯同魚湯底，同樣$28，前者以鮮雞絲先蒸後煎，上枱時附以手撕雞一堆，有效增強鮮味，後者將鯪魚肉切片煎香，放湯慢火熬煮 2小時，上枱時連鯪魚片齊上。車仔餸加$6-10不等，最特別是辣酒螺，用上咖喱、沙嗲、潮州辣椒油、麻辣醬煮成，最後加玫瑰露，食落麻香四溢，混湯吃絕配！

辣酒螺$8/5粒以咖喱、沙嗲醬、潮州辣椒油等材料煮成，最後加入玫瑰露，食落麻香味好突出，配埋爽口螺肉，食到唔停口，熱烈推介將辣汁加埋入麵內，勁好味呀！ 

蘿蔔豬肺雞湯銀針粉$40好少車仔店可以食到銀針粉，滑不溜口，香濃的雞湯底配爽滑豬肺同甜爆汁蘿蔔，正。 

辣油 3寶雞翼尖魚湯油麵$44三寶即魚蛋、豬皮及豬紅，辣味不濃，唔食得又心思思嘅朋友可以一試，雞翼尖則重咖哩味，好惹味。

Menu特意設計成報紙啟示咁，睇勻晒都要一段時間。 

老闆馮先生，人人都叫佢肥仔，訪問當日佢忙於同細仔玩，好一名慈父。 

食客 Caius& Natalie大專生

我哋第一次嚟，見佢環境同旺角某 coffee shop好似，叫咗辣酒三寶，好好味，係貴左少少。

麵款選擇★★★★
（典型油麵之外，仲有河粉、烏冬、銀針粉等 11種）
味道選擇★★★★
（加得愈多餸，味道愈多）
座位情況★★★
（ 20-30個座位，全是向牆或圓枱）

嗱喳街

地址：長沙灣順寧道 65號地下
電話： 2816 2088
營業時間： 12nn-12mn

兄弟幫打造　 cafe feel蛋麵店

曾在北角和富道的壹碗麵， 5月 3日轉戰鰂魚涌，裝修成 cafe格局，廣告出身的 Michael，聯同主廚的弟弟及兩位 partners，兄弟幫上陣繼續主打蛋麵，麵請工場師傅製造，鴨蛋雞蛋九一比，有粗幼麵兩款，前者寬約 1.5cm，乃熟麵，後者寬約 0.2mm，有個可愛名字「 QQ」麵，乃生麵，保存期較短。由於麵身特製，烹調時間亦增長，約為 6-7分鐘不等。試咗店內一款酒糟燘豬腩肉粗麵，酒糟乃 Michael母親浸製 3個月而成，再放入豬腩肉內隔水燉成，肉身肥瘦相間。

酒糟燘豬腩肉粗麵$52粗麵條條有分量，豬腩肉肥瘦層次分明，若然甜味酒味更濃郁更佳。 

溏心酒浸蛋$15感覺似食花雕雞蛋，蛋汁一咬爆出，混埋香濃酒汁一齊在喉頭留香。

柚子燘豬軟骨 QQ麵$48豬軟骨富嚼勁，酸中帶 Q，麵如其名頗 Q。 

麻香豬耳絲$12豬耳爽口彈牙， size細細條又唔辣，快快口食晒！ 

麵款選擇★★
（主要是粗麵及 QQ麵）
味道選擇★★★★
（有鴕鳥肉、鹹香雞等共 11款不同口味）
座位情況★★★
（全店約 25座，三分一座位向牆、三分一座位沙發座、三分一木凳）

壹碗麵

地址：鰂魚涌濱海街 48號地下
電話： 3482 9981
營業時間：星期一至六： 12nn-9pm（逢星期日休息）

Bar枱潮食　爽彈越南粉麵

越南餐廳畀大家印象可能都是土土氣氣，不過位於上環的 noodlemi，就以木製 bar枱及椅子玩新潮設計，兩旁有兩個大窗連座位，客人可向街而坐，寫意到暈。坐低見店員遲遲唔斟水，原來附上有自助水樽，亦有辣醬及酸魚露，上菜時客人可因應口味加鹽加醋，以酸魚露配粉最絕配，酸酸甜甜為主，辣度不強，不會喧賓奪主。越南粉麵入口爽彈，附以條條蘿蔔絲及青瓜，咬落「索索」聲口感十足，再加埋九層塔、羅勒、芫荽等香葉，奇味濃郁，仲未瞓醒嘅肚子都嘈之巴閉，咕咕亂叫。

螃蟹湯番茄檬粉$68螃蟹做湯底非常鮮味，令人一飲上癮，飲真啲更有番茄酸酸甜甜落晒去，感覺好健康！ 

葱油豬頸肉撈檬粉$58粉麵爽彈，豬頸肉腍軟非常，上有大量香葉及炒蒜粒，好惹味。 

越式牛肉米紙卷$50米紙煙韌，牛肉腍軟，青瓜蘿蔔絲爽口，再有乾蒜調味，層次豐富。 

午市時人多到排出店外。 

麵款選擇★★
（主要是撈檬及湯檬，亦有河粉）
味道選擇★★★
（可選烤雞、牛腩、豬頸肉、咖哩及素菜）
座位情況★★★
（全店 24座，雙人座為多，兩邊合共 4個座位面向窗）

Noodlemi

地址：上環文咸東街 2號地下
電話： 2253 1113
營業時間：星期一至六： 11:30am-10pm（逢星期日休息）

撰文：梁智欣
攝影：吳偉業、黃家活