黄嘉欣黃嘉欣今年第二度奪得「包山后」寶座，原來她曾因家境問題想過放棄再搶包山，更連續兩年輸給「蜘蛛女」鄭麗莎，幸得到爸媽支持終於再稱后。
搜尋氣
新包山女王 「攀石幫阿媽圓夢」
太平清醮搶包山，上週六（ 18日）凌晨在風雨下完成， 26歲黃嘉欣擊敗兩連冠「蜘蛛女」鄭麗莎，成為新鮮出爐包山后。
其實黃嘉欣在 10年首屆男女分組賽已奪過此寶座，當年她大專未畢業，媽媽要在酒樓整點心經常燙傷手，她曾諗過早日打工，放棄再搶包山。今時今日，黃嘉欣已成為中學導師兼攀石教練，沒放棄搶包山，原來是為媽媽完成一個夢。
搶包山當晚，黃嘉欣努力爬上塔頂搶奪高分的平安包，快過唔少同時比賽的男參賽者。
一直有玩開攀石，朋友參加搶包山我又玩埋一份。家境唔好，住喺天水圍公屋， 3年前攞獎嗰陣爸爸做保安，媽媽喺酒樓整點心，成日燙傷手又試過跌傷送院，好心酸！諗住快啲畢業搵份工就算，等佢哋早啲退休啦。
後來媽咪病痛多咗，腰骨神經傷咗返唔到工，但好彩上次攞完獎後，我好快就搵到份唔錯嘅工，養到屋企又可以繼續玩攀石，𠵱家做緊中學輔導導師，兼職喺協康會教自閉人士攀石。
其實我細個已經好百厭，跳來跳去四圍爬，大個咗去學攀石，初初唔敢話畀佢哋知，後來佢知道咗，媽媽真係好反對，因為太危險嘛！所以我同朋友去到外國攀石都會影相畀佢睇。記得有次去希臘，影咗啲背景好壯闊嘅相，佢睇到至發現呢種運動原來係咁開闊眼界，佢好感動，之後冇再反對我攀石，𠵱家仲好支持我添。
媽咪成長嗰個年代好保守，冇機會亦冇能力去拓闊自己，似乎我攀石係幫佢完成心願，我攞獎佢係最開心㗎！呢幾年佢都有親身嚟睇我搶包山，我哋已經視作為一次家庭活動，我亦冇諗住放棄搶包山喇！
女仔玩搶包山係好辛苦，尤其是指力不足同埋手指太短啦，我比賽前每星期會練習 3晚，又集中練多啲手指力，好在有男友陪住練，佢都係玩攀石㗎！
黃嘉欣 17歲起接觸攀登運動，考到一級證書後不足兩年就考得二級證書，成為攀山教練和香港運動攀登集訓隊隊員。《蘋果日報》圖片 
小時與父母關係不太好，但自從媽媽體弱多病仍要捱苦打工之後，黃嘉欣發覺應多關心父母健康。 
撰文：何志衡
攝影：鄭明川
留言列表
