SKY　 23歲　理工大學會計系 Yr.2Sky現為紅酒公司的公關部經理，常要到酒吧傾談籌備活動事宜。 

U撈

做紅酒公關　理大仔用勞力換入股

不少人愛飲紅酒，連大專生也不例外，但紅酒關聯到兼職，未必有大專生想過。現修讀理工大學會計系的 Sky，機緣巧合下加入了紅酒公司做公關部經理，負責籌辦活動，除了學懂紅酒知識，擴大社交圈子外，更有機會得到公司股權。 Sky自言這份兼職令他得到不少見識，學以致用。

「我哋呢隻 Prive，年份耐啲，比較甜、口感都幾 smooth，配牛肉都唔錯，可以中和肉嘅少少酸味……飲紅酒唔單只用味蕾，嗅覺都需要，可以喺飲前聞一聞，可以更加全面品嘗到酒嘅味道……」採訪當日， Sky正在蘭桂坊與酒吧老闆介紹自家出品紅酒，並商談將會合辦的活動詳情。
現就讀理工大學會計系的 Sky，今年 1月開始於 Velvety紅酒公司擔任公關部經理，「我主要負責活動統籌工作，同酒吧、 speed dating公司等合作搞活動，好似贊助紅酒畀 speed dating嘅聚會，畀多啲人認識我哋嘅紅酒品牌。我𠵱家對紅酒嘅知識只係皮毛，所以主力搞推廣活動，批發由 partner負責，等我熟習多啲，先決定做其他範疇嘅嘢。」
得到這兼職，可算是 Sky無心插柳，「上年年底去酒吧玩，有朋友介紹咗𠵱家嘅 partner Peter畀我認識，第一次見面都係傾吓偈，講吓自己人生同價值觀，佢可能覺得我啱傾，之後都約我出嚟玩咗幾次，咁啱我有次提起有興趣搞活動，佢就邀請我加入公司做合夥人，嗰陣先知佢喺美國有酒莊同公司，想喺香港發展，我唔使畀現錢入股，不過我要幫公司搞 event宣傳，同搵酒吧及餐廳老闆傾合作事宜，批貨畀佢哋，成功提升紅酒嘅銷售量，賺到嘅錢就當我入股。」

外向性格適合工作

平時 Sky都會與朋友去酒吧玩，結識不少外國人，造就他一口流利的英語。 

工作需要對外，正好符合 Sky的外向性格，「我好鍾意識朋友，𠵱家做嘅嘢對人多，覺得好啱我發揮。每次活動我都會盡量在場，而飲紅酒嘅人多數係搵到錢同專業人士，同我平時接觸開嘅圈子好唔同，要同佢哋傾到偈，最重要有自信，而呢樣嘢要慢慢建立番嚟，最少對自己公司嘅紅酒要熟，多作事前準備。」
現在每星期 Sky至少要籌辦兩項活動，對於 2、 3百人的活動可算是駕輕就熟，但初入行時吃過不少苦頭，「平時都有去蘭桂坊玩，識落啲酒吧老闆，最初自己對個品牌唔夠熟， sell酒又冇咩信心，酒吧老闆未必信我，我哋包場搞 event使成十五、六萬，比其他品牌貴 8至 10萬，不過啲酒吧老闆見宣傳成效唔錯，公司慢慢同佢哋熟絡，𠵱家包場可以攞到靚價。」
為了增值自己， Sky已準備去考取品酒師資格，「坊間有認可機構舉辦證書考試，打算今年暑假去考，希望對呢方面有更多認識，而且多張證書，人哋都覺得你有料啲。」

緊密日程更有規律

工作和學業令 Sky的日程安排得十分緊密，反令他生活更加規律，「我算係活躍分子，係籃球校隊成員，平時會行山、游水等，不過𠵱家要兼顧工作同學業，都冇時間玩。自從有咗份工後，𠵱家會安排定下一個月嘅時間表，分配好做嘢同學習嘅時間，可以話比之前更加規律。」
現時 Sky月薪約$10,000，並有機會得到公司股權，記者問 Sky會否怕受騙，最後得不到任何股權，「我覺得讀書學到嘅唔單只係一條條 formula，最緊要係邏輯思考，令處理活動同分配人手上更加有條理，我可以應用喺工作上。公司將會喺內地開分公司發展，到時會畀啲股權我，雖然𠵱家未有股份落袋，但我都冇諗太多，真係有就當 bonus囉，反正想趁後生最重要係拎咗經驗。」

為了事業， Sky百忙會抽空溫習品酒知識，希望考到有關證書，增加的競爭力。 

Sky喜愛運動，本是籃球校隊，但為了兼顧工作和學業實已沒時間參練習，毅然放棄。 

Edwin　 Nova酒吧經理

同 Sky合作得唔錯，覺得佢做事好有條理，唔講都知佢係大學生。

上 course學品嘗紅酒

如果有興趣投身紅酒行業，可先報讀一些坊間有關認識及品嘗紅酒的課程，對紅酒先作了解，對未來入行會有幫助。
主辦機構︰ McCaine Wine Education
內容︰葡萄酒類型和風格、常見的葡萄品種和主要的葡萄酒產區、品酒技巧及食品和葡萄酒搭配技巧等。
費用︰$1,280
網址︰ http://www.mcwine-edu.com 

撰文：曾志恒
攝影：彭自維
部分圖片由被訪者提供