〈 Webber〉，每星期專訪一位網絡紅人，每星期展示一種網絡力量。 

Webber

韓妝教主大佬 B最緊要夠真

大 S當年一句：「沒有醜女人，只有懶女人」，學習化妝變靚神技，幾乎係姊妹們擺脫做剩女嘅唯一出路。所以網上教人化妝嘅 YouTube真係一街都係，要成功彈起，就要學今期介紹嘅大佬 B咁，一句講晒：夠真！佢教姊妹們化 K-pop MV內嘅新妝容，要扮得夠真；仲晒冷埋自己上妝前嘅醜態，又夠真！姊妹們睇片感覺夠親切，相信只要出力扮，一樣可以變靚，自然一直追捧啦！

Webber's profile

原名： Brenda Lui
職業：美容店老闆
拍片資歷： 3年
作品總數： 114個
總 hit rate： 790萬次
subscribers： 61,000人

仿妝示範

少女時代•泰妍 

2NE1• Minzy 

T-ara•智妍

用大佬 B做網名，令人好易留意到，但呢個名係咪同韓國電影《我老婆係大佬》有關？

讀設計出身，每段片開場都有個 B字 logo，一睇就知係大佬 B出品。 

其實唔關事，我都唔係一開始就教網友化韓星妝。呢個名喺我早期寫 blog時已經用，只係覺得自己講嘢粗豪，同大佬 B個名幾夾，而化妝界又好少人用咁豪氣嘅名，所以就一直用。不過近來多咗外國網友，都加番個英文名 Bren Lui夾住用。

點解會諗到教人化韓星妝，而成功彈出？

靠泫雅嘅仿妝彈起，大佬 B食住條水，拍埋少女時代、 f（ x）嘅仿妝片，長拍長紅。 

我之前一個韓星都唔識，最初係拍一啲自己設計出嚟嘅妝、教吓平日出街化妝技巧。反而係網友留言，想知《江南 Style》 MV女主角泫雅個妝點化，所以先會拍嗰段片。後來見段片有 39萬 hit rate咁成功，又知道 K-pop真係好 hit，就慢慢留意其他韓星，好似少女時代、 4Minute都好多人鍾意。所以𠵱家會去睇佢哋嘅新 MV，度吓下段片拍咩。

拍化妝片，有冇乜嘢爆笑意外？

好多人都以為拍片要用好多工具，查實大佬 B都係搵幾個紙巾盒頂實當腳架！ 

𠵱家熟手好多，我拍一條片大約 2個鐘，計埋剪接，都係 6個鐘左右。不過一開始真係好多意外，比如我之前用傻瓜 DC，拍一段片要叉 2次電；後來開始高清拍片，一張 4GB記憶咭要換 3次。就算𠵱家用大機，因為要影自己 close-up妝容，我覺得落腳架唔夠近，就用幾個紙巾盒疊起當腳架，但拍拍吓個紙布盒會突然承唔到重量冧咗，又要 re-take！

作為韓妝界教主，平日出街化幾耐妝？
最新韓妝 trend又係點？

平日化出街妝，大佬 B嘅架生就係咁上下，姊妹們又覺得多定少？ 

雖然平日睇我拍片教大家化嘅妝好多步驟，但係平日我出街都係 10分鐘就化晒成個妝，當然包埋黐假眼睫毛、整雙眼皮呢類麻煩 step。𠵱家韓妝好興畫彩色眼線，好似畫湖水綠眼線，後半段就畫彩色，仲有就係今期喺《 Face》 webber片段內介紹嘅咬唇妝啦！

撰文：鄺浿鏇
攝影：吳偉業