漫遊毒物

巨鴨已爆！進擊的巨人 高調進擊

今日開始，請記住《進擊的巨人》呢 5個字！
警察玩低調、但日本最新動畫作品《進擊的巨人》，就好高調咁入侵緊香港同日本嘅網絡世界！呢套故事講人類被巨人當糧食咁捕殺，完全冇還擊之力，係一套極盡恐怖、血腥、絕望之作，漫畫原作推出唔夠 10期，動畫版已搶閘於 4月開播，唔使一個月已經搞到全亞洲掀起「巨人熱」，改圖、惡搞、自製 cosplay服裝多到講唔晒，近期熱情已殺入香港，點解咁勁？今期一次過話你知！

短小人類殺巨人

《進擊的巨人》故事非常簡單，話說世界突然出現啲高到 15公尺嘅神物生物「巨人」，破壞力強，見人就食，面對生死危機嘅人類，為防巨人，於是建造三重高 50公尺嘅巨大防護牆困住自己，呢個自我隔離嘅和平情況維持咗一百年，直到主角艾連 10歲嗰年，比防護牆更巨大嘅「超大型巨人」突然出現，打破人類同巨人嘅防護壁，艾連雙親被殺，於是發誓大個一定要殺盡巨人、拯救人類！

設定細緻有諗過

除故事劇情夠追看性，「巨人」另一特色係畫功同世界觀設定，初睇會覺得畫功只有業餘水平，基本角色比例同臉部表情可以，不過都係新手漫畫家通病，最新一期已經大大改善。另外「巨人」世界觀亦好完整，例如人類嘅防護牆設計、戰士用嚟飛上天空劈巨人嘅「立體機動」裝置，全部諗過晒，唔係求其是但諗到就畫！

巨人分等級

巨人分成多個類型同等級，一般巨人都有比較高智慧嘅「奇行種」，或破壞力極強嘅「鎧甲巨人」。

超大型巨人：最具代表性嘅巨人，只响第一話出現，估計超過 60公尺，幾腳打爆防護牆後就消失咗，仲未知佢有乜目的。 

女巨人：中期出現女性巨人，屬特殊類型，擁有極高智能同學習能力，動畫暫時未現身，真正身份非常出人意表，不過就唔劇透喇。 

一般巨人：最低級嘅巨人，本作主要出現嘅巨人，表情癡呆猥褻樣衰，見人就食，但行為似 BB多過喪屍。

三大主角

三大主角性格突出，同時亦有人格缺陷。最爆係主角艾連其實第 1期已被巨人當食物吞咗落肚，但第 2期即刻以巨人身份回歸，原因直到而家仲未解釋，想知點解惟有追落去。

艾連．葉卡故事主角，有離晒譜嘅精神力同耐力，巨人食咗佢媽媽，加速佢殺盡巨人嘅決心。後來仲可以變成巨人，原因未明。 

米卡莎．阿卡曼女主角，不單係人氣最高角色，作戰能力亦冠絕人類， 1個抵得上百名士兵。 

阿爾敏．亞魯雷特冇體力、冇信心！但心思細密、頭腦清晰，後期變得可靠，絕對係宅男精神投射。

出道兩年攞大獎

出道兩年，拎咗講談社最高榮譽獎項，上位奇快。 

由 09年 10月開始於《別冊少年 Magazine》連載，漫畫總銷量極速超過 1,300萬，第 10期首週甚至賣出 41萬，罕見地打敗《少年 Jump》皇牌之一嘅《火影忍者》，作者諫山創仲係首次創作長篇漫畫，氣勢拍得住《 One Piece》。唔只被搶購動畫版權，真人版亦已宣布製作中。
至於《進擊》中文版則由東立出版，因動畫首播，頭幾期長期缺貨，需知好多人用手機睇漫畫，認真係漫畫界奇蹟！另記者收到風 J2已買咗版權，嚟緊好快就會播動畫版，不過套片咁重口味，應該要 12點後先出得街！

港版漫畫斷晒市

動漫世界 Manga Shop店長 Tony 

「動畫版開始後多咗好多人買，啱啱星期六、日加埋已經賣咗廿幾套，啲人由 1至 9期咁掃，單期去書速度已經比得上有名漫畫。第 1期已經賣斷，第 10期中文版應該會响 5月底出，遲啲仲有少少日本周邊精品會到，但巨人頭套係漫畫雜誌抽獎禮物，日本都冇發售！」

喬靖夫、黃洋達　 facebook狂 share

表面只係單純暴力打打殺殺故事，但《巨人》劇情伏線就肯定係長篇超大作架構，例如巨人點嚟、點解淨係食人、點解巨人冇生殖器但又可以繁殖等等，引你一路睇落去。但講到尾，最吸引嘅都係漫畫表達「人類對霸權作出抗爭」、「人類唔要自製嘅安全假象而係要自由」、「抗爭求出路定揀安寧地等死」等呢類容易令人有共鳴兼無限聯想嘅命題，搞到連作家喬靖夫、皇上黃洋達呢排都經常响 facebook分享！

喬靖夫 

黃洋達 

喬靖夫分享嘅呢一幕：逃亡時，有錢人嘅貨物頂住城門，小市民竟然只係圍觀，寧願等死都唔敢反抗，最後要女主角米卡莎帶頭先解決到問題。你會係小市民定主角？

皇上黃洋達呢排直情勁沉迷，唔只玩巨人改圖，連網台節目都特登借《進擊的巨人》講政治！唔知係咪真心 fans！ 

馬德鐘 Out　巨人成新一代萬能 Key

冇可能嘅！我要扣你 50分！！ 

講到明全亞洲都掀熱潮，網上改圖兼惡搞根本係多到無法盡錄，隨便揀幾張圖已經甚有睇頭！個樣霸氣得來又有少少灰諧嘅超巨人，更加成為新一代「萬能 key」，「萬能 key」始祖馬德鐘都要投降！

作品名稱：進擊的巨鴨
早排全香港人都走去影鴨，本地代表呢張「進擊的巨鴨」最有睇頭，放落超有氣勢嘅構圖中，隻鴨都即時恐怖咗，雖然創意一般勝在食 timing，我都畀個 like啦！
過癮度：★★★

作品名稱：進擊的強國人
本地講政治嘅網絡紅人 LadyKylie其實都係「巨人」 fans，佢呢張「進擊的強國人」借巨人一抽強國水，一睇張圖大家相信都心領神會，畀滿分啦！
過癮度：★★★★★

作品名稱：巨人之舞
日本某蚊型網上節目，都食「巨人熱」，着 cosplay衫扮巨人跳 part舞，其間仲有女 fans用手機影相。唯一要彈係解像度勁低。
過癮度：★★★★

作品名稱：進擊的牙膏
呢幕原本係超巨人初登場時嘅恐怖畫面，點知網民靈機一觸，加支「巨人牙膏」响隔籬，再加埋 bling bling雪白牙齒，下次賣廣告真係可以搵佢！
過癮度：★★★★

巨人作者係偶像宅！

《巨人》咁邪，係咪以為作者諫山創都係扣晒脷環、好 dark好陰沉嘅人？錯！原來佢超 young、超喜歡日本 idol，早期已經有 fans發現，有啲女巨人個樣係明抄 AKB48成員，最近創哥首度上電視，仲公開承認 idol宅身份，不過佢已經換咗畫，迷上 5人組合桃色四葉草 Z！

諫山創接受電視節目訪問，話一定要聽住「桃草 Z」演唱會先有精神開工。 

日本桃草 Z同好「大平洋男 P」仲將成員「綠色小巨人」有安杏果套入《巨人》動畫 opening內，影片於網上瘋傳，連諫山創本人都畀咗 like。http://youtu.be/Qs1LqWPwn5k 

鬼佬都 buy！

雖然我都唔知點解《進擊的巨人》會咁快傳到去外國，但早前網上有條 YouTube片，關於外國人睇完巨人第 5話時嘅即時反應，就非常好笑兼熱爆！片段入面影住一個黑人 fans，邊睇邊估艾連會冇事走得甩，點知到巨人真係咬落去，佢即時爆粗大叫，最後仲失望到走出門口添！
http://youtu.be/ogXhk-hGdWA 

第 5話結尾就係呢幕，呢個畫面之後，主角艾連就會俾巨人一啖食咗！ 

去 903玩進擊式攝影

手機影 snap，創意永遠比技巧重要，日本網民繼「龜波照」同「星戰原力照」後，最近瘋玩呢種「進擊式攝影」，簡言之就係從視錯令人覺得企前排嘅人好似巨人咁高，之後就大把嘢玩，我哋特別拎埋巨人面具去 903，搵阿奴試影！

必 check要點

1.前後景企開啲
由於要造成視錯效果，企後面扮小矮人，最少要遠離「巨人」約 3至 4m。

2.用手機影最好
單反想影到前後景都清，需要收細光圈、開閃燈、裝腳架，反而手機一影就得，易控制。

捕食當奴
最易影就係呢隻巨人搵食照，前景隻手扮握住嘢，後景就扮被捉，我哋借用到原裝巨人頭套，所以更加好笑！

日本網民作品http://pic.twitter.com/c3Prv8LEl8 

增加受害者
受害者愈多，巨手同小人的對比效果就愈勁，搵多幾個 fd一齊扮慘情啦！

一手捉起
捕食照仲有呢種影法，巨人手伸出食指同拇指執起人類。小矮人腳踭要少少離地、頭下垂，咁先似暈咗。

進擊式飄浮
最好玩係扮跳上半空劈巨人，原理跟影飄浮相幾似，但動作有動感，所以帶少少殘影都唔緊要，易影過飄浮。至於前排演員，一定要少少寒背，咁先至似巨人。（巨人除衫就更加似啦！）

有 app玩

進擊的巨人 digital photo sticker
IOS/免費
日本同香港 App Store都有，係一款巨人相框 app，圖案仲會不斷增加，一蚊都唔使畀，快撈完拎去影咬爆鴨！

進擊的商品

新漫畫送公仔
香港一早已有中文版漫畫，為配合動畫熱潮， 5月尾推出之第 10卷將跟日本一樣，買限定版送多個 Q版艾連「立體機動」發射器匙扣，條繩跟番漫畫設計，可以拉長，好玩！（東立出品： 1至 10期各$30、第 10期限定版$99）

買衫扮巨人
其實呢套並唔係正式《巨人》商品，只係畀你扮實驗室內的人體解剖模型，聰明嘅商人將佢放晒上日本 Yahoo拍賣，大抵 7,500yen就買到（近日搵日本網拍公司搞，約 11算可運到港/約$820）

外傳睇小說
名為《 Before the fall》的外傳小說，講城牆未倒塌前的外傳故事。第 1期講人類點發現巨人弱點、邊個發明「立體機動」武裝。

日本出影碟
同時發售 DVD（ 5,250日圓）、 Blu-ray碟（ 6,300日圓），連 65頁首度公開前傳漫畫《進擊的巨人》 0卷，但留意冇中文字幕的。

FANS點睇？

電影人 Eliza 

本來係男友介紹，我睇咗動畫之後就上癮！最鍾意係男主角細個救女主角嗰段，人類去到絕境，為求生存乜嘢都要做。用《爆漫》形容嘅話，呢本即係王道 mix邪道嘅代表作。同埋我最鍾意巨人嘅猥瑣樣！

奴 COMMENT

早排麻利亞已叫我睇，跟住我上星期去 188買漫畫，老闆娘又再推介畀我，初時覺得畫功極之衰，但嘈嘈吓發現自己已經追咗 8本，個故事真係好邪，其實我早已睇厭正氣少年打鬥，又唔喜歡萌萌大眼妹，日本終於有番套好似《死亡筆記》咁食腦、以故事取勝嘅作品，絕對推介大家睇。更推介大家一齊影巨人相，個主題咁鮮明，影出來嘅相好玩過龍珠放波好多。

撰文：熊俊彥、鍾世傑
部分攝影：黃家活