Ada不斷想方法擴大公司業務，成功喺乳酪雪糕界站穩腳，更衝出香港，於馬來西亞及內地開店。 

創業通

乳酪雪糕浴血戰　靠平突圍

近兩年，香港的乳酪雪糕店開到成行成市，街鋪商場總見到一間，戰況十分激烈，但不少品牌不敵昂貴租金，至今已減少分店數目，有些甚至退下火線。但由 Ada及 Mimi創立的本地薑 Crumbs，自 09年 12月開業後，不但能度過 3個寒暑，除香港外，分店更設在馬來西亞及內地，多達 20間。
Crumbs以平價作招徠，吸引一班 OL及學生 fans外，還不斷增值，如 party到會服務，及把乳酪雪糕上架，放在便利店內售賣。日賣逾 3,000杯，每月營業額超過 300萬，估計盈利亦過百萬。

有 20多種配料供選擇，雖然由員工代舀，但很足料。 

星期二下午，下着滂沱大雨，位於佐敦的 Crumbs乳酪雪糕店仍然坐滿客人，其中 7成是學生，各人手上都拿着大大杯乳酪雪糕，學生 Lynette甫坐下即說：「嘩，好大杯，好抵呀！」
Crumbs提供 3種 size的乳酪雪糕，分別是$23、$33及$37，跟市面以重量來計算價錢的乳酪雪糕店不同，以最大 size為例，可選 4種配料，雖然客人不可以自己舀，要由職員代勞，但職員相當重手，每款配料也舀上 2、 3匙，以相同重量計算，比坊間乳酪雪糕店平約 3、 4成，難怪學生們也大叫好抵！
創辦人 Ada表示，在 09年成立 Crumbs時，是全港第四個乳酪雪糕品牌，當時其他品牌都在中環、跑馬地等高檔地段開店，她們卻偏偏選銅鑼灣景隆街，之後又在旺角、屯門、佐敦等開店。「我哋唔想揀喺高級嘅地點開鋪，想平民化啲，希望普羅大眾可以隨時食到乳酪雪糕。」
價錢平，不一定要將價就貨， Ada製作的乳酪雪糕十分有 heart，「我哋有試過外國品牌，希望鋪頭嘅乳酪雪糕可以比得上外國貨，反覆研製試過好多次，冇加水、冇加冰。」

自家製作新鮮配料

配料方面，堅持每日用新鮮生果，由本地的生果商供應，不會浸糖水；有部分配料是 Ada和拍檔 Mimi構思及自家製作，如香脆碎、迷你蛋白脆糖、糯米糍及朱古力布朗尼等，均由 Crumbs自設的工場製作。「最初工場好細，後來開到第 3間分店後，先租咗個大工場，搵師傅去整。」
原職廣告人的 Ada因與拍檔 Mimi都愛吃甜品，其中尤愛鬆餅，並決定辭職賣鬆餅，「我哋擔心熱辣辣嘅鬆餅只適合冬天，見當時外國同香港都流行乳酪雪糕，所以決定一齊賣，呢兩款一冷一熱嘅食物，迎合晒一年四季嘅需求。」她們選在 09年 12月的冬天開業，先以鬆餅做主，也日賣 800至 1,000個，到了夏天就到乳酪雪糕大賣。「點知乳酪雪糕好快跑出，無論冬夏季都好受歡迎，鬆餅𠵱家只佔約 2成生意。」
看 Ada一身 OL打扮，言談斯文有禮，想不到她很捱得苦，開業初期凡事親力親為，除了研製雪糕和配料，她還落鋪工作，「食肆最難就係請人，我哋通常請 16至 18歲嘅年輕人，但流失率好高，所以頭 1年我都要落鋪，負責落單、唧乳酪、及操作機器。不過自己做過前線，先會知道員工有咩困難，同埋可以第一身聽到客人意見，好似知道客人鍾意食生果，就多啲水果款式，又例如知道咩時間多人，就編多個員工幫手等。」
租金飆升汰弱留強
到 10年 8月， Ada已在旺角開第二間分店，「其實 10、 11年競爭好大，嗰兩年全港有成 2百幾個乳酪雪糕嘅品牌，太多人開，令品質上好參差，亦有人抄襲我哋，以平價招徠，好在我哋最早走平民化路線，出名抵食夾大件。」
隨着租金飆升，有一半以上的乳酪雪糕店相繼結業，「𠵱家只係留到有質素同口碑嘅品牌。」現時市面的乳酪雪糕品牌不足 50個，只佔約 3成為外國品牌，如 Tuttimelon，其餘均是本地薑，而且有愈賣愈平的趨勢，由以往 100克要$20、$30，到現時約$15，不過以 Crumbs的杯裝計算，則平至 100克約$10，仍然最抵食，難怪可以繼續在這場浴血戰中生存。
為了提升競爭力， 11年 4月， Ada在佐敦開設分店，這店的特色在於設有座位，跟其他店只得外賣不同，「我哋見佐敦白加士街呢度好多人食甜品，其實乳酪雪糕都係一種甜品，所以造成一個甜品店，仲提供其他甜品，好似綿綿冰、奶凍及芭菲等，畀客人更多選擇。」

超級杯$37大杯裝乳酪雪糕約有 250克，可選 4款配料，非常大杯。 

濃滑抹茶慕絲$30佐敦店沒堂食，亦有售其他甜品。抹茶慕絲日本入口材料製作，口感滑溜，自家製綠茶糯米糍則十分煙韌。

鬆餅$8/個有提子朱古力及芝士 3種口味，每日新鮮出爐。 

Crumbs在內地已開了 10間分店，全部設有堂食服務。 

Crumbs現在港設有 6間分店，早於 11年時還衝出香港，在馬來西亞開設首間加盟店，「個加盟商係遊客，佢有次嚟香港見到我哋鋪頭好多人排隊，買咗杯試食，覺得好好味，就主動搵我哋傾合作，希望喺馬來西亞開加盟店。」

客人 Lynette

我喺附近補習，成日都嚟幫襯，覺得啲乳酪雪糕價錢平，又好食。

馬拉大陸設加盟店

現時加盟商在馬來西亞已開了 3間店，反應不錯。自 12年起，內地亦有加盟商合作，陸續在 10個城市，包括北京、上海、廣州、深圳、南京等開加盟店，方面收益過百萬， Ada則負責提供製作方法、貨源等，「每開一間加盟店，我哋都會親自上去幫手，提供意見，同睇吓佢哋點營運。不過香港唔會有加盟店，我哋想自己做番 keep住個口碑。」
面對本港租金、成本等上漲， Ada也要擴大業務，以作抗衡，於是想到全港首間乳酪雪糕店提供 party到會服務，「乳酪雪糕咁易溶，要做到會有一定難度，我哋諗到將乳酪雪糕預先唧好一杯杯，放入雪櫃，成個雪櫃運到會場，再由駐場員工幫客人舀配料。」
到會價錢跟店鋪一樣，但最低消費為 40杯，「呢個服務由 11年尾推出，反應好好，𠵱家差唔多每個星期都有客訂到會，好似婚宴、百日宴、私人派對等，最難忘係有次我哋參加拔萃女書院嘅活動，學生同賓客排咗成個鐘頭隊買雪糕，都毫無怨言，最後賣出接近 4千杯。」

Ada不時會到各分店巡鋪，檢查食物品質。 

Ada自家製作了幾款配料，如迷你蛋白脆糖（上）、綠茶糯米糍等，增加獨特性。 

上架服務未來方向

12年中， Ada還把乳酪雪糕上架，在便利店售賣，每杯售$25，「將乳酪雪糕唧成杯裝，每杯再配一包我哋自家製嘅香脆碎，就好似一般雪糕咁，可以畀客人攞返屋企食。𠵱家我哋決定轉同第二間便利店合作，詳細資料未講得住。」
經過 Ada這 3年多的努力，即使去年冬季，店鋪仍能維持月賣約 3,500杯的銷量，店鋪的營業額也超過 3百萬，估計每月盈利逾百萬。到了夏天，生意將再增長 5成，成功打造出亞洲的乳酪雪糕王國。「未來我哋會繼續進行產品研發，亦希望發展批發生意，喺更多便利店及超市買到我哋嘅乳酪雪糕。」

首設的到會服務非常受歡迎，每星期也有訂單，圖為女拔萃的活動，當日賣出近 4,000杯乳酪雪糕。 

去年中， Ada還把乳酪雪糕上架，放在便利店售賣，每杯$25。 

開業成本

租金：約$320,000（ 3按+1上）
裝修+牌照：約$200,000
機器：$150,000
入貨：約$130,000
總投資：$800,000

每月收支

租金：$700,000（ 6間分店及工場）
入貨：約$1,155,000
人工：$600,000（約 50人）
營業額：估計約$3,465,000
盈利：估計約$1,010,000

Crumbs

地址：佐敦白加士街 53號地下

機器材料邊度入貨？

想開設乳酪雪糕店，首要便是有製作的機器，要買乳酪雪糕機並不難，只要上網搜尋，或到油麻地新填地街一帶也可以找到，一般大型的乳酪雪糕機每部約售$80,000起。
配料方面，水果可找水果店批發，而糖果如軟糖、朱古力碎、粟米片等，則可找糖果零食批發店。

參考如下：
萬年機器（乳酪雪糕機）
網址： http://www.manningcatering.com 
陳記果欄（水果供應商）
網址： chanfruitmarket.com
歡樂食品（糖果零食供應商）
網址： http://www.foonlok.com 

撰文：洪芳俠
攝影：李玉梅
部分圖片由被訪者提供