苟芸慧與熊黛林爭奪郭富城的三角戀上映近一個月，形勢似乎已進入白熱化，雖然塵埃落定熊黛林落敗分手，但城城仍未正式承認苟芸慧的身份，而苟姑娘亦未能洗脫小三的嫌疑。事件中，熊黛林令自己成為第一受害人，無疑使城城形象負面，各方因而展開連場暗戰，戰火甚至蔓延到熊黛林的經理人Kim及城城經理人小美。

至於與城城傳足二十年緋聞的小美，一直被指第一日已「唔妥」熊黛林，並一向認為竹門配木門，現今當然樂於「助苟趕熊」。而近年積極投資物業的小美，原來靠賺城城的佣金，現已坐擁市值近一億的物業，睇錢份上，更加要以護「城」為首要目標。

小美當郭富城的經理人已有二十年多，兩人經歷無數風風雨雨之餘，亦共同賺取巨額財富。

郭富城自上年與苟芸慧拍廣告後，不斷傳出緋聞，終於今年四月城城和拍拖七年的熊黛林分手，並經常向外暗示和苟姑娘關係非淺。

暗戰連連

早前，郭富城與熊黛林（Lynn）維持七年的「富黛戀」，傳出苟芸慧介入；不過，獲得城城在演唱會上「世紀握手」確認身份的Lynn，在日前卻於微博上貼了尾指「分」戒的照片，暗示與城城分手，種種動作引致身邊人猜測，苟姑娘撬走城城。

富黛戀分手新聞傳出之後，雖然苟姑娘日日笑咪咪出席公開場合，但就堅決否認自己做「小三」，甚至忽然笑完後，又於記者堆前眼濕濕以示委屈，並說：「我都冇做過，我唔係佢哋講嘅小三！」而且貫徹城城不愛公開緋聞的「傳統」，死口不認與城城拍拖，還答記者：「男友要年紀唔可以大過自己十年。」不過，據傳深得城城母親歡心的苟姑娘，已準備搬近未來奶奶到大坑居住，租金並傳由城城負責。事實上，城城亦已多次公開撐苟姑娘，知道她公開喊，還說：「吓！咁慘？其實唔使喊，清者自清，佢性格係咁。（即時兜）不過其實我哋又唔係好熟。」Lynn知道苟姑娘喊後，則抵死地話：「唔知邊個先應該喊。」各方近日就竭力透過傳媒不停冷嘲熱諷，暗戰連連。

最近，戰火更蔓延至雙方經理人，Lynn的粉絲在微博狂轟小美「拆散鴛鴦」，而小美則大力反擊他們「冇家教」，跟着Lynn的經理人Kim（周優根）又引用聖經金句反擊，戰況可謂七國咁亂。

日前，郭富城和經理人小美吃晚飯，離開時碰到一妙齡少女友，城城主動撩傾偈，看來極冧。