面對面
只許盛放 不願凋零 鍾麗緹
天王城剛與名模 Lynn結束了七年感情，繼續玩車養馬呵疑似小三肥苟，渾身上下從裏到外看不出來半點愛情損傷，依然靚仔依舊筋肉，不過作為男人，分數直插谷底。
唔知攞景定贈興，這個時候， 20年前的前度鍾麗緹從北京回歸到香港，為本週四（ 9日）上畫的新戲《瘟泉》宣傳。
坐在酒店房間，我問定居北京九年的鍾麗緹：「有冇留意香港新聞呀？」
她話頭醒尾：「你係唔係想問郭富城呀？」，沒有變臉、沒有吞吐，繼續帶着甜笑憶述逝去的愛情。
鍾麗緹說，自己是一朵花，盛放的時候，每個人見到她都會笑；當花凋零了，她就知道愛情走了，是時候要結束：「我（花）都就嚟死囉， I'm dying！仲忍？」
係囉，仲忍？名模應該要瞧瞧鍾麗緹這個人辦： 43歲、失婚兩次、目前單身、還帶着三個 3到 15歲的女兒，卻美得讓整個房間裏的每個人都嘖嘖讚嘆。既然可以盛放，又何必要做他身邊那朵不被珍惜的日漸凋零的花？
城中熱話
近期的城中熱話，圍繞的盡是熊黛林棄城、苟芸慧攻城，和國王如何在城堡裏如沐春風的再次享受單身生活。
93年因為與郭富城在希臘合拍音樂電視而撻着的鍾麗緹少不免去到哪被記者追問到哪，沒甚麼人記得她是電影《瘟泉》女主角，這次從北京回港的目的其實是宣傳電影，不是專程來回應「富苟黛之戀」的。
「我唔介意俾人問，不過拍拖係兩個人嘅事，佢哋分手，第三者永遠唔會知道原因。但係我相信，只要係 true love，就可以 last到最後。分開，係個天安排，係因為最好嘅仲未到。」
我問鍾麗緹，當年為甚麼要分手，鍾麗緹說：「我可以成日咁正面咁開心，就係因為我唔鍾意記住啲唔開心嘅嘢。
我當自己係一部電腦一樣，唔開心，就刪除，掉晒佢！」
言下之意，即是與郭富城的一段情亦屬於需要刪除的不快樂記憶？
「我唔會咁諗，我淨係會話畀自己聽，最好嘅仲未嚟到。」
依然活躍於娛樂圈，現時單身的鍾麗緹卻說，下一次的另一半一定不會再找同行：「我想順其自然，唔會 set定一個目標，下一次拍拖要搵咩職業、咩年紀，不過唔想係呢行嘅人。做呢行，啲人太要面，自己睇得最重係面子，出面又鍾意比較，邊個紅啲、邊個又搵錢多啲，我怕咗。」
與李璨琛合演的新戲《瘟泉》本週四上映：「𠵱家揀戲係睇劇本同時間，我想拍啲唔同嘅嘢，想『條件』（挑戰）自己。」
對上一次港產片，是兩年前在《李小龍》中扮李小龍（李治廷）的母親：「我工作盡量唔離家太耐，嗰次喺廣州拍又係暑假，就帶埋三個女一齊拍。」
有得有失
加拿大出生長大， 23歲回港參選華裔小姐，不但贏了后冠，亦立即成為神級性感女星、電影女主角，唔只城城，一出道，和鍾麗緹做過對手戲的還有劉德華、周星馳、梁朝偉和李連杰等巨星。
「我𠵱家都會諗番，我乜都唔識，又唔係讀電影出身，一出道，就同劉德華、周星馳做戲喎，真係好幸運。不過都係因為做呢行，冇人敢追我，真係一個都冇！
就係因為個個都知我係邊個，怕我有男朋友、怕我要求高，其實只有一個原因，就係佢哋唔夠自信。
女人好簡單，就係想搵一個男人可以依靠，搵一個真正有自信嘅男人。」
02年與外籍丈夫 Glen Ross結束四年婚姻，兩年前再與台灣音樂人嚴錚離婚，鍾麗緹說都是自己主動：「第一次結婚，係因為太後生太寂寞，一個人喺香港拍戲，屋企人喺晒加拿大，我真係好想有個屋企，好想有個地方等我收工返去，所以好快結婚好快生女。
第二次結婚，我真係諗住無論好醜都要一世，幾衰都要忍落去，原來唔係㗎，我都就嚟死， I'm dying，仲忍？我呢個人，其實好易開心，咁耐以嚟，我諗到最低潮，就係第二段婚姻最後嗰段日子，我唔係人，我係一朵花，我開心時，身邊每個人都開心。我唔開心、覺得謝啦，我就知道呢段感情唔可以再落去。
結果，我哋兩個一齊做咗決定（離婚）。我由細到大都知到自己要啲乜，做人一定要咁，人生咁短……我過得開心，係因為每日都當係自己最後嘅 24小時，我唔要喺最後嘅 24小時同人嗌交、唔開心。
唔開心就一定要喊、要飲酒，我一定要發洩出嚟，負能量千祈唔好放喺心度，會慢慢俾佢食咗你。」
93年贏完華姐冠軍，即被揀中主演郭富城音樂特輯，結果一撻即着。鍾麗緹說以後不要和圈中人拍拖：「佢哋太要面，同埋愛比較。」《壹週刊》圖片
出道第一部電影《至尊三十六計之偷天換日》已經做女主角，演劉華女友：「 23歲根本唔識做戲，失戀嘅話拍戲就笑唔出。」《壹週刊》圖片
一代性感女神巔峰作應該算是 01年的情色片《晚孃》，露背與泰籍演員上演繼母子畸戀。
十多年前，是不折不扣的半唐番，廣東話不夠用、要用英文搭夠。
在北京定居九年，鍾麗緹現在成了「北漂」，下下說話溝幾粒普通話。
說小女兒性格男仔頭，最像自己最愛看「 F依」。
我沒聽懂，原來是英文「 F」加普通話「 1」，即是一級方程式賽車；說平常工作忙，家裏僱了「阿二」照顧女兒，原來講緊「阿姨」；再說三個女兒性格各異，最怕她們遺傳自己的「吱」性子，原來係「急」，從英語到粵語，都係為咗三個女：「人哋屋企爹哋做 bad cop、媽咪做 good cop，我喺我屋企就永遠係 good cop，唔夠惡……除此之外，做單親媽咪冇咩唔好。女人比男人最叻係分配時間，我接工作主要係剪綵、廣告，最多離開屋企一、兩日。
拍《瘟泉》都係去咗日本兩個星期啫。個個都問我，單親媽咪幾咁辛苦，我唔覺喎，幾攰都好、幾夜返屋企都好，見到三個女，即刻開心番。
佢哋會圍住我要幫我按摩、又會讚我化咗妝好靚，仲話我唔使搵男朋友，第時我老咗佢哋會照顧我、幫我換片沖涼……我對三個女要求好簡單，就係想健康長大、同識得面對唔同環境。做人唔好成日問點解，唔好成日諗 what if……唔滿意現況，一係改變現況、一係改變諗法，做人就會容易滿足得多、開心得多。」
現在有女萬事足，將來女兒一個一個長大離家呢？
「我一樣有自己生活、自己朋友，我想開餐廳，我 15歲就有個夢想係開 spa添……諗落就覺得忙！」
Cupcake
08年與第二任丈夫嚴錚結婚生女， 11年幼女剛出世便宣布離婚：「呢段婚姻尾段，係我人生最低潮，我覺得我係一朵就嚟死嘅花。」《蘋果日報》圖片
即係咁，始終 43歲，化妝也遮不了魚尾紋，身材比起當年確實豐滿了不少，不過我和攝影師還是一致裁定，鍾麗緹一舉手一投足都是味道，難得一見的好拍、從骨子裏美、從骨子裏性感。
鍾麗緹說，性感和快樂裝也裝不出來。
最後，臨走，笑聲不斷、和當年一樣自信的鍾麗緹還堅持塞給我兩個 cupcake讓我帶走：「好味㗎，我次次返香港都要食。
你一定要試，我想你都帶啲甜味走！」
Cupcake我吃了，真的很甜，真的受了感染。
撰文：朱小博
攝影：葉曉明
美術：楊國樑
化妝：王奕為（ ON TIME）
首飾： David Yurman
場地提供：港島海逸君綽酒店
留言列表
