攝影師 Alex同阿龍認為碼頭工人為爭取福利而抗爭，體現到團結精神是值得高興的事，所以應將這份快樂給市民分享。
搜尋氣
影 800張碼頭工人笑臉 「微笑抗爭同睇巨鴨一樣！」
貨櫃碼頭工潮逾一個月，上週 HIT及外判商拋出加薪 9.8%方案利誘工人復工，週一晚 7時，工會戲劇性接受，結束 40日工潮。
運動要打氣，早前兩名自由攝影師 Alex及阿龍，就義務為四百多名罷工工人各拍兩張照片，一張微笑、一張振臂握拳，拼合成 12張大合照，放上 fb替工人感謝市民。
40歲的 Alex與 37歲阿龍認為這輯相的意義同睇巨鴨一樣，能夠分享快樂。「點解咁多人去睇巨鴨？集體去享受一樣嘢，比一個人開心，多好多嘅！」
今次係香港工運一個里程碑， idea係來自咁多工人持續咗咁耐而有咁多市民支持。我哋做攝影師唔太識溝通，倒不如利用我哋嘅長處，就係影相，幫佢哋出頭。
影微笑嘅相，因為呢次係快樂抗爭，我哋覺得就算打工都應該開心。剛剛至有朋友問我，唔明點解咁多人去睇巨鴨，我就認為微笑抗爭同睇巨鴨一樣，集體去享受同一樣嘢，係比一個人開心多好多嘅！
我哋影咗近廿年相，雖然唔係跑新聞，但呢個老闆（李嘉誠）太離譜，嚴磊輝（ HIT董事總經理）話外判商唔係承辦商，其實打工仔都知，咪即係判上判囉，擘大眼講大話實在過分，所以我哋要出嚟做啲嘢！
四百多名工人合併成 12幅相片，放在「左翼 21」 facebook，當中文字全是罷工工人的心聲。
上週五一勞動節大遊行，阿龍與 Alex都去到中環長江中心拍攝，為工人打氣。
問過班罷工工人，佢哋話就算冇得撈都要撐，我覺得堅喎！以前接觸過勞工運動，呢班係少有咁勁，好清楚係為尊嚴嘅！
試問邊個冇俾有錢佬打壓？你買層樓都要俾佢哋呃你幾十萬，咩叫建築面積？咁都要畀錢有冇搞錯？百佳明明加咗價又寫係特價品，邊個冇俾佢哋剝削過？
我 23年前喺餐廳打工，當時已有 28蚊個鐘，𠵱家爭取緊最低工資仲係 33蚊，可想而知𠵱家基層勞工待遇有幾差，生活愈嚟愈艱難！你問我哋未來想影咩？我想未來冇嘢影，盡快搞掂件事啦，班工人真係好慘！
撰文：何志衡
攝影：攝影組
留言列表
