FACEweekly
愛情之告白 Kary
七月分手最好日子
一月，新開始， Kary定名大碟《 My January》，正是她的愛情觀，「由拍拖到熱戀再到分手，一月就是愛情的開始。」唔只感覺，親身經歷如是，「一月係最凍時分，可以同戀人一起 cuddle（擁抱），同愛人冧冧冧。」首派台作〈告白〉，就是以講背叛男友、〈狠狠〉是熱戀中快歌、 Kary最有感覺還是第 3 plug〈我願意〉，「同對方拍拖很久，突然間分開一段時間，然後知道對方已和別人結婚了。」講到疑似第一身感受，「冇，不過好多朋友會搵我傾，自自然然有感觸良多。」假如一月最開心， Kary就話家吓 7月最差，「天氣熱人易躁，要保持心境平靜！」都話 Kary係戀愛專家！
•〈告白〉自編故仔做導演，最近更與周柏豪合作搞劇場版，「柏豪之前有首歌叫〈同林〉，又係講第三者，我哋覺得好似上下集咁，就製作劇場版。」大家要留意電台，今個星期 plug喇！
爸爸是最佳「男友」
細個成日幻想童話式愛情，諗過廿歲就結婚生仔， 18歲左右的 Cookies年代， Kary更試過失去平衡，每日淨係掛住拍拖，「但愈大就愈意識到不可倚靠愛情生活，做一個女強人更好！」諗過自己開鋪賣衫，不過爸爸就話太冒險，「爸爸之前就係做 retail而破產，所以成日勸我唔好搞，不過近年佢就搞賣 tee網，教曉我唔好咁易放棄。」人生及愛情道理同時間放入 Kary袋裏，「每個星期同屋企飲完茶，就會同爸爸一齊行街傾吓感情事，佢叫我唔好因為一棵樹而放棄成個森林。」一路講嘴邊甜笑，畀我做爸爸都抵錫啦！
• Kary爸爸製作的網站 http://www.teelocker.com，任何人都可以自薦自己設計圖案上網站，作品投票愈多，網站就幫你出 tee或鞋， Kary當然有在微博幫爸爸宣傳。
Dash最可愛第三者
咪心邪以為我有猛料爆，唔係同公司樂隊 Mr.的低音結他手 Dash，而係 Kary養了 6年的狗仔拉布拉多犬 Dash，「我好怕會整親細狗，而且細個就覺得養大狗好有型。」愈養愈大隻，反而沒有 Kary想像中的型，「佢個樣實在太蠢，有時同佢傾心事，都畀個傻氣你，激死。」正正是這份傻氣，令一家人更多話題，「食飯唔使下下對住個電視，而係個個係咁講 Dash有幾得意。」咁如果男朋友唔鍾意狗點算？「一定要迫到佢鍾意，男仔拖住大狗出街，特別有型。」
• Kary好鍾意'04動畫《超人特工隊》內的角色 Dash，同狗仔一樣成日係咁跑好有精力。所以一有時間， Kary就會同 Dash在屋企附近的山徑散步。
後記 各男生，死心吧！
就算你好似 Kary爸爸咁錫佢、又有不怕大狗之膽，也別妄想。
最近 Kary被影到同網球手前度 Brian在布吉度假，最近更承認復合，講到佢時係咁迴避，但難掩面上的甜絲絲，在此祝福 Kary！
留言列表
