一姐老闆娘
上週四（ 5日）「星煥」慶祝兩週年，鍾嘉欣拍劇未能出席，惟有派旗艦歌手鄭欣宜上場，而「星揚」代表梗係派陳法拉坐鎮，活動中首播佢的 MV微電影令記招猶如佢的個人發布會，「一姐」地位呼之欲出。
分房鬥
法拉靠老公做一姐 死敵嘉欣：𠵱家唔使爭啦！
出名好勝的陳法拉，拍劇要爭視后，連殺入樂壇都要爭做一姐，一直有傳「星煥」的幕後大老闆為法拉老公薛世恆，但其實「星煥」不嬲有個同級花旦鍾嘉欣坐鎮，如今法拉入樂壇當然唔可以屈就，老公即刻將「星煥」分拆，另組新公司「星揚」，從此命令一人一個山頭唔使頭痕，點知法拉連出碟日期都要啄實鍾嘉欣，到時睇吓邊個好賣啲囉！
「星煥」唱片愈簽愈多人，月頭仲開多檔「星揚」霸多個地盤，主要目的其實係為免愛將鍾嘉欣與 Neway大嫂陳法拉有資源分配問題， 2個字頭各據一方。
出碟鬥撞期
其實 08年加入樂壇的鍾嘉欣，一直係星煥主理人 Herman（何哲圖）的愛將，獲 Herman重點投放資源谷佢做一姐，但 10年老闆娘陳法拉忽然加入星煥做歌手，一個係愛將一個係老闆娘， Herman即變夾心人。據知情者透露：「法拉又點會甘心有人同佢爭做一姐吖，終於冧掂老公薛世恆出錢另組新公司『星揚』，力谷自己做樂壇新人王，唔使俾嘉欣分薄資源吖嘛。」上週五（ 6日）本刊於一活動上問及嘉欣，佢就晦氣話：「成日都話我哋爭， 𠵱家唔使爭啦！」不過預計 9月出碟的鍾嘉欣，「咁啱」法拉亦打算同月出碟，到時銷量又有排你爭喎嘉欣 BB！
高層睇實
何哲圖（ Herman）一直睇好鍾嘉欣，去年尾鍾嘉欣加盟星煥時，除獲樂易玲及各大傳媒高層撐場外， Herman更送她一座以她英文名 Linda的水晶擺設。
上月尾樂易玲在銅鑼灣舉行生日會，除咗一班 TVB藝員到場慶生外，當晚薛世恆亦首度以「星煥」高層身份賀壽。《蘋果日報》圖片
星揚四小強
江若琳
近年主攻電影及北上拍戲的江若琳，去年底轉投新公司後，預計將於今年中出碟。
農夫
將於本月中出碟，亦將會於 8月於九展開個唱。
吳若希
於 10年及今年 5月推出過 2張專輯，可惜成績麻麻哋。
胡鴻鈞
《巨聲》比賽後，一直只在 TVB拍攝節目，終在今年初獲星煥國際睇中簽約。
星煥多新血
樂瞳
’09進軍樂壇推出過 2張 EP，上年中加盟星煥，但一直未有新歌派台。
許廷鏗
’11初加盟星煥後，半年先後推出 2張個人大碟。
Super Girls
今年初成團並簽約星煥，星煥稱以投放過百萬力谷，打造港版少女時代， 5月首派台歌曲〈 Be My Love〉迅即上各大流行榜。
留言列表
