等上岸
轉會真空期 Hea爆官恩娜全職瘟仔
入行 8年半紅不黑的官恩娜（ Ella），今年成功攝位夥拍林峯，接拍 TVB新劇《雷霆掃毒》。入屋在望，但年初卻跟經理人解約反目，有傳獲 bma老闆羅傑承出手解圍，更豪擲 500萬簽約 3年。
偏偏精甩尾的 Ella一招「金蟬脫殼」，日前宣布過檔華納，反轉豬肚激嬲羅生，有指連提攜佢擔正的樂易玲亦被佢呃埋，誓要 Ella在《雷》劇宣傳消失﹗坐定粒六等轉會的 Ella上月初趁真空期，索性全職專心瘟仔， mark實筍盤混血醫生男友。等簽新公司，難怪 Ella得戚對本刊話：「我呢一刻唔想結婚喎﹗」搏多陣好喇！
剛 33歲的 Ella，多年來歌影視三線發展亦未有代表作，就算 09年在《超級巨聲》中一唱驚人，亦未能挽回星途，反而黑氣過人，今年 3月中先有傳 Ella被前經理人 Keith拖欠 200萬、後有胞兄官仲銘在微博上載全狗宴相片辣 㷫網民，是非繼續纏身。
3萬買葵花鸚鵡
早前 Ella與男友在灣仔寵物店睇鸚鵡，事後 Ella解釋佢只係與男友玩雀：「我只係覺得佢（鸚鵡）得意，所以入去玩吓啫！」
當街拖手
Ella與男友取車途中，情到濃時，二人唔避忌當街手拖手。
大話冚大話
Ella出道 8年都是同一經理人公司，有指她一直不滿公司栽培不力，而借欠薪發難解約，後更傳出獲羅傑承賞識，以 500萬簽約 bma做一姐。當時 Ella回應加盟 bma一事，更口響響：「我大個 㗎啦，可以自己傾！」據知當時表面對 bma投誠的 Ella，已打算轉會華納，但又怕激嬲 TVB，隨時被飛出《雷》劇，於是對樂易玲隱瞞加入「四大」（唱片公司）一事。
叻女兩頭瞞的 Ella，見加盟華納塵埃落定，《雷》劇戲分又完成拍攝，早前心情靚絕的她，與拍拖逾 3年、 30歲中法混血醫生男友 Juan-Domingo Maurellet，往灣仔知名鸚鵡店揀雀，據知 Ella對叫價 3萬起的白色葵花鸚鵡有興趣，可惜當日未有扑鎚。據 Ella身邊人透露，與男友感情穩定，又恨紅館開個唱的 Ella，認定過檔華納實有運行，索性將婚期押後，疊埋心水搏多幾年。
二人在寵物店玩咗廿分鐘鸚鵡，跟住往對面餅店買撻醫肚，二人一前一後離開，警覺性高嘅 Ella亦不時四圍住。
生於大溪地嘅 Ella，爸爸經營珠寶生意，當地更有 3,000呎花園洋房，有指 Ella處女大碟亦獲屋企用錢資助，入行純粹賺錢買花戴。
「結婚會好攰」
撻着吳卓羲
《壹週刊》圖片
05年， Ella首次接拍 TVB劇集《酒店風雲》，跟同劇同齡嘅吳卓羲撻着，但一直傳出假分手真拍拖，直至 07年二人正式分手。
眼紅薛凱琪
《蘋果日報》圖片
有指一直恨開紅館個唱嘅 Ella，不忿同期出道嘅薛凱琪（圖左一）今月已經達標， 𠵱家自己加入華納雖然降呢迫做 Fiona師妹，但為實現理想，冇計！
唱紅《巨聲》
09年 9月 Ella在《超級巨聲》與參賽者林志程合唱〈 Endless Love〉，被雷頌德讚「唱歌好聽」，網友亦因而留意佢歌藝，甚至在 facebook成立「力捧官恩娜上位團」。
拍住 chok峯
Ella在《雷霆掃毒》孭重飛，仲有份拍住林峯飾演警察，戲分只僅次於女主角徐子珊，絕對算獲 TVB厚待。
煙火四起
經常亂噏講錯嘢嘅 Ella，得罪人多， 𠵱家玩埋手段、戲弄老闆級人士，小心隨時玩出禍！
嬲兩次
《蘋果日報》圖片
08年 Ella爆料 TVB有鹹豬手，被樂小姐斥「博見報」，至今年仍安排 Ella拍《雷》劇，但 Ella卻隱瞞加盟華納一事，再度激嬲樂小姐。
臨時甩底
《蘋果日報》圖片
bma老闆羅傑承有意斟 Ella過檔，更開價 500萬簽 3年，又幫手拆解 Ella與舊公司合約問題，可惜有人在簽約當日潛水，兼投身對家公司，明落羅生面。
自放煙幕
《壹週刊》圖片
今年 3月傳出 Ella經理人 Keith拖欠佢 200萬，尚有幾個月合約嘅 Ella主動與 Keith解約。但有指想提早轉會嘅 Ella放煙幕混淆視聽，反咬一手栽培佢嘅 Keith。
亂噏爆料
《蘋果日報》圖片
08年 Ella衰多口爆料，指早年隨 TVB出埠拍劇時，有女藝人向佢訴苦曾遭男藝人借醉侵犯，事後茅頭指向馬德鐘、郭政鴻等人，郭更發律師信澄清。
留言列表
