韓面
孖 2PM划龍舟 Dream Team 2玩轉香港
韓國爆肌組合 2PM，今年 3月來港開騷淪陷港女，事隔唔夠 4個月，上週一（ 2日）又再空降香港，今次仲帶埋韓國人氣遊戲節目《 Dream Team 2》成員（出發夢之隊 2）一齊玩遊戲。
其實今次 2PM同 Dream Team成員是應香港旅遊發展局邀請來港拍攝。來港只得一日，但一班大隻男唔只划龍舟比賽，夜晚仲開埋騷娛賓，就算出騷遲大到， 300港女一樣 high爆。
上週一（ 2日），韓國爆肌猛男組合 2PM連同 Dream Team成員來港，以嘉賓身份踩入尖東參加「香港國際龍舟邀請賽」，當日一班猛男仲落場划龍舟比賽，可惜個個得個樣，實力只係麻麻， 9隊一齊比賽，最後得第 8，以尾二姿態衝線。
遲足一粒半鐘
上週一（ 2日） Dream Team加 2PM嘅龍舟隊由俊昊做鼓手率領眾巴打划船，不過最後都係做輸家。《蘋果日報》圖片
當晚一眾 2PM及 Dream Team成員，原本被安排於晚上 7點半出席《亞洲搖滾聲勢力》做壓軸演出，點知成班猛男遲足一個半鐘先到，搞到現場 300名粉絲鼓譟，事後 Dream Team隊長李昌民上台爆響口：「遲到因扒龍舟輸咗，大家心情有啲差。」雖然成 team人冇乜 mood，但好彩 2PM同 Dream Team成員又騷肌又跳勁舞，先將現場觀眾怨氣掃走。事後 Dream Team及 2PM一眾巴打更由香港貿易發展局安排下，跟洪天明於西九 W酒店做訪問，據知因為洪天明爸爸洪金寶於韓國有一定知名度，加上洪天明的親生阿媽亦是韓國人，所以揀中洪天明做訪問。洪天明話：「同佢哋傾偈內容係保密唔方便講，其實主要係我介紹香港嘅嘢畀韓國，因為佢哋嗰晚要趕上機，所以傾咗一個鐘佢哋就趕住走，不過佢哋都好 nice，尤其 Nichkhun，因為大家可以用英文溝通。」
拍住《 Running Man》
扒完龍舟當晚，一班 Dream Team成員同 2PM成員踩去尖東出騷，可惜因做咗輸家心情差，卒之遲到一粒半鐘。
《 Dream Team》其實係韓國 KBS電視台逢星期日早上播放嘅王牌綜藝節目，每集有由唔同藝人組成的 Dream Team，跟不同的嘉賓、當中有消防員或模特兒團隊等玩遊戲，主要是玩鬥快、鬥高或鬥遠比賽，輸家雖然唔使罰，但贏家就可以變身王者。而《 Dream Team 2》最大賣點係經常有巨星，如 Super Junior、少女時代，甚至 2PM等超級偶像任嘉賓比賽撐場，該節目由 09年第 1季做到 𠵱家第 2季，平均收視高達 8.4%，同《 Running Man》拍住上被列為韓國兩大至勁遊戲節目。觀眾集集都喺電視睇，班星賺 air time都賺到笑。
玩謝韓星
《 Dream Team》話就話以玩速度、玩距離、玩高度為主，但間中都會請班女星着得性感撐場，偶爾都會蝦碌出醜，真係俾佢玩謝。
索女吸客
《 Dream Team》節目除咗玩遊戲，最鍾意係請啲索女上節目做嘉賓，而 KARA嘅荷拉亦曾着露臍裝玩拋波，夠晒視覺官能刺激。
辣妹消暑
《 Dream Team》唔只淨係玩陸上遊戲，上年中曾邀請一班女團歌星好似 SISTAR及 Nine Muses等着晒比堅尼玩水上遊戲，但因節目於星期日早上合家歡時間播放，故收到唔少觀眾投訴。
最差嘉賓
《 Dream Team》以玩速度鬥快遊戲為主， 2AM瑟雍就曾經挑戰玩障礙賽，但唔夠 5秒已經跌低，被人笑佢係最短時間跌低嘅參賽者。
兩大對手
韓國有大把綜藝節目，但遊戲節目 3隻手指數得晒，除《 Dream Team》外，最大對手就係《 Running Man》同《青春不敗》。
《青春不敗》 sell靚女
同樣由 KBS電視台製作，節目以邀請一班女偶像到鄉下地方玩遊戲做賣點，例如鬥快捉蚌或鬥快清潔豬欄等。少時、 KARA更經常現身節目被糟躓，但開播以來收視最高只得 7%。
《 Running Man》巨星出醜
SBS電視台製作，每集主持同嘉賓會到韓國不同地標玩遊戲，輸家要接受大懲罰，賣點係睇班巨星嘉賓出醜。上年尾鄭容和曾隨隊來港拍攝，搞到 5千香港粉絲迫爆朗豪坊。
留言列表
