大肚林嘉欣夾硬拖囡囡走

1.【今日我至等】前晚林嘉欣帶埋囡囡去買完ＢＢ用品之後，就即刻打電話通知老公，然後佢就陪囡囡喺遊戲天地玩，好有耐性咁等司機嚟接佢哋。

【銅鑼灣→灣仔】林嘉欣嘅囡囡Kayla𠵱家兩歲多啲，不過好快佢就會生第二胎，為咗即將出世嘅小朋友，前晚7點幾，腹大便便嘅嘉欣帶埋囡囡去到銅鑼灣利園商場，專賣嬰兒用品嘅樓層買嘢，佢快手快腳唔使半個鐘就掃咗幾件衫仔同一啲日用品準備離開。不過行過商場嘅遊戲天地時，囡囡Kayla好開心埋去玩滑梯嘅時候，嘉欣發現咗有記者影相，佢好友善走埋嚟同記者傾偈，佢話：「嚟買番啲細路仔嘢，預產期6月左右，𠵱家等老公揸車嚟接。」之後佢想帶囡囡離開，不過小朋友玩起咗就唔想走，前後三次，嘉欣冇計，惟有踎低連拉帶拖咁夾硬拉Kayla起身走。落到去就見到司機開住架7人車接咗佢兩母女離開。

2.■預產期6月嘅林嘉欣個肚已經好大，但係囡囡玩到唔肯走，佢惟有拖佢離開。

3.■嘉欣好識做，買糖𠱁番囡囡。

4.■嘉欣老公袁劍偉見記者在場禮貌地過嚟打招呼。

兩夫妻有禮貌

原來跟手嘉欣會合埋老公，一家三口同幾位朋友帶埋細路仔去咗灣仔嘅生記海鮮酒家晚飯，餐飯食到9點半左右，佢哋食完落樓。臨上車前嘉欣對其中一位小朋友又抱又鍚先肯上車走，嘉欣老公袁劍偉見到記者，佢同嘉欣一樣有禮貌，仲行埋嚟同記者傾咗兩句，佢話：「同朋友食飯啫，𠵱家返屋企。」
採訪、攝影：李志明、黃曉程、徐錦池