FACEweekly
80’何超致敬
何家淑女新聞多多，第一代淑女何超儀一向少理，繼續音樂和電影大晒！近期仲有新搞作玩大佢，向八十年代超級巨星梅艷芳、張國榮、羅文、陳百強致敬，新歌〈八十再玩〉將 4位 9首經典名曲玩 medley唱足 9分鐘，超 hyper！齊齊向一代舞台妖王妖后 salute！香港人永遠懷念。
第一次與偶像相遇
我是梅姐和哥哥的 die hard fans，他們也是家姐（何超瓊）的老友，記得當年家姐去完 Disco Disco（簡稱 DD）蒲，返嚟拎咗張梅姐親筆簽名相畀我，上面仲要寫住我個名，開心到癲！再話畀我知約咗梅姐嚟我哋屋企 BBQ，真係好興奮！我用咗一個好特別嘅方法出場， 12、 3歲嘅我着住黃綠色露腰連身泳衣，成個小露寶咁，表演咗幕深水炸彈跳落水，點知浮返上嚟嘅時候一邊胸墊升到上頸，勁瘀！諗番都覺得好好笑。
偶像鼓勵及責罵
當年想入行，屋企人就話我又肥又唔識打扮，但梅姐反而撐我講唔好再話我，打擊我自信，趁住年少輕狂咁有自信先係入行嘅最好時機！而入行後遇上籮記第一次同我講叫我唱 rock，好深刻！但年少輕狂都比偶像哥哥罵過 2次，一次係去蒲大大聲講粗口以為自己好型、第 2次係貪玩喺慶功宴上玩當年好興電流波電到黎小田飛起， 2次都俾哥哥罵完再叫家姐「的」我走，雖然被罰但係偶像講點都要乖乖聽。
學以致用要致敬
諗番當年好傻，由細到大經常模仿他們唱歌及造型，但入行覺得已經唔興所以唔做。所以我想向佢哋致敬，終於得到一個機會可以再扮佢哋，要唱得好就聽佢哋得啦，我哋就玩 rock要嗌，將梅姐嘅〈曼珠沙華〉、〈飛躍舞台〉、〈裝飾的眼淚〉、哥哥的〈拒絕再玩〉、〈藍色的憂鬱〉、羅文的〈激光中〉及 Danny的〈創世紀〉和〈煙雨淒迷〉，八首經典只唱 Chorus，嗌到冇晒聲，第 1日灌到第 3首已經要收工！
八十再玩演唱會
話明再玩當然要盡玩，身為佢哋 fans梗係要唱，變 rock唱快幾好玩呀！一開始揀咗好多歌但係放唔晒，好似〈淑女〉、〈妖女〉最後都放棄咗。今次想同平時唔同所以迫 The Uni Boys玩和音同 rap，搵嚟大飛、 C.Y. Kwong監製， C.Y.Kwong負責重新編曲， 9分鐘冇停好正！出碟仲想搞個 80年代 party玩番餐，好期待！嚟緊仲會搵 Wing Shya拍 MV！
USB連 tee冧粉絲兼做慈善
今次出嘅唔係碟而係 USB， A卡式帶面設計夠靚兼環保，隨碟仲有 tee送，搵嚟 Lady Gaga嘅創作總監 BMatthew Williams設計 4位 pop art味肖像圖， 4月中至底登場，粉絲密切留意！扣除成本收益仲會捐去中文大學支持演藝發展，有意思！
撰文：侯詠祺
攝影：葉曉明
化妝： Ling Chan@ZING the make up school
髮型： Ben Lee
留言列表
