星遊記：薛家燕賊婆坐郵輪

■家燕姐暢遊墨西哥，貪玩戴上當地草帽。

薛家燕早前難得有長假期，趁機飛往美國探親，家人特別為她安排在當地坐郵輪到墨西哥觀光，享受悠閒旅程，家燕姐貪得意穿上當地民族服，笑言變身「賊婆」。撰文：比華利

薛家燕近年只顧𢱑銀，即使出埠登台都來去匆匆，近日美國洛杉磯的外甥要結婚，她乘機拉大隊組探親團，家燕姐帶着二子石耀庭和幼女石耀珠跟眾親友出遊，共敍天倫。家燕姐此行還在當地參加郵輪團，不但到了墨西哥，還到了聖地牙哥探訪多年舊友、何守信前妻歐嘉慧。

■不少藝人愛坐飛機出遊，家燕姐卻享受坐郵輪的悠閒。

■家燕姐在美國的外甥成家立室迎娶泰籍妻子，她特地參與泰式婚宴。

■家燕姐（右二）有幼女石耀珠和二子石耀庭陪同出遊，大享家庭樂。

提防扒手

家燕姐先飛美國會合胞姊，然後結伴乘郵輪到墨西哥，泊岸後她四出觀光，還入鄉隨俗戴當地傳統大草帽，家燕姐說：「旅遊區有好多檔口畀遊客影相，我當然都扮吓嘢影相留念，我覺得自己個造型好似啲山賊。」當地治安麻麻，導遊特別叮囑家燕姐要小心扒手，家燕姐說：「我哋全程好小心手袋同銀包。」家燕姐很享受坐郵輪的悠閒，她說：「唔趕時間坐郵輪係幾舒服，因為船上嘅餐飲服務都好好，仲有好多娛樂提供，又可以去跳舞，娛樂活動多姿多采。」

■家燕姐順道往美國聖地牙哥探訪何守信前妻歐嘉慧。

■家燕姐在墨西哥街頭，被當地的傳統服飾吸引，忍不住大變身，她笑言自己是賊婆。

家燕姐提到外甥的婚宴，她說：「新娘係一個泰國人，所以佢哋婚宴有中式、西式同泰式，好隆重又特別。」她又抽空到聖地牙哥探望歐嘉慧，她說：「我哋想當年合作好多，每次有時間去美國，我哋都會敍吓舊。」

去邊度：墨西哥、美國
玩幾耐：20日