生前合作無間，死前最後一個電話都係打畀陳太，陳淑芬話 4月 1日紀念演唱會上要爆收埋 10年大秘密，勁期待！《蘋果日報》圖片
FBI
懷念哥哥 10年 唐唐 4． 1出山
一踏入三月尾， FBI覺得啲空氣聞落都憂傷啲。唉，沙士、哥哥逝世，香港人距離多災多難嘅 2003年，原來眨過眼就 10年。
哥哥呢啲真正巨星，去世 10年，歌一樣襟聽、戲一樣襟睇、朋友粉絲一樣掛到上心口呢！趁住 10周年，連串紀念活動陸續有嚟，齊齊懷念！
除咗大型商場、文化中心會舉行哥哥作品展外，好多人同 FBI一樣最期待哥哥生前經理人陳淑芬操刀嘅紀念音樂會，最想知陳太到底要爆乜嘢驚世大秘密。未到 4月 1日正日，等 FBI爆啲秘密你知先，陳太獨子陳家豪最近就聯同一班哥哥忠粉狂摺紙鶴，準備於時代廣場紀念哥哥活動展出，仲希望摺夠 2百萬隻，打破健力士紀錄。 FBI問佢，哥哥生前密友唐鶴德（唐唐）會唔會出席紀念活動？家豪就話未知，不過 FBI聽聞，深閨 10年，聽講搬離加多利山哥哥故居嘅唐唐，好有機會做《霸王別姬》放映會特別嘉賓呀！係就好囉！
上週五，陳家豪在微博上載照片，話兩母子齊齊同唐唐慶祝 55歲生日。 FBI索到席間陳淑芬母子，落嘴頭氹唐唐出席紀念活動。
陳家豪連日以來都為哥哥系列紀念活動奔波，上週六（ 20日）還親自踩上時代廣場的辦公室，跟哥哥忠粉一齊摺紙鶴。
半年前開始籌備，陳家豪話，哥哥一班忠心粉絲摺足兩個月，已經摺夠二百萬紙鶴，等 4月 1日破健力士世界紀錄。
率先開鑼嘅奧海城「音樂傾城．張國榮展覽」，有好多粉絲及陳淑芬提供極罕哥哥影音產品及歌衫， 4月 7日前記得去睇！
1.音樂傾城．張國榮展覽
日期： 3月 23至 4月 7日
地點：奧海城 2期（免費入場）
2.繼續寵愛十年紀念展
日期： 3月 29至 5月 1日
地點：時代廣場（免費入場）
3.《繼續寵愛．十年．音樂會》
日期： 3月 31日
地點：紅館（費用：$680、$380、$280）
4.《繼續寵愛．十年．紀念晚會》
日期： 4月 1日
地點：紅館（費用：$200）
5.《霸王別姬》電影 20周年紀念新光慈善放映會
日期： 4月 1日（兩場）
地點：新光戲院（費用：$50）
6.「張國榮藝術．藝術張國榮」電影藝術展覽
日期： 4月 2日
地點：香港中央圖書館展覽館 1-5號館（免費入場）
撰文、攝影： FBI
留言列表
