close
政壇怒漢詹培忠雖然冇做議員，但仍新聞多多，他日前街頭遇襲，被打成豬頭炳，警方正全力緝兇。本刊記者致電詢問事件原因，佢老哥不脫牙擦本色，氣定神閒講：「我從來冇佔人便宜，唔會貪人哋嘅嘢，唔係自己嘅就唔會貪，但點都好，我完全冇驚過！」
出事之後，發叔（劉皇發）曾爆他「衰多口」惹禍，詹培忠冇正面回應，表示自己退選立法會是想過低調生活，「今次又做新聞主角，可能係命中注定我唔可以咁啦！」
問及傷勢如何，他說當日睇過醫生，照咗傷口，之後就冇再覆診，「呢啲係小事啫，唔使再睇，自己會消腫啦。」
詹培忠大半年前打幹細胞整靚塊面，變得皮光肉滑，今次被兇徒打成豬頭炳，當然心痛。
詹培忠行走江湖乜都冇有怕，今次最慘係塊面被打腫，因為據八卦友爆料，他大半年前搵過一位香港名醫抽肚腩脂肪分解幹細胞打入面部，經過一個療程，斑同皺紋冇晒，變得皮光肉滑，回復中年狀態，靚仔咗好多，成為朋友圈中佳話。今次靚仔樣變豬頭炳，佢老哥一定唔開心，幸好只是皮外傷，消腫後應可回復原狀。
八卦友講，詹培忠見這種技術咁神奇，即刻動起生意腦筋，籌劃去外國及內地引入注射幹細胞的科技美容，自己都去過實地考察過，因不少闊阿太同富豪都想青春長駐，這門生意實發無疑。可惜搞搞吓爆出一單DR事件，公眾對醫學美容信心減低，老詹惟有暫時停一停步，等風波平息再去馬。
全站熱搜
留言列表
