忙完拍劇，郭羨妮又要照顧剛做完手術的老公，仲要湊女；上週四，她與母親到東港城買 BB用品。
探熱針
老公割膽石停工 擔家郭羨妮接內地劇
38歲的郭羨妮，與年輕六年、內地武指朱少杰的 B女 Kylie，不經不覺已半歲大，拍完無綫劇《初五啟市錄》，依然不能鬆一口氣，因為老公朱少杰生膽石，日前回港做手術，現正停工休息。要照顧女兒，又要照顧老公，擔起頭家的她為了賺多啲，寧願推掉與兩大視帝陳豪、黎耀祥合作新劇，鐵定返大陸搵奶粉錢。
日前郭羨妮上載女兒的新相，伸脷的 Kylie Q爆。
買 B女用的用品，郭羨妮仔細研究清楚。
公私兩忙
只得三十二歲的朱少杰，今個月中因膽石來港入院做手術。
今年五月，誕下囡囡 Kylie三個月，郭羨妮極速收身返 TVB拍新劇《初五啟市錄》，直至近日，劇集完工。「 Sonija同無綫仲有一年合約未完，佢見自己生完狀態回復得好快，所以先咁快接劇還債。而家有咗個女，佢乜都係幫個女嘅未來計劃，想趁有機會，賺多啲。」郭羨妮身邊人說。
忙完公事，又到私事。夾啱時間，老公朱少杰返港入院，接受割膽石手術。「之前開開吓工，小朱個肚痛得好犀利，入咗醫院一日，經檢查證實係生膽石，醫生建議開刀，小朱於是請假返香港，香港嘅醫院設備始終好啲， Sonija想老公落香港做手術，方便照顧。」
唔妥女婿
愛情至上的郭羨妮，兩年前拍內地劇《宮鎖心玉》，與負責劇中動作的武指朱少杰撻着，即使男方較她年輕六年，又沒有家底，在內地無車無樓，但她依然勇往直前，拍拖不夠一年便閃婚。
「小朱經常要喺內地開工，大部分時間都唔喺香港， Sonija生完之後，小朱都唔多時間喺佢身邊， Sonija開劇嗰段日子， Kylie都係由 Sonija媽咪照顧。」見女兒要擔起頭家，郭母對女婿朱少杰始終有微言。今年五月，郭羨妮在法國醫院產女，埋單十多萬使費由自己俾，郭母嬲到當街指罵女婿。
「 Sonija好支持佢老公，有時都會叫媽咪唔好講咁多，怕小朱唔開心！」知情者說。
老公經常在內地，要開工的郭羨妮，女兒交由郭母照顧。
半歲大的 Kylie伏在媽咪身上，全程無扭計，超乖！
因為掛住囡囡，開工途中連人帶妝返清水灣半島寓所睇女。
產後不足四個月，郭羨妮已完全收身復工拍無綫新劇。
扮放假推劇
今年五月，朱少杰陪郭母到醫院探老婆，離開時被外母當街指住話。
花旦買少見少，《初五啟市錄》後，無綫游說郭羨妮再接劇，更出動兩大視帝陳豪、黎耀祥與她合作《傳愛事務所》，但她依然不為所動，決意辭演。「 Sonija唔想得失無綫，同外面講話想放假休息，其實呢排佢已經喺內地放聲氣，話有啱角色就搵佢開工；又係嘅， Sonija拍內地劇收六萬一集，比起佢喺 TVB一萬一集，差天共地。心態唔同咗，又唔係爭獎，一定係搵錢行先！」知情者說。
都市病
根據統計，每十個香港人有一個有膽結石，膽石病徵不明顯，因會引起胃痛、腹絞痛，故很易會與胃病混淆。
消化道外科醫生表示：「膽石嘅主要成因可能同飲食有關，食得太多肥膩油炸食物，令膽囊負荷唔到，無法適量分泌出膽汁幫助消化，膽汁會逐漸結成石仔，輕則導致腹痛，重則會阻塞膽囊，引致發炎或併發症，嚴重嘅可能要切膽。」
情況可以的話，醫生會主張病人採用微創手術切除膽石，切口約一厘米大，創傷性較低，一般留院一至兩天，約一星期便可復元。 
留言列表
