球圈全部係男人，難免聽到難聽說話，「我十七、八歲時啲人簡直係睇死我，最難聽係：『一個 𡃁妹做得啲乜吖！』所以我更加要做好啲！」
新女上場
傑志班主女伍怡欣 波牛阿四
朋友是本地球迷，我問他知道伍怡欣是誰嗎？他說知道。曾幾何時我都看本地足球，不過已經是南華的山度士、鄭兆聰的年代。去年跟剛剛獲得「香港足球先生」的盧比度做訪問，有個女子在幫他拿衣服、幫他點餐，她沒有說明自己身份，我順理成章以為是球隊派來的助手。
約傑志班主女兒伍怡欣做訪問，一直是電話聯絡，到拍攝見面時才知道原來當天在盧比度身邊執頭執尾的「阿四」，原來就是班主女，伍怡欣說：「我係打雜咋，乜都要做，我係廉價勞工。」
童工
大部分的太子爺、太子女都有一個「通病」，要在家族公司工作，不靠父母蔭，由低做起。那麼是哪種「低」，究竟有多低？傑志足球隊班主伍健的女兒伍怡欣就由阿四做起：幫球員拿衣服、安排訪問等，「總之係一個打雜，乜都要做。」十四、五歲在球隊幫手時，更加沒有人工，「嗰陣時係義務性質，如果唔係會俾人告㗎嘛。到○七年搞巴塞嚟香港踢波嗰陣時就有人工，第一次收人工不知幾開心呀！不過我都係廉價勞工，冇記錯好似係七千幾，好彩嗰陣時冇咩最低工資，如果唔係告咗佢啦，哈哈哈！」
○七年邀請西班牙甲組勁旅來港比賽，可以說是她最難忘的一項工作，為了足球、為了巴塞，她放棄會考，「嘩！一諗到巴塞喎！成世人真係可能真係得一次！會考，衰啲講句，我仲可以重考。我一路考試一路望住個鐘，心諗：『差唔多夠鐘去開會啦喎……』考到咁上下就交卷，我仲要係第一個交卷。」結果，會考衰咗，不能升回原校聖保祿中學，放榜日亦是巴塞來港的日子，拿了成績單後，便跑去機場接機。「我七點幾返去攞成績，之後我唔係走去搵學校、唔係走去話俾阿爸阿媽聽，而係搭車返屋企換番套 suit，跟住之後去機場接機，哈哈哈！」
今年五月，傑志在將軍澳運動場奪得聯賽冠軍。
伍怡欣和卅三歲的哥哥伍怡彬（右）幫父親伍健（中）打理球隊。
伍怡欣樣子甜美，曾有娛樂公司找她唱歌拍戲，「睇吓做乜啦，但呢段時間我都係想留番喺傑志，我哋啱啱攞到塊地，會興建傑志中心，我想一手一腳做好呢樣嘢，希望一三、一四年會起好。」
七月時的歐國盃，伍怡欣及林敏驄（下）為新城的睇波騷擔任嘉賓。
緋聞男友
身為班主女，伍怡欣壓力甚大，不可以行差踏錯，「壓力係自己俾自己，我係好驚人哋點睇，我會係覺得，我某程度上都背負住傑志、背負住爹哋個名，我係好驚㗎，成日都會話俾自己聽絕對唔可以衰，樣樣嘢要好謹慎， even自己言行舉止，不斷警惕自己。」但終日群住班波牛，難免傳出緋聞，盧均宜、陳文輝、盧比度、謝德謙都是她的緋聞男友，有時其他球隊的球員走過來跟她說話，之後又會傳緋聞，但其實當時真的有過球員暗戀她，但多年後才跟她表白。「啲男仔話：『其實幾年前都有啲感覺㗎……但係因為身份問題，所以就唔會啦，又會好多人講呀。』我聽完咪笑囉，哈哈哈，而家都係 keep住係 friend。」雖然父親沒有特別訓示她不可以跟球員拍拖，但緋聞傳出時，則略有暗示：「唔好咁近佢哋呀，驚俾人講，你小心呀，又俾人講呀。」
伍怡欣說對選男友的條件最重要是錫她，但足球員不在考慮範圍，因為她已有個拍拖三個多月的男朋友，每提到男友，伍怡欣都會忍不住甜笑，而且對男友有讚冇彈，「佢有樣好，佢對我好就當然啦，而且佢對我屋企人又好啦，同埋佢都好支持我哋足球圈嘅，有啲男仔唔係㗎嘛，女朋友喺男仔堆入面，勁唔想㗎嘛，不過佢都唔鍾意太 close，但係佢都明我係做嘢啫，同埋佢都係做 PR呢行，我驚過佢啦，大家咪鬥驚囉，哈哈。」
傑志的盧均宜（左）及盧比度（右）是伍怡欣的緋聞男友。
讀書時是中、英文的辯論隊成員，加上好動的性格，啱晒做「項目及公關經理」的職位。
互寸溝通
伍怡欣喜歡足球是因為父親，是從小耳濡目染，童年不少時光都在球場度過，她笑着說：「其實都幾可悲，我嘅童年都係圍繞住足球，逢星期六、日都會同爹哋媽咪出球場睇波。」最開心的童年生活都是跟足球有關，「九八世界盃去咗現場睇 final法國對巴西，我捧巴西，但我坐咗喺法國球迷中間，我戴住頂黃色嘅帽，哈哈，我阿哥同我一齊坐，佢問：『其實你覺唔覺得你會俾人打呀？』好搞笑。」
通常女兒跟母親的關係比較親密，但足球卻拉近伍怡欣跟父親伍健的距離，而他們的溝通方法是互寸，「好似拍拖，佢鍾意寸我，例如：『威啦你而家，唔使食甜品啦，你都甜啦。』有次記者問：『 Ken哥你好似好攰喎。』佢就會話：『唉，冇計啦，個女呢排又夜返，又要等門喎！跟住望一望我，咁我冇理由喺個記者面前話佢㗎嘛，哈哈哈，之後？我咪話：『點呀你？頭先講咩呀？好好玩呀！』」雖然經常俾父親寸，但伍怡欣卻甜在心頭。
一歲時與母親合照。
廿三歲的伍怡欣於加拿大英屬哥倫比亞大學心理學系畢業。
傑志邀請 AC米蘭來港，十四歲的伍欣怡與弟弟（右二）、 AC米蘭隊員舒夫真高（左）、馬甸尼（右）合照。
撰文：王健美
攝影：葉志明
化妝、髮型： Jerry Ash
場地： Times Champagne Bar and Restaurant
留言列表
