21歲李蘊雖然同前度劉謙掟煲 5個月，但勝在後生樣甜，大把市場， 2個月前已同 28歲高大靚仔的金融才俊羅章冠撻着，速食高富帥。《蘋果日報》圖片
21歲 𡃁星李蘊（ Renee）， 4個月前曾喊住宣布跟比她大 15年的台灣著名魔術師劉謙分手，有傳已玩厭李蘊的劉謙，已將溝女陣地轉移大陸，搭上 26歲內地模、「厲家菜第三代傳人」王希怡。
前度速食內地模有相斷正，李蘊亦唔執輸自爆有新歡。本刊收到可靠消息，指李蘊最近撻着年約 28歲、現於渣打銀行廣州分行中小企任理財業務主管的金融才俊羅章冠。 2人蜜運 2個月，新歡高富帥比劉謙高大後生靚仔，加上冇語言隔膜，李蘊好識揀！
自爆有新仔
識玩魔術氹女的劉謙當然不愁寂寞，最近就爆出他使出魔術手溝掂在中國內地極著名的「厲家菜」傳人，兼現年 26歲在大陸做模特兒的王希怡，早前 2人被影到於北京密會撐枱腳，女方更用名貴房車接載劉謙，飯後再由男方揸車一齊返歸過夜。
劉謙有新女，童顏歌星仔李蘊亦唔輸蝕，上週出席活動時，李蘊向記者自爆開始新戀情，還強調新仔是圈外人，保持低調。
據知李蘊的新男友叫羅章冠（ David），是廣東南海人，現約 28歲比李蘊大 7年，現於渣打銀行廣州分行任職理財業務主管，從事金融事業的 David大把前途，記者更從他的微博發現， David唔只身形高大，而且斯文靚仔，還熱愛運動，網球、高空跳傘、又坐熱氣球，在江西財經大學讀國際金融碩士的他常周遊列國，被朋友稱為「羅總、高富帥」。
人肉上廣州
消息指，李蘊與新仔 2個月前經朋友介紹認識，一拍即合，女方更常在朋友面前讚 David。「 Renee話 David好用心愛佢，好 care佢，兩個傾電話傾唔停，又狂發 sweet短訊， Renee好重視呢段情，每逢有空檔，即搭火車上廣州見男友，戀愛大過天。」知情人士透露。
秘戀金融才俊，記者上週六（ 17日）致電李蘊，她就扮傻默認：「你點知㗎？其實佢（ David）係我一個好好嘅朋友，人哋係圈外人好低調，你哋唔好搞佢啦。」雖說只是好朋友，但李蘊笑住讚 David：「佢（ David）人品好，仲做好多善事，好有善心㗎！」
本週一（ 19日），記者亦致電於渣打銀行廣州分行工作的 David，聽到記者問有關與李蘊拍拖一事， David先愕然幾秒，之後禮貌地用廣東話說：「唔好意思，工作以外嘅事我唔會講，我唔會回應㗎，唔好再打嚟騷擾我喇！拜拜！」
難得搵到個絕種好男人，李蘊睇實啲喇要！
留言列表
