一步入Zoey的家，最搶眼要數一個六呎高的金箔鞋櫃，把全屋映照得金光閃閃，加上整齊華美的水晶燈，看得人目眩心動。
女主人Zoey對一屋的酒店味甚為自豪：「間屋買番嚟嗰陣殘殘舊舊，要全部大翻新。老公好鍾意酒店式設計，而我就鍾意金色同新潮嘅嘢，所以你咪覺得似酒店囉。」設計連裝修費共60萬，足足花了9個月才完工，絕對是慢工出細貨。
迷你影院
Zoey愛睇戲、煲劇，所以花近十萬元在客廳打造了一個迷你影院。迷你影院包括55吋大電視及Bose立體聲音響，閒時兩公婆仲可以在這個小影院玩Wii。她說：「我哋兩個留喺房嘅時間比較多，雖然喺房瞓住睇戲會舒服啲，不過我就鍾意瞓喺廳度睇電視同煲碟。」 Zoey的睡房亦有部5.1聲道的40吋電視，最方便兩口子睇完劇就瞓。3百呎的睡房原來由兩間房打通而成，除了入牆衣櫃外，老公更要求設計師偷了睡房的窗台位置，為愛妻改建成一個化妝間。Zoey除了在此化妝外，閒時亦會修甲。Zoey說：「我對整指甲有研究，買咗啲整指甲嘅機器，最鍾意喺度整甲黐石，呢個位係我悠閒時常用。」
特搜檀木做廚櫃
開放式的廚房有黑色光面的抽氣扇及雪櫃，更採用檀木製的廚櫃，牆邊還有兩排窩釘點綴，又潮又classic。Zoey笑說：「成間屋嘅設計都係老公諗，廚櫃用的檀木，係老公特登叫師傅搵。」因為廚房個tone比較冷，所以原本的不銹鋼鋅盤，現改用雲石。不願出鏡的Dixon，對新屋設計俾咗唔少意見，他說：「我想間屋warm少少，所以用雲石鋅盤，雖然石的質地都係偏凍，但比起不誘鋼會warm啲。」Zoey話老公係煮飯公，最叻煮西餐，反而她甚少入廚，一星期最多都係煮一次公仔麵！老公有錢又肯做家務，難怪Zoey與他拍拖3個月就選定對方做老公。
「千金小姐」緋聞多
25歲的岑潔儀，06年因參加《美女廚房》中的美少女廚神爭霸戰而簽約無綫，有份參與《同事三分親》、《歲月風雲》、《兩妻時代》及《一擲千金》。不過Zoey最為人熟識的必定係與陶喆街頭啜嘴的緋聞，早前她亦力指被借醉的李思捷抽水摸pat。今年3月，Zoey與33歲馬來西亞華僑Dixon Chan結婚，最近更轉了新經理人公司「紅星會館」。 ####
梳化變圓牀
大廳除了是個迷你影院外，亦是客房， Zoey：「有時朋友會喺度過夜，拉開張梳化就變成一張圓牀，兩個人瞓都無問題。」而梳化旁的小木櫃，亦是一張可活動的小茶几，啱啱可以放兩大碗麵。
睡房由兩個房打通而成， 房內有多個六呎高的入牆櫃，而衣櫃地板、牆紙甚至窗簾都襯好晒色，Zoey說：「原本房嘅牆紙係黑白斑馬紋，中間帶有閃石，因為老公唔鍾意黑白色，所以就用咗啡啡哋。」
由窗枱改建而成嘅化妝間，啱晒Zoey，佢可以喺度坐足大半日研究指甲。
這個載咗唔少錢嘅魚缸， 亦係風水擺設之一，Zoey說：「師傅要我哋得閒擺啲錢落去，得閒又攞啲嚟用，話有出有入。」
因為Zoey經常忘記帶銷匙，Dixon特登為佢而設一個唔使用鎖匙開門嘅門鎖，夠晒體貼。
Zoey和老公Dixon早前在峇里影結婚相，可惜效果麻麻，Zoey表示今年會再影。
佢哋曾經為揀大廳嘅牆紙而嗌交，Zoey想要白色，Dixon就想揀cream色，最後Zoey都係聽老公話，揀咗cream色。
鞋櫃內放了過百對鞋，Zoey表示：「其實我搬入嚟之前，已經捐咗好多對鞋出去，依家嗰啲都係平常會着嘅，有高踭鞋、boots、波鞋同涼鞋。」
風水師指金色旺男主人家，Zoey亦鍾意金色，所以老公就用了金箔來造鞋櫃。為了有立體效果，設計師棄用平面圖案，以凹凸的三角形拼出型格，之後再鋪上金箔。
身處廚房的Zoey，背後黑色的抽氣扇採用傾斜設計，拉近了和爐頭的距離。
為免廚房牆紙單調，在吧枱旁邊至廚房的位置，特登加了兩排窩釘點綴。
設計師唔想個廚房感覺冷冰冰，所以用上雲石裝飾，亦唔用不銹鋼鋅盤，改用雲石鋅盤，前前後後整咗5次老公同Zoey先收貨。
Zoey夫婦平日將吧枱當飯枱，吧枱上方的水晶燈在尖沙嘴燈飾店買，價值萬多元，Zoey話：「鍾意盞燈好多水晶，光度可分強、中同微三種，不過盞燈好重，師傅要搵啲好實淨嘅料去裝。」
廁所的設計亦有酒店味道，實用而雅致。裝有冷暖氣功能的「浴室寶」（右圖），冬天可放暖氣，夏天可放冷氣。
洗手間設於睡房內，門口是一道半透明的金絲趟門。Zoey話：「呢道趟門睇落好似透明，但係又有好多金絲，好難整㗎！一塊玻璃要黐6至7張磨沙紙，要留意番個透明度有幾多。我哋試咗三次道門至OK。」
留言列表
