close
睇完當堂醒神晒！黃淑儀話佢開工一定必備阿仔呢張肌肉相，「有時開工開到攰攰哋，攞個仔張相出嚟睇吓，當堂醒神晒，勁過飲參茶呀！」
小特搜 藝人開工化妝品同零食可謂必備，不過一班身經百戰的資深演員，袋內的百寶真係千奇百怪！好似黃淑儀連髮捲都帶埋，真係估佢唔到！
黃淑儀肌男相傍身
目前趕拍新劇《巴不得媽媽》嘅黃淑儀，除了戲服之外，所有化妝品、電髮捲等都出動私伙。「咁私伙嘢用得放心啲嘛，不過我最勁嘅私伙嘢係呢個呀！」佢立即從化妝袋內摷出一張肌男相：「係我個仔德政呀！靚唔靚仔呀？」又真係嗒得杯落。
羅樂林藥不離袋
歷史性喺電視一日死六次嘅羅樂林，啱啱先拍完《雷霆掃毒》。家陣69歲嘅佢，喺《雷》劇都有些少動作場面，所以要帶定喜療妥傍身。
關禮傑孖裝鬚刨
喺《金枝慾孽2》扮花旦嘅關禮傑，開工必帶兩個鬚刨，一個剃鬚，一個剃頭。
計時休息黃淑儀的雜物袋有個電子計時器，「導演話休息五分鐘，我咪即刻計時囉！」好有時間觀念！
私家髮捲黃淑儀頭上嘅電髮捲有大有細，佢仲自備插頭，「化妝間有時人多起上嚟，連用髮捲都要排隊呀！自備方便得多！」
私伙扮靚黃淑儀私伙化妝品唔多，但胭脂掃就大中細碼都齊備，「化妝掃就好似內衣褲，私伙穩陣啲！」
風褸護身羅樂林每日帶防水公事包開工，袋中仲帶定防水風褸，「呢件風褸可以當外套兼雨褸。」
救命三寶羅樂林：「一定帶定喜療妥同潤膚膏，有乜碰撞可以即時搽。喺太陽下拍外景，對眼會乾，滴咗眼藥水好啲！」
日日削髮
關禮傑話：「其實剃光晒個頭會食唔住個頭套㗎，一定要有少少頭髮至得！所以我一定自備兩個電鬚刨，白色兩頭嘅用嚟剃頭，黑色三頭用嚟剃鬚，一定唔會搞錯啦！」聽講佢為咗keep住超短髮，仲要日日剪髮。
全站熱搜
留言列表
