今年尖面高鼻
今年4月黃婉曼現身金像獎頒獎禮，艷壓群芳的她，下巴突然變尖，鼻樑亦變得又高又直咗。《蘋果日報》圖片
黃婉曼由講天氣到跳入娛樂圈，不惜拋出32F身材及4吋事業線，為事業搏到盡。歐洲國家盃今周開鑼，有份做主持的黃婉曼，最近被踢爆大執樣，將自己的搵食工具「變靚啲」，豬膽鼻變間尺鼻外，包包臉亦變刀削面。
被傳整容的黃婉曼，近日下巴變尖之餘更驚現「歪面」危機，似足之前變臉失敗嘅楊秀惠，女神地位隨時失守。
新移民模範的黃婉曼，為了出人頭地，向來拼搏，在2010年世界盃被張國強食豆腐，之後拍《撳錢》又爆粗，出位招數多多。為前途，黃婉曼走紅後速撇拍拖兩年電視台攝影師男友，之後與拍檔洪永城傳緋聞，近日又被爆戀上會計師。
事業愛情逐級跳，連樣貌都來個大躍進，近日黃婉曼出席活動時，驚現刀削面及間尺鼻。當記者讚她「靚咗」，她一輪嘴解釋：「我每個星期去做兩次facial，喺屋企又敷mask，好勤力㗎。（做facial可以尖臉？）我之前去歐洲做嘢，三個禮拜瘦咗成個碼，面都瘦埋。」
記者還未問她圓臉變刀削臉，黃婉曼已經煞有介事話：「朋友都話我塊臉尖咗好多，我就唔想太尖。（突然變尖臉唔怕被指整容？）我其實好努力變瘦，去美容院做辣椒瘦臉都做咗幾年！我由做新聞台時已去做。（嗰時未臉尖喎？）另外有間美容院贊助我做埋淋巴瘦臉，做完就真係work，所以我去得好密，一星期去兩次。（咁你咪好忙做facial同瘦臉？）冇辦法啦，我雖然唔係靚女，但上得鏡就要對得住觀眾。」
06年面肥低鼻
黃婉曼攝於中文大學的畢業照，當時扁鼻、包包面、圓下巴、單眼皮，樣貌和現時相距甚遠。
楊秀惠贈興︰下巴靚就俾人話整容
其實楊秀惠都試過歪下巴，更因而被前男友孫耀威揶揄她「打平針」出事。對於黃婉曼及自己都有同一遭遇，楊秀惠邊為自己辯護，邊玩暗寸：「以前我仲有baby fat，依家瘦咗好多，個下巴靚就俾人話整容㗎啦！對於人哋有冇整容，我就唔回應喇！」
直認以前樣衰
對於入行前與現在樣貌相差甚遠，黃婉曼直認：「以前真係好樣衰，依家我有學化妝，識得點將自己化得靚啲。（你個鼻同以前都好大分別。）因為我每次都叫化妝師打多啲鼻影，望落高啲！（接唔接受整容？）以前我接受唔到，但依家覺得都OK。邊個唔想keep住靚樣吖，但現階段唔會整，靠自己努力先，到努力都冇用嘅時候，我會考慮吓！」不過鬼拍後尾枕，黃婉曼曾向傳媒自爆，話問過醫生自己有冇需要整高個鼻，但醫生話佢冇需要。咁佢即係間接承認有見過整容醫生同考慮整容。邊句真邊句假，大家話嘞！
手勢唔好下巴會歪
將黃婉曼入行前的舊照，跟近日的相片對照，專業醫學美容中心Dr Reborn發言人陳小姐表示：「佢塊臉變尖，應該係用咗醫學美容最普遍嘅botox瘦臉，鼻樑明顯變直變高，可以用『透明質酸高鼻』或『假體高鼻』方法去完成。佢雙眼皮都有唔同咗，有機會係為雙眼皮做過勾線手術，令雙眼皮變得更自然更靚。至於下巴少少歪，因為人本身好難有百分百對稱嘅下巴，如果劑量控制得唔好會影響效果。」
11年2月未變靚
去年黃婉曼雙眼已經比讀大學時大咗好多，但鼻同下巴跟06年比仍是相差不遠，臉龐仲係好好肉地。
變高啲
呢個角度睇，黃婉曼不但下巴變尖啲，而且鼻樑高又直，好似用間尺間出來一樣，五官仲有啲硬膠feel。
張國強︰佢本身都係靚女
曾讚黃婉曼好波的張國強，回應黃婉曼「變靚啲」時，就顯得有點避忌：「自從2010年世界盃合作過就冇再見過佢，唔清楚個樣有冇唔同，佢本身都係靚女嚟！」
上位多是非女神登基
09年，黃婉曼成為《晚間天氣報告》主持，一句「我哋依家跳出香港」，令她成為天氣女神。10年5月，她私自接品牌宣傳騷，惹來無綫新聞部高層不滿，最後無奈辭職。
遭性騷擾
10年6月，黃婉曼被體育組邀請，重返無綫主持世界盃。節目中，張國強一句：「佢有波有天氣有分析……」頓時令黃婉曼人氣更盛。
疑似爆粗
去年2月，主持《撳錢》時黃婉曼被取笑戀上拍檔洪永城，她衝口而出回應「×你！」但她解釋當時只是說「點呢？」，並冇爆粗，但人氣再升。《撳錢》今年易名為《撳快錢》，黃婉曼冧莊主持。
初拍劇集
今年黃婉曼在港台短劇《識法保積金》中，飾演積金局督察，黃婉曼踢爆飾演老闆娘的麥玲玲冇為員工供強積金，表現搶鏡。 ####
留言列表
