丁子高對千嬅佗仔十分緊張，開刀生仔都要搵玄學家計過，不過最終人算不如天算。
38歲的楊千嬅，周二（5日）剖腹誕下7.6磅B仔，成功為丁家添巨丁Torres。為了谷肥囝囝，千嬅臨盆前不停喪食，不知不覺下， 體重已急升至160磅，間接令巨B搶閘出世。
其實千嬅一早聽從玄學家意見，擇定超級吉時，下午五時開刀，希望Torres有「毛澤東」奇人命格，但奈何Torres等唔切提早於一時誕生，令千嬅感無奈。
嫲嫲有份改名
RMB其實只是乳名，原來囝囝未出世，丁子高已為他改定英文名Torres。知情人士說：「丁生不嬲都想個仔嘅英文名係T字頭，話簽名型啲。於是佢就用咗西班牙常用嘅姓氏Torres做英文名，有偉人同巨塔嘅意思，話希望個仔未來嘅成就可以超越好多人。」周三（6日），千嬅所屬的經理人公司東亞發言人說：「BB已改名叫Torres，同車路士球星費托同姓氏，係丁子高同丁媽媽一齊改。」
擇時辰開刀
為了Torres嘅將來，千嬅產前已聯同丁子高， 透過相熟經紀開定基金戶口， 計劃每月供大約萬五元教學基金，讓Torres長大後已有一筆數百萬的儲蓄，作為日後讀大學的開支。
除此之外，原來二人十分迷信。據知千嬅佗仔第五個月，丁生丁太兩公婆便搵玄學家擇咗一個最佳時辰開刀，讓腹中塊肉以「奇格」面世。「千嬅預產期喺六月中，佢師傅揀定咗六月五號黃昏五點鐘，話嗰個時辰係毛澤東命，有權勢亦有榮華富貴，屬於最高命格。」不過命水整定，千嬅當日上午便開始腹痛，搞到千嬅要急call醫生，一點鐘就要入手術室開刀，「千嬅冇唔開心，話呢啲嘢始終係緣份，B仔搶閘都冇辦法。」
不單開刀要擇日，即使BB房都搵師傅睇過。知情人士說：「原本BB房一早裝修好晒㗎喇，但後尾師傅睇過，話BB房牀頭位係喺病宮位，部分位置要改動。」不過當時千嬅還佗住八個月巨肚，屋企實在不宜裝修，「所以咪等千嬅入院生仔嗰一個禮拜，俾雙倍人工叫裝修師傅開行Turbo搞掂。」
千嬅預定下周一出院，但產後首日，她已率先餵人奶。東亞發言人說：「千嬅嘅傷口逐漸康復，但仲未落得牀。佢已經開始嘗試餵人奶，試咗20分鐘，唔知BB有冇啜到，不過佢會繼續餵。」千嬅亦一早替Torres的奶粉入定貨，揀選了陳慧琳的小龍包平日飲用的奶粉。
吊葡萄糖水
據知剛履行人生任務的千嬅，身體其實還未復元。一名曾探望過千嬅的友人就透露她現時還需吊葡萄糖水，「佢身體好倦，精神唔係幾好，手腕仲插住喉管，吊緊葡萄糖水吸收營養，不過佢好多謝有咁多親友關心佢。」千嬅為了腹中塊肉肥肥白白，作出不少犧牲，曾試過一日進食五餐， 餐與餐之間更夾雜蔘茸燕窩，令體重高達160磅。不少纖體公司紛紛出天價打千嬅主意，希望邀請她拍攝產後瘦身廣告。不過一向奉行健康減肥法的千嬅，卻放棄銀機會，寧願坐月期間，跟從營養師提供的坐月瘦身餐單， 務求減少吸收熱量。知情人士說：「千嬅希望生完之後，喺飲食方面盡量做到均衡啲。所以佢唔會學其他大肚婆咁生完不停進補，仲話坐月嗰陣會做適量嘅腹部同腰部運動，希望啲肉盡快firm啲。」
暫緩追女大計
千嬅減肥要減得咁急， 全因她8月中就要復出， 首先接拍一個護膚品和手錶廣告，之後要極速炮製新碟，還計劃年底接拍彭浩翔新戲， 難怪她心急以最佳狀態示人。由於千嬅工作表排到明年，所以她和丁子高的追女計劃，只好暫緩至另行通知。「千嬅好鍾意女，不過生B真係講緣份， 所以佢同丁生協議要唞下先。佢仲話自己唔係生仔機器！」知情人士說。
千嬅囝囝表演慾強
丁家慈姑椗Torres在周二（5日）面世，比原定早了兩個時辰。堪輿學家譚雲龍師傅說：「6月5日係丁酉日，係天月貴人、日貴格，日子係好靚，不過下午1點半至3點未時出世就唔係最靚嘅時辰，如果黃昏5至7點酉時就最靚，係毛澤東命，一出世已經高人一等。」 有機做童星 Torres丁酉日未時出世，命格有十靈文昌，讀書叻，本命係紅艷天喜星旺桃花，命宮隨和、樂於替人排憂，佢有藝術天份、表演慾強，有娛樂圈命。不過佢有雙重性格，會有多愁善感嘅一面。健康方面就要注意牙齒同腸胃，佢好細個就鍾意咬人。1歲就起運，打後都唔差，11歲前都有好多機會拍廣告，將來名大於利。」 Torres雖然並非於最靚時辰出世，但譚師傅指改名亦有助提升命格，「佢喺夏天出世，改名最好有水同金，忌用火字，可以選用浩、濼或汛；金字可用銘、釗等。」
25萬生仔
迎接小生命來臨，千嬅與丁子高非常緊張，單是入院生仔，埋單便要25萬。千嬅找來婦科名醫、縫針手勢好見稱的陳方安生堂妹方幸生接生。而千嬅今次入住的是山頂港安醫院的明珠套房，該房屬超級貴賓級別，採用酒店式、全自動設計，極盡豪華。房內除了基本設備，更設有待產期間享用的按摩浴池、私人電子煮食設施等，猶如五星級酒店的總統套房。 住房 $81,000 剖腹手術費 $50,000 育嬰室費 $5,000 胎兒監檢、護理 $27,880 分娩前後檢查 $52,000 基本藥物及其他雜費 $36,100 共$251,980
坐月瘦身餐單
據知千嬅希望可以在坐月期間，一邊補身一邊瘦身，所以她接納營養師建議，跟足餐單進食外，每天更飲用大量紅莓汁，有助子宮保健及降脂補血。 早餐脫脂奶一杯脫脂芝士兩片五穀麵包一片雞蛋一隻 午餐白飯一碗雞肉四安士炒菜一碟豆腐魚湯 晚餐焗牛肉/雞扒三百克薯仔一個焗雜菜一碟鮮奶蛋白布甸木瓜半個
同日谷新歌
千嬅佗仔期間，原來秘密到錄音室錄新歌〈親〉，所屬的華星唱片公司於她生仔同日，將新歌派上電台。歌詞由千嬅老死林夕填寫，講述三代親情。千嬅的fans亦為了恭賀偶像，特登自製MV。MV中除了千嬅大肚相、還有她為Torres準備的玩具公仔，感覺溫馨，隨即被網民瘋傳。
〈親〉歌詞節錄
能親過親切朋友夜半講心事
還親暱得似情侶偶爾親多幾次
無論有幾似大個人親的仍然像孩子
需要便抱一下不怕不好意思
微博洗版
初為人父的丁子高，情緒高漲到極點，急不及待於微博報喜。不少圈中好友於微博洗版式恭賀，熱爆全城。 ####
周二（5日）中午，丁子高於微博報喜，更第一時間將B仔改名為RMB（下圖）。但記者周三（6日）早上，發現丁子高好友已率先在微博踢爆B仔英文真名Torres，寓意偉人。
其實Torres是西班牙文，是西班牙球星費托的姓氏，意解巨塔和偉人。
千嬅生仔消息一出，大批記者隨即趕到港安醫院，而丁子高亦安排工作人員送橙和水俾記者，非常識做。
親家輪流探 公公大讚
本周三（6日），千嬅父母與外婆到港安醫院探望女兒及孫仔，離去時，他們笑容滿面，更連聲說多謝，千嬅媽並大讚孫仔眼大大，同爹哋媽咪都似。
嫲嫲封口
丁媽媽一連兩日也一早到醫院探新抱和孫仔，留到夜一夜先捨得離去。不過記者不停問她關於千嬅的身體情況，她就封口唔答。當晚她還帶了湯水俾千嬅飲。
懷胎3個月的千嬅，曾到海味舖狂掃兩車花膠進補，難怪她可以谷到百六磅。《壹週刊》圖片
臨盆前喪食本刊上月中拍得千嬅相約老死到四季酒店high tea，其間她飽到頂肚，但繼續喪食。
千嬅收到林夕的歌詞後，立即聯絡製作人于逸堯趕快錄音炮製新歌，更和唱片公司夾定於生仔同日派台。
千嬅fans十分有心思，將千嬅幾張舊照，加了其他畫面拼湊一個臨時MV。
留言列表
