close
上個禮拜四晚，鄭伊健蒙嘉慧十指緊扣返港，仲差畫龜嘅麵嫂笑到見牙唔見眼，好冧！
同你吟一吟
鄭伊健要擺和頭酒
同蒙嘉慧靜雞雞喺日本結婚嘅鄭伊健，身邊老友記陳小春肥 Wilson一律冇份去飲。為咗保密，為咗少啲人知，娶老婆搞到得罪朋友。
上個禮拜六（二月二日），新郎哥同就快做爸爸嘅陳小春，兩兄弟去咗澳門做活動，伊健認晒矮仔，話會安排同班兄弟食飯補數，至於响香港排期註冊，伊健堅持立場話簽字當日唔會大搞，亦唔肯講會唔會請朋友到場觀禮。
記者咬住唔放，伊健索性搬小春做擋箭牌，叫佢將來生仔改名做陳浩南。之後記者提到吳君如話唔介意傳授生仔心得同健康餐單俾蒙嘉慧，圈中好友起哄叫伊健有仔趁早生，伊健聽到馬上有反應：「我哋兩個不知幾健康，唔使咩健康餐單，要生隨時都生得。」哦！莫非你已經搞掂咗！
飛去日本靜雞雞擺酒，伊健話返到香港會請兄弟食飯賠罪。
冇份去飲嘅小春，同伊健一齊去澳門做活動，兩兄弟玩遊戲仲攞埋總冠軍。
活動當日仲有坐完月復工嘅朱茵，佢話生完之後減咗十七磅，雖然身形未打回原形，但一對愛美神飛彈依然有睇頭。
全站熱搜
留言列表
