城中有錢又靚仔的富二代，近年買少見少，餘下的未婚鑽石男，無不被一眾剩女宅女虎視眈眈。一班十多廿歲的新一代筍盤，女友更加換完一個又一個，戀情夠晒精采。

近日，賭王何鴻燊四房兒子何猷君，出席除夕Ball時向女伴送goodbye kiss，又被指與同在英國讀書的Alex H.拍拖，瞬即成為焦點「筍盤」。

上周三（四日），猷君離港返回英國升學前，接受本刊的獨家訪問。他否認Alex H.是其女友，但承認有一個西班牙、中國、威爾斯籍的混血初戀女友，二人同在英國留學，拍拖個多星期，四太已經過目。

本月十二日才滿十七歲的他，笑言被不少朋友稱讚貌似林峯，更常有女仔主動追求他。問他受女仔歡迎的原因，他哈哈笑說：「爸爸講嘢叻，我把口都夠甜！」

賭王四房子女日漸長大，剛踏入十七歲的猷君亦情竇初開追女仔。

十六歲初戀

「數學天才」何猷君是賭王四房的新星，本周（十二日）才剛滿十七歲、生得高大又靚仔的他，近日被指五日密會三名混血女，因而成為富二代的風頭躉。

上周三（四日），猷君離港返英讀書前，接受本刊獨家訪問，聲言自己並不花弗，又澄清除夕ball的女伴和大件頭外籍妹Alex H.，皆不是其女友。他解釋與女伴goodbye kiss，及在facebook向Alex H.留言「love you」，純粹出於禮貌。

何猷君風趣幽默，身邊女友人多不勝數，於派對上更攬住他唔放，但他特別鍾情混血美女。

「我喺英國讀書o架嘛！這是好西洋化的事。講love you、thank you 、love you so much、同用中文講『我愛你』唔同意思，其實是一件好casual的事。好似我同男仔講：『唔該晒，love you man！』唔通我變咗基佬咩？（喺球場同Alex H.互攬咁親密？） 佢係我best friend嚟o架嘛！」

他聲言Alex H.不是他杯茶，「我有女朋友o架！你覺得我似邊個？ 好多人話我似林峯，我點會同呢個（Alex H.拍拖）呢？」

他更自爆已有一名混血初戀女友，剛拍拖個多星期。「以前媽咪（四太梁安琪）唔係好畀我拍拖，媽咪同家姐（超盈）都見過我女朋友，媽咪話佢好斯文，阿哥（猷亨）就未見過佢！我同女朋友識咗好耐，今次返香港放聖誕假先開始拍拖。」

猷君愈大愈靚仔，在英國甚受女同學歡迎，不時有女仔投懷送抱主動出擊。

送花送波板糖

為追求初戀女友，少爺仔猷君費盡心思出冧招，「最浪漫係追佢嗰陣，半夜特登買了一支好長、紅色的玫瑰花放喺佢屋企門口，寫咗to佢個名，跟住佢第二朝起身見到就……嘩！好驚喜！我又試過趁佢唔開心時，送過一支黃色笑哈哈波板糖畀佢。」

如此浪漫，難怪他直言不會在球場上追女仔，「我點會咁唔浪漫，踢波時追女仔。我同女朋友會沙灘漫步o架。」

初次拍拖，問猷君與女友有冇親密行為？他怕羞說：「拍咗一個禮拜啫，唔係做到好多嘢！」有否親嘴和拖手？「……都有嘅。」

猷君為保護女友，堅拒透露女友姓名，但就直言與女友同在英國讀書，「大家在同一區讀書，在英國坐火車好方便，放假都會行吓街。」

何猷君在facebook上載與女友Alex H.面貼面合照，加上Alex H.留言：love you，令人誤會二人是情侶關係。