娛頭
絕交半年 胡杏兒認有仔溝 黃宗澤橫店包兩女示威
與黃宗澤拍拖八年，主動斬斷情絲的胡杏兒，最近公開承認身邊有出現追求者，原來唔只一個，除了有她口中所指的圈外人外，還有與她合作內地劇《紅酒俏佳人》男主角茅子俊，同樣都大獻殷勤，戲裡戲外，經常出雙入對。
至於過氣前度黃宗澤，則依然故我，繼續食散餐，同樣在大陸拍劇的他，同時間包起兩女，起雙飛服侍，明向胡杏兒示威。回復自由身，黃宗澤無王管，當眾調戲女演員亦唔使避忌惹來閒言閒語，風流快活攞正牌。
胡杏兒被大陸演員茅子俊大獻殷勤，無論戲裡戲外都形影不離。
避之則吉
去年七月，黃宗澤與胡杏兒正式宣布分手，從此再見不是朋友，過去半年來，完全斷絕來往，即使在電視城開工碰到，又或者同場出席台慶頒獎禮，都視如陌路人，零交流。主動撇清關係的胡杏兒，更加急住搬竇避開對方，連撞口撞面都唔願。
分手後，黃宗澤執鄭嘉穎二攤，去年十二月到橫店拍攝內地劇《少年神探狄仁杰》，偷食搞到俾女飛，導致形象插水的他，為挽救形象，終日扮成情痴可憐蟲；但人在內地，立即回復真我，除去慘爆面具。
在大陸開工，黃宗澤都會請助手，月薪三千蚊請女不請男，揀人要求條件是樣貌身材都要入得眼，年紀絕對唔可以大，經驗無拘。但今次黃宗澤決定做大爺，豪氣一次過包兩件起雙飛，全天候貼身服侍他。
之前包開一條女，今次黃宗澤包起兩件，全天候服侍他。
一齊返房
為了方便隨傳隨到，黃宗澤貼錢租酒店俾助手住，每晚收工一齊返酒店。
貼頭開餐
放飯時，黃宗澤同助手頭貼頭一齊開餐。
興奮撩女
對住劇中嘅女演員，黃宗澤當然唔放過，排戲時不停調戲對方，又攞包煙出來撩對方玩。
兩年前陳小琳以 fans身份去見黃宗澤，化晒妝的她即被黃睇中，每月用三千蚊包起對方做助手。
大送波餅
黃宗澤請大陸女助手向來有眼光。一一年，他與胡杏兒一同合作《跑馬場》時，原本是他 fans的陳小琳，便自動送上門，而黃宗澤亦貪對方二十歲夠嫩口，加上身材豐滿又主動，即請！
「當年杏兒都好唔鍾意 Bosco請呢個女仔（陳小琳），覺得佢好姣，成日借啲意送波餅，不過 Bosco點都唔肯換，之後每次返親大陸，都一定會 call小琳去服侍佢，仲每次都貼埋錢，幫個助手租埋住同佢同一間酒店，方便一有需要，小琳隨傳隨到。」黃宗澤身邊人說。
肉緊採礦
黃宗澤在大庭廣眾下，公然撩鼻屎，仲要愈撩愈肉緊，搞到面形扭曲。
煙癮極大的黃宗澤，每拍完一個鏡頭都會扯煙。
自從爆出分手後，黃宗澤每次見記者都裝出一副慘樣，但去到橫店唔使見記者又多女陪，即刻成個生猛晒。
頻頻見
傳黃宗澤拍《好心作怪》撩周麗淇散餐，他們更被影到分別在上海（右）及香港都有約埋食飯。
去年 7月同胡杏兒分手的黃宗澤，在上海拍劇期間已經被影到同小琳一齊去 shopping。
開工搞女
有女助手全套服侍，口技一流兼鍾意撩女的黃宗澤，冇正印包袱，更加肆無忌憚。現場所見，無女不歡的他，只要是同女演員做對手戲，便呈現興奮，十分風騷。有場戲他與飾演宮女的內地女演員做對手戲，排戲期間，黃宗澤又出招，讚對方靚女可愛，哄埋身講笑話，又攞包煙出嚟問對方食唔食，令對方失晒魂。
黃宗澤攞正牌風流快活！胡杏兒亦逐漸脫離男友偷食的陰影，試圖重新開始，投入拍拖。
正在深圳拍攝大陸劇《紅酒俏佳人》的她，更春風滿面承認有人追。「呢個階段都算有人追，不過只係觀察期，對方係圈外人，係朋友階段。（有無約你過情人節？）唔會咁快啦，仲係普通朋友，我都唔會主動約佢，女仔要有矜持。」胡杏兒說。
追上深圳
據知，胡杏兒雖然主動同黃宗澤斬纜，但感情並非一時間可以完全放下，分手以後，過去半年胡杏兒都避席朋友飯局，對身邊朋友介紹男仔，更加全部落閘。
「直到聖誕節嗰排，杏兒先肯出番嚟見吓啲 friend，就喺嗰段時間識到呢個圈外人，個男仔外國返嚟嘅，同杏兒都幾啱傾；對方一開始已經好主動，約杏兒單獨出街，又專登追到上深圳。杏兒對佢印象唔錯，應該有發展機會。」胡杏兒身邊人說。
上星期胡杏兒同茅子俊拍攝一場結婚戲，兩人十分合拍。
穿着低胸婚紗的胡杏兒，罕有露出三吋事業線。
休息期間，他們一把遮兩份用。
內地小生茅子俊有一身胸肌，雖然比胡杏兒細六年，但依然夠膽追她。
胡杏兒身邊的親友，怕她情傷未好番，間中都會聚會，順便介紹男仔給她認識。
去年尾在台慶頒獎禮上，兩人分手後首次公開同場，不過兩人零接觸。
等埋收工
搣甩前度後，胡杏兒身邊其實出現過不少裙下臣，去年拍《金玉滿堂》，便有傳「台視一哥」黃少祺力追，最近拍《紅酒》，劇中男主角茅子俊同樣向她大獻殷勤。茅子俊雖然只得廿七歲，同三十三歲胡杏兒相差六年，但二人出奇啱 key。
「杏兒大部分對手戲都係同（茅）子俊一齊，相處時間多，等埋位冇嘢做，子俊就會話想學廣東話，乘機撩杏兒傾偈，氹佢開心；每次食飯又主動坐埋杏兒身邊，有時佢早收，都等埋杏兒收工先一齊走。咁杏兒都 dry咗咁耐，有人示好，一定開心，所以心情都靚番好多！」現場工作人員說。
分手黑仔
同胡杏兒八年情玩完，收埋多年的爛蒲爛滾形象全浮上面，商業客戶嫌棄形象差，外快即時搵少一截。同 Stephy（鄧麗欣）擔正的電影《等•我愛你》上畫，票房亦極其慘淡，只收得二百多萬。黑開有條路，無綫高層樂易玲欽點為他開拓電影市場，安排在賀歲片《我愛香港恭囍發財 2013》做後生版阿倫（譚詠麟），點知片長關係，被迫刪減其戲份；和謝天華孭飛的《神獸巴打》（前名：神獸刑警），去年五月底拍完，原定十月上畫，可惜至今一直無影。
「上面（高層）睇咗試片，嫌導演戚家其拍到部戲支離破碎，根本出唔到街，除非補拍先有得諗，但劇本又度極都唔掂，就算兩個主角俾期補拍，都唔知拍乜，拖拖吓隨時會胎死腹中。」一名邵氏的幕後人說。
去年黃宗澤拍了《等•我愛你》（左）及《神獸巴打》（右），一部仆直一部上映冇期。
三千蚊位
小生北上搵錢，長時間留守內地有錢無定使，最大開銷是「月包」制請女助手貼身服侍，身材好樣任揀，平均每個三千蚊人仔一個月，有女隨傳隨到，抵到爛！
鄭嘉穎
去年留守橫店兩個月拍攝劇集《英雄》，其間聘請兩名女助手貼身服侍，斟茶遞水，連襪都有人幫手著埋。
吳卓羲
10年，吳卓羲在橫店拍《大丫鬟》時，豪到月花九千元請三女助手，廿四小時侍候，開工一個攞零食，一個拎劇本，一個則負責揸機影相，有指其中一名女助手更不時與吳卓羲咬耳仔，態度曖昧。
林峯
自 04年開始，林峯每逢返內地工作，都有一名貼身女助手美美全程傍實，二人連暖包、手襪都兩份用，在上海工作時，美美更試過被拍得鬼祟走入林峯酒店房短聚。 
留言列表
