視帝鄭嘉穎出擊　承諾買樓　鄭嘉穎佘詩曼復合壹週刊 1136期 @ 818 娛樂八掛大放送★

三料視帝鄭嘉穎，一部內地劇《步步驚心》搞掂！拍劇身價颷升至25萬一集，名利雙收，事業得意的他，同內地女模徐靖雯拜拜後，原來已於兩個月前成功翻撻舊愛佘詩曼，阿佘更不介意屈就，一有時間便摸到嘉穎以兩萬月租的海韻軒寓所短聚。對與阿佘再續情緣保持低調，但鄭嘉穎本月十八日拍擺《怒火II》後，二十號將飛橫店開工三個月拍內地劇，咁啱阿佘亦同在該地拍劇，遠離香港，放監！

幫口搭路
鄭嘉穎、佘詩曼○七年拍《法證先鋒II》撻着，拍拖年半，因為嘉穎始終不願大方面對戀情，多次表現龜縮，分手收場。由於分手不涉及第三者，二人始終保持朋友關係，即使分手初期，不滿被飛的嘉穎對阿佘仍心存芥蒂，顯得避忌，不過，唔夠一年，雙方又開始繼續保持聯絡。近一年，聯絡變得更頻密，二人關係愈來愈好。「以前喺埋一齊嗰陣，嘉穎試過因為俾記者跟，情急之下竟然要阿佘落車，自己搭的士走，搞到女友好肉酸；但阿佘對嘉穎好包容，就算分手之後，嘉穎好多負面新聞，阿佘同朋友都無數佢，最多係話覺得佢個人悶，性格不合先至分手。」知情者說。今年五月，愛彼錶圓方店開幕，據了解，老闆蔡志明本來只是考慮邀請阿佘做主禮嘉賓，但阿佘卻主動推薦同埋鄭嘉穎，好上心！「嘉穎同Niki（周麗淇）分手，個女仔喺出面不停唱佢，呢幾年兩個好似唔識咁，完全無聯絡，就算係同一場合撞到，都好似見鬼咁，當對方透明，走夾唔抖。相反，同阿佘就唔同，一路都有聯絡，有時關於工作嘅問題，嘉穎都肯同阿佘講，識嘉穎嘅朋友，都知佢銅牆鐵壁，唔輕易向人透露心事，舊年佢事業低潮期，阿佘都成日鼓勵佢！」嘉穎身邊好友說。

以往，嘉穎和阿佘都用自己相片做微博「嘜頭」，早前卻差不多同一時間，換上同系列公仔。

同換公仔
二人復合，亦早有跡可尋！有玩微博的嘉穎、阿佘，早前突然將原有戶口相片，齊齊換上公仔樣，兩款公仔更是同一系列。二人更不時隔空傳情。今年六月，阿佘在微博留言拍劇好辛苦，嘉穎即時回應，叫她好好保重身體。今年八月鄭嘉穎生日，阿佘私下有送禮賀壽星仔，關係愈來愈穩定。「其實阿佘有唔少有錢人追，但佢嫌啲人講一套做一套，嘉穎可能悶啲冇咁多冧女招，但始終阿佘都三十六歲，睇見身邊啲朋友結婚生仔，佢更加想快啲搵到個可以一齊嘅人。」阿佘身邊人說。即使阿佘對鄭嘉穎不計前嫌，但一條鎖匙唔識響。「嘉穎對阿佘始終仲有feel，但都有諗計追番阿佘，兩個月前，佢哋正式一齊番，可能分開過，阿佘對同嘉穎再一齊都好珍惜，私下同朋友講，希望今次可以開花結果！」

身價勁升
一早貴為視后的佘詩曼，過去與鄭嘉穎事業成績有相當距離，直至今年，嘉穎因內地劇《步步驚心》爆紅，令他忽然成為內地搶手貨，加上做埋無綫三料視帝，人氣再度颷升，身價已急升到廿五萬人仔一集。今個月二十日，他到橫店開工，接拍四十集內地劇《英雄》，三個月袋走千萬。「四年前，阿佘同嘉穎一齊，好多朋友都唔睇好，覺得阿佘同嘉穎距離好大，嘉穎自尊心好強，佢覺得自己唔及阿佘，就更加緊張；當時阿佘好想公開戀情，但佢唔贊成，覺得女友已經上晒位，但自己仲搏殺緊，怕影響事業，兩個人成日為呢件事嗌交！」知情者說。事業急轉運，鄭嘉穎亦不再如前左思右想，步步為營。二人日前拍住拖到新加坡攞獎，他亦表現風騷，與阿佘在傳媒面前大方傾偈。

改買磚頭
戀情仍然冚密，但阿佘與嘉穎春風滿面，難以掩飾。阿佘被問到嘉穎成為三料視帝，她表現得如同自己攞獎一樣，又不避嫌大讚對方：「佢叻囉！」外傳鄭嘉穎以續約換獎，但據了解，他與TVB的合約要到二○一六年才結束，事業有方向，感情又有目標，但嘉穎與阿佘已達成共識，將復合一事保密。「嘉穎年紀唔細，趁而家有得搵，要好好把握，阿佘好支持佢，不過，嘉穎都應承阿佘，會盡快買樓，唔會委屈女友。其實以前拍拖，阿佘已經成日勸嘉穎買樓，唔明點解佢將啲錢買晒股票，綁死晒啲資金！」知情者說。

追住上
貴為電視圈一姐，佘詩曼97年入行後一直受無綫力捧，她主演多部劇集，如《十月初五的月光》、《酒是故鄉醇》、《西關大少》等全部有收視保證，火速進身一線花旦地位外更憑《金枝慾孽》、《歲月風雲》等重頭劇成功打開東南亞及內地市場。 06年，阿佘憑《鳳凰四重奏》奪得台慶視后，從此一帆風順，有市有價。除了劇集一部接一部，亦深受廣告客戶歡迎，年賺過千萬，是無綫最賺錢花旦。今年阿佘約滿無綫，改簽部頭合約，轉戰內地拍劇，叫價15萬人仔一集。至於鄭嘉穎，事業運大起大落，早年簽約戴思聰，被對方連合約賣到台灣，令他要靠母親接濟。02年回流簽無綫，獲高層樂易玲射住，06年憑《天幕下的戀人》一劇封視帝，成為無綫一線小生。好景不常，鄭嘉穎被戴思聰追擊，要求他履行十多年前的終生抽佣賣身契，無綫幫手擺平，代價是簽10年長約，show價四千元，收入有限。長期被網民彈演技差，表情生硬，與周麗淇分手變賤男，形象插水。直至今年，鄭嘉穎憑着《怒火街頭》洗底，做三料視帝，加上在內地一劇走紅，工作量大增，收入開始追近阿佘。

富貴佘
賺錢能力高的阿佘，一向喜歡投資物業，而且眼光獨到。03年，她以500萬購入海景台單位，去年趁高位賣出，激賺868萬。至於鄭嘉穎，03年買入蔚藍灣畔單位，07年已售出套現，之後由西貢村屋搬到紅磡海韻軒服務式住宅，大屋換細屋，加上08年金融海嘯，鄭嘉穎因投資股票慘蝕二百萬，身家同女友差一大截。

地下情侶
鄭嘉穎背住周麗淇暗交佘詩曼，被外界批評為「賤男」，二人展開「地下情」一年多，其間多次斷正；至09年8月，阿佘主動提分手，男方大受打擊。

撻着
07年底，鄭嘉穎與佘詩曼合拍《法證先鋒II》已對女方有好感展開追求，但當時阿佘與吳卓羲熱戀中，半年後，在好友洪天明穿針引線下，二人經常相約夜蒲，終於撻着。

街坊目擊
緋聞傳出後，二人一直唔認，08年9月，鄭嘉穎冒着八號風球送阿佘返西貢寓所，因坐駕拋錨，被大批村民撞到正，更在網上熱烈討論。

熱戀期
鄭嘉穎多次被發現「屈佘」，09年3月，阿佘坐男友車到西貢匡湖居，戴住cap帽的她為避耳目，要成個身縮低坐，相當鬼祟。同年7月，阿佘再被發現在鄭嘉穎家中過夜，翌日坐男友車離開時發現記者，阿佘即刻戴上口罩，鄭嘉穎情急下，竟然趕女友落車，令她十分狼狽。

情侶檔
拍拖近一年，阿佘向身邊人透露視嘉穎為結婚對象，無綫亦有意撮合二人，以情侶檔姿態搵錢，並在《宮心計》一劇安排二人做情侶，二人戀情逐漸浮面。

宣布分手
09年8月，鄭嘉穎生日，阿佘一早表明不會為男友慶祝，有指因男方搵錢能力遠不及女方，加上一動一靜出現分歧，生日當晚，鄭嘉穎借醉宣布與阿佘分手。 ####

嘉穎升呢做埋亞洲視帝，與阿佘出發到新加坡領獎時表現風騷。