CLOSE-UP

遊日攻略

2013年02月14日 ~~ 第1197期 香港《壹周刊》

日圓匯率大跌，香港人終於有機會重溫飛日本血拼 嘅集體回憶，加上三月又開始有櫻花睇，仲點忍得住唔飛番轉日本，短短哋嚟個 4日 3夜團都唔夠止痕啦。
嚴選呢期東京最 hit最平最爆掃貨點，買相機掃靚錶外，再行 game鋪兼搵古靈精怪奇趣好玩 嘢。
講多無謂，掃貨團友們，換 咗日圓未？

TIPS

路路通
要玩盡四日，交通時間自然唔可以 嘥， iPhone app「山手線 Exit」會教你點搭車，仲會顯示埋邊一卡最近出口，慳盡一分一秒。
如果要去埋其他地方，亦可以安裝「乘換案內」 iPhone app，輸入目的地後，即刻搵出轉車路線同電車時間表，超方便。




喺「山手線 Exit」輸入目的地，即提示乘客邊卡列車最近出口，極貼心。




想知目的地點去，要用「乘換案內」 app，教點轉車之外，列車幾時埋站都話埋你知。

TIPS

中古四級制
去日本血拼，點少得去中古店（易手店）尋寶？無論你買 gadgets抑或買 game買 CD，通常都會按新淨程度分成四級，列明價錢牌之上。
（注：文中所有日圓匯率以每 100日圓兌 8.4港元計算）

中古 A
新淨程度： 99.99%
齊盒齊配件，表面全冇花痕同冇明顯使用痕跡，簡直同新出廠一樣。

中古 B
新淨程度： 90%
外表新淨，有輕微使用痕跡，又或邊角位有些少花痕。

中古 C
新淨程度： 80%
表面雖有些少花痕，機身亦有 啲老化，但完全唔影響操作。

中古 D
新淨程度： 70%
操作良好，不過明顯有輕微花痕同埋污垢，兼且唔齊配件。

Day 1：買相機七折

仲諗住去秋葉原買相機？唔通想俾人 劏？事關近年秋葉原貨價已經俾內地客買貴晒，買平機絕對要去上野，喺御徒町站南口 2出之後，向右轉直行五分鐘就到。
首選大型電器鋪「 PC Bomber」，相機價錢夠抵，以 Sony最新 full frame機仔 Cyber-shot RX-1為例，香港賣$23,990兼成日斷貨，而 PC Bomber有現貨兼價錢只係 205,657日圓（約$17,275），慳番 嗰六千蚊可以補貼旅費。另外， PC Bomber不定期推出特價優惠，好彩 嘅話仲會執到平貨。






出發前可以先上網搜尋目標相機售價同有冇貨，以免白行一趟。

TIPS

日本各大電器連鎖店都有會員卡，申請入會有更多優惠，有機會比退稅慳得更多。

醒招退稅！
如果諗住去機場先退稅，隨時中招！因為成田、羽田機場都冇退稅櫃位，所以去百貨公司買 嘢，記得問清楚有冇退稅專櫃先，或可唔可以用免稅價埋單。
不過，必須購物滿 10,501日圓（食物、化妝品同煙酒除外），出示護照先可退稅 5%。
部分大型電器連鎖店例如「 BIC CAMERA」設會員優惠，可申請入會額外拎 5%積分，下次購物就可以當現金用。雖然「理論上」只准當地人入會，不過填表時填上所住酒店地址，一樣 pass。 

TIPS

日本機保養貴
雖則日本相機抵買，但留意部分相機只得日文介面，要自己下載 firmware先有中文顯示。另外，大部分品牌不設全球保養，壞機要寄番日本整，或俾香港代理維修，收費會較貴。

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。

新宿尋寶

鋪頭位於山手線車站口，好易搵。

ALPS-DO
菲林相機發燒友必去， 135相機之外，仲有 120菲林 Mamiya、 Pentax、 Hasselblad同鏡頭。由於同日本專業相機維修公司合作，質素有保證。
網址： http://www.alpsdo.com
地址：東京都新宿區新宿 3-23-1 

新宿中古 Camera市場
搜羅唔少偏門品牌例如 Agfa、 Mamiya， Bronica及 Rollieflex等，仲有好多歐美品牌同其他古靈精怪貨品，例如即影即有證件相機、 16mm攝錄機、舊配件等，簡直大開眼界。
網址： http://www.nsi-jp.com/camera.htm
地址：東京都新宿區西新宿 1-13-2二樓


由於係樓上鋪，要花 啲時間搵。


輕易搵到 Mamiya等絕版中古菲林機，菲林機迷點會唔心郁。

Lucky Camera
又係菲林機天堂，集齊各大品牌機身、鏡頭同閃燈，品質起碼 B級以上。價錢算合理，例如極罕見嘅雙鏡反光相機 Rolleiflex 3.5D，開價僅 68,000日圓（約$5,710）， eBay最平都賣緊$11,300啦！
網址： http://www.lucky-camera.com
地址：東京都新宿區新宿 3-36-16


機款齊售價又吸引，好難唔破財。


即使係古董機，都保養得好好。

Map Camera
樓高五層，二樓同三樓分別賣 Nikon同 Canon貨，大量新、舊鏡頭及配件，好似專為 Nikon經典機 F3而推出、幾乎絕跡 嘅閃燈轉接器 AS-17，都有機會搵到。
網址： http://www.mapcamera.com
地址：東京都新宿區西新宿 1-12-5


Map Camera有成五層樓，規模最大。


配件相當齊全，只恨時間唔多夠。

Day 2：秋葉新玩法

去得日本，冇理由唔走番轉宅男宅女天堂──秋葉原， update吓最新狀況。不過，中央通 嘅大型連鎖店冇乜特色，建議你行入內街嘅「 Super Potato」，唔使同強國人逼（仲聽少 啲普通話）之餘，買 嘢仲會平好多，例如 Wii U嘅《 New Super Mario U》，只賣 5,000日圓（約$420），比香港平幾十蚊。其他抵玩中古遊戲，例如 PS3《 GTA 4》及《真•三國無雙 Multi Raid》只賣$70，平到笑。








A： Super Potato
網址： http://www.superpotato.com
地址：東京都千代田區外神田 1-11-2
北林大廈 3-5F 




B： Book Off秋葉原驛前店
玩到七、八點，好多鋪頭開始閂門，呢個時間最好就去 Book Off，合共有六層樓專賣易手 CD、漫畫、玩具同遊戲，最重要係開到夜晚十一點，留番最後先行都未遲。
網址： http://www.bookoff.co.jp
地址：東京都千代田區外神田佐久間町 1-6-4 




C： Gundam Cafe
行到 攰 攰 哋，可以搵間 cafe歇歇， JR車站前間「 Gundam Cafe」有太空艙 嘅裝修，加上著住聯邦或自護軍制服 嘅侍應，好似進入 Gundam世界。造型獨特 嘅「馬沙渣古咖喱」套餐，盛惠 890日圓（約$75）。
網址： http://www.g-cafe.jp
地址：東京都千代田區神田花岡町 1-1 




D： Akiba Tolim
唔好以為秋葉原淨係 啱男人行，係正 JR上蓋 嘅 Akiba Tolim商場有 Uniqlo、無印良品等潮流品牌，唔使咁宅。
網址： http://www.akiba-tolim.com
地址：東京都千代田區神田佐久間町 1丁目 6番地 5 

TIPS

騙遊秋葉原
如果同女友一齊去日本，未必批准你專登去秋葉原，其實秋葉原附近 嘅淺草有新景點 Sky Tree，又有松本零士設計 嘅觀光船直落台場 shopping，不妨 氹女友去以上景點，就可以「順便」停一停秋葉啦！


想上 Sky Tree，最好提早幾日 喺網上訂飛。

Sky Tree
去年先落成 嘅「東京晴空塔 Sky Tree」（ http://www.tokyo-skytree.jp/入場費 2,000日圓•約$170），搭 JR（ Tokyo Sky Tree站）或地鐵（押上站）就可以直達。 




搭船睇 Gundam
淺草有漫畫家松本零士設計、貌似宇宙船「 Hotaluna」（ http://www.suijobus.co.jp/ 1,520日圓•約$130） 嘅觀光船直落台場，而且台場 Diver City又有 Gundam Front Toyko主題展覽（ gundamfront-tokyo.com），又可以「順便」去睇睇。 

TIPS

日本潮 apps
東京而家通街有免費 Wi-Fi，想上網搵情報毫無難度，裝定免費遊日 apps，一定用得着。

觀光必備
Travel Walker會每日 keep住 update唔同地區節日 event及購物資訊，唔怕錯失任何觀光時機。


對應系統： iOS




識飲識食
香港有 Openrice，日本就有食 Berogu，可以即時搜尋評分最高 嘅食店，而且仲有 e-coupon下載，好過跟旅遊書搵食。


對應系統： iOS

TIPS

點裝日本 apps？
iOS用家安裝日本專用 apps，要有日本 iTunes賬戶先得。要開日本 iTunes賬戶，可參照以下步驟。 Android用家只要連接當地網絡，就可以直接喺 Google Play下載日本 apps。

step 1：先登出 App Store，再喺 App Store內隨意揀個免費 app下載。
step 2：會彈出登入畫面，選擇「新增 Apple ID」，然後揀選日本 App Store。
step 3：輸入個人 email、密碼等資料，付款方式頁面揀「 None」，再輸入日本地址（可輸入酒店地址）及郵政編號。
step 4：開啟 email信箱，查收日本 iTunes確認信，選擇確認賬戶之後就可以裝日本 apps。

Day 3：掃錶慳成萬

買相機買 games，慳到 嘅錢唔多，真正 嘅大茶飯係買錶！首選去中野百老匯（ Nakano Broadway）商場，中野站北口出，穿過中野 Sun Mall，行三分鐘就到。錶鋪集中 喺三樓，細鋪仔格局，似足尖沙咀香檳大廈。出發前上手錶討論區，查定香港售價，到時一睇就知平幾多。
另外，日本唔少錶鋪有網站，有相有價錢，列明「新品」（全新）或「 Used」（易手），睇 啱可以 email對方留貨。買錶時記得帶護照，因為可以即場退 5%銷售稅。俾錢就最好用現金，慳埋 3%信用卡手續費。


Nakano Broadway除 咗有錶，亦有動漫、遊戲、模型、 CD同 AV產品。






日本人唔興講價，可以慳番 啲口水。


錶鋪網站雖然列明價錢，但據過往經驗，落到鋪會再平少少，睇中可叫留貨。




Kame-Kichi
香港錶友推介入貨位，錶款齊，港人最愛 嘅 ROLEX、 PANERAI隨時睇到眼都花，幫你格埋附近鋪頭價，仲幾靠得住。
網址： http://www.kame-kichi.com
地址：東京都中野區中野 5-52-15 3樓 




Jack Road
款式、種類同 Kame-Kichi差唔多，但店員識講普通話，溝通都易 啲。
網址： http://www.jackroad.com
地址：東京都中野區中野 5-52-15 3樓 

港日格價

究竟去日本買錶有幾平？搵三款港人熱捧錶款格一格價，閒閒 哋平過萬！（香港價錢為官方訂價，日本價錢參考自 Kame-Kichi，並以 8.4匯率計算及已減 5%銷售稅。）


ROLEX Submariner Date 116610LN
港價：$62,100
日價：$52,430（ 84折）


PANERAI LUMINOR 1950 3 Days PAM 372
港價：$75,000
日價：$54,900（ 73折）


Cartier Miss Pasha W3140007
港價：$24,800
日價：$16,750（ 67折）

Day 4：最後衝刺

晏晝機返香港，得番 嗰半日，冇理由行百貨公司就算，一於盡最後努力，買買買！

特色手信
唔想買「行貨」手信，可以坐 JR去「有樂町」站側邊 嘅 MURAkaraMACHIkara館，有齊全日本過千種地道特產，淨係清酒都有成二百種，買手信一流。
網址： http://murakara.shokokai.or.jp
地址：東京都千代田區有樂町 2-10-1一樓


鋪頭睇落似普通超市，但其實「禾桿 冚珍珠」，有好多正嘢賣。


發售當地農產品，仲有得你試味。


當地人都鍾意幫襯，入口排長龍司空見慣。

喪行 outlet
舊年四月先開、位於木更津嘅「三井暢貨園區」，屬於超大型 outlet，入面有成 171間鋪頭，由減價 G-SHOCK、 SEIKO同埋 CITIZEN錶，到 Nike、 Asics波鞋都有，新宿站西口有穿梭巴士直達，去羽田機場亦只需廿五分鐘，超近！
網址： http://www.31op.com/kisarazu
地址：千葉縣木更津市中島 398 

賞櫻情報

一月至五月去日本，仲有機會賞櫻（日文叫花見），開花路線一月中由沖繩開始，五月就會開到上北海道，而港人鍾意去 嘅東京或大阪，三月中至四月初至係最佳賞櫻期，想知實際開到邊，可參考日本櫻花情報網站（ http://www.rurubu.com/season/spring/sakura）。
東京 嘅話，首選新宿御苑同上野公園，尤其新宿御苑，有近七十種品種櫻花，而大阪就要揀大阪城公園及大阪府造幣局。 

靚影櫻花

見到咁多櫻花，點先影得靚？無論用手機或相機，學定以下幾個要點，就更易影到靚櫻花。
構圖：櫻花比例唔好超過相片構圖一半，切忌成張相都係櫻花，最好以天空或建築物襯底。
調校：櫻花顏色多數淺粉紅色，要影出層次感，建議調低 1/2至 1/3級曝光值。
器材：只影櫻花好單調，最好連埋樹幹一齊影，用支 wide鏡（ 24mm以下），可影出壯觀感覺；如果想近距離影櫻花，用長焦距鏡頭（ 200mm以上）遠距離拍攝，容易影出淺景深效果，突出櫻花。

TIPS

事前準備
去東京通常揀自遊行，買套票唔一定靠旅行社，自己上網訂購，隨時慳多千幾蚊買 嘢。




平買機票
逢星期二朝早八點，國泰會推出 Fanfares機票優惠，飛東京、福岡或大阪，連機場稅及燃油附加費，最平約$1,700，平通街。
網址： http://www.cathaypacific.com/cx/zh_HK/latest-offers/flights/fanfares 




平搵酒店
BIGLOBE旅行網站訂酒店，會一次過比較十四個日本本土網上訂房網站（包括樂天及 JTB），即刻搵到最平酒店優惠，抵過用 Agoda或 hotel.com，例如訂池袋 Sunshine City太子酒店， Agoda及 hotel.com最平約$1,100，一 search最平 9,000日圓（約$765），相差四百幾蚊。
網址： http://travel.biglobe.ne.jp 




識搵上網
拎部 smartphone去日本，要上網先搵到地圖、飲食優惠等即時資訊。可考慮 b-mobile（ http://www.bmobile.ne.jp）訂 visitor SIM卡，約港幣$350，啟動後十四日內無限上網（限速 300kbps），可於機場郵局收件。
如果幾個朋友一齊去，最抵玩法係去 Softbank Rental網站（ http://www.softbank-rental.jp）租 Pocket Wi-Fi（最多五部機分享網絡）。同樣可以 喺機場專櫃交收，手續費約港幣$26.7，除番開每日租金約港幣$133.8。 

text：科技組
photo：攝影組
graphic：朱桂葉