債仔陳英鳴（左）發窮惡，收唔到數嘅麥基（右）感到無奈又矛盾。

中環人語

債仔被捕　麥基：佢要洗 pat我好矛盾

2013年02月14日 ~~ 第1197期 香港《壹周刊》

上期本刊報導「金融老蠱惑息誘麥基」，話前上市公司主席陳英鳴，以高息吸咗粵語殘片影星麥基嘅錢無還。文章一出，警方即刻做嘢，上週四喺灣仔拘捕一名五十七歲陳姓男子。小宗即刻打去搵陳英鳴，佢電話已飛去 call台。而麥基則話自己開心又矛盾：「佢要洗 pat pat（小宗按：大前提係被判罪成兼坐監），其實我都好矛盾，咁我嗰六十萬仲收得番嗎？」佢話搵緊律師商討對策。原來陳英鳴過去一直信誓旦旦還錢，但麥基每次同佢傾，佢都態度輕佻咁話：「我有二、三千蚊，要唔要吖？」有次麥基喺銀行門口等佢「還住十萬」，點知陳英鳴來到話：「哎呀，我只籌到一萬咋！」仲話：「你態度唔好，我又唔還住喇！」麥基次次被激到扎扎跳；債仔惡過債主，又一例證。

本週圖片

白花油王子年年都喺維園擺檔賣吓白花油，今年仲喺
攤位賣個人專輯，睇吓王子，揸住咁 cute嘅福仔，都一副「唧」極唔笑嘅樣，似乎唔係好滿意銷量噃。（嚴寶權攝） 

本週對峙
日方大波挑釁

東瀛防護相小野寺五典透露，一月十九日下午中國 054型導彈護 衞艦「溫州號」以火控雷達瞄準日本
驅逐艦「大波號」，雖然未有開火，但事不尋常云云。
以「大波號」出迎「溫州號」，究竟邊個挑釁邊個先？
即使開火，都唔怪得人嘅噃。 

Give me a break
平鑽充靚鑽

李清輝話自己的鑽石同其他寶石都係用洗潔精浸洗，即時閃爆。（張國慶攝）

新年流流，最多春茗飯局，大家互相恭賀之餘， OL仲可以將身上嘅行頭，互相較勁，咁點樣可以平買靚鑽石？批發鑽石予 Cartier、 Dior、 Tiffany的批發商 LAZARE KAPLAN東南亞區董事兼副總裁李清輝，就教路話，同為最高級嘅 D色，佢哋牌子嘅一卡價錢十八萬，零點九卡只九萬元，價錢差成倍！但肉眼點睇？佢自言做咗呢行幾十年，都分唔到。仲有，原來鑽石並非大粒淨色就叫靚，重點係夠閃。鑽石中 D色為最貴，但揀到粒「 cut得靚」嘅 H色，望落分分鐘閃過同卡嘅 D色，價錢又係平一截！要 keep住鑽石夠閃，李清輝攞住隻五卡鑽戒話，用最普通的洗潔精加暖水浸，用牙刷擦吓啲罅，望落就閃閃令啦！ 

金管局出重炮

金管局總裁陳德霖要揸住大炮，向啲銀行發吓炮，唔好再做無牙老虎。

金管局去年尾話 Hibor報價機制無問題，轉頭就被境外監管機構「溫馨提示」，指 UBS就 Hibor報價可能涉及不當行為。被人笑係無牙老虎，金管局就喺呢個星期、 RBS被指操控 Libor有結果前做嘢，並引用《銀行業條例》，首次將業界制定的操守準則作為法定指引；違規者，「釘牌」都有之。而 Hibor日常運作及監管亦由銀行公會交俾財資會，讓金管局成 Hibor的新管理人，「搣銀公柴」。
銀行界人士話，金管局過去買大行怕，尤其獅子號，不但係發鈔銀行，細行嘅 P（最優惠利率）都唯佢馬首是瞻，影響力大。金管局不時要派班職員巡查銀行，獅子號例以「資料機密」為由，指明非阿 head級數嚴禁內進。今鋪金管局揸緊《銀行業條例》呢碌「重炮」，對銀行同新成立嘅金發局來說，絕對係下馬威！ 

樓市招「愈變愈辣」

市場一直流傳，政府會在上週五再出招打壓樓市，不過事實證明，流料歸於流料。咁究竟流言是如何形成的呢？前星期小宗從地產代理口中收到風，話政府有意效法星洲，對炒賣工廈徵稅。兩日後， facebook就傳出係對第二套住宅徵特別印花稅。再過多幾日，小宗收到 whatsapp，話會加重買家印花稅、第三套房停造按揭、及第一季推一萬伙超長樓花期居屋等等，到上週五連改圖創作嘅假政府公告都出埋。呢單嘢，明顯係經紀想谷旺市之舉；但喺度奉勸行會成員，呢排別做物業買賣，免得政府突然出招，就步林奮強後塵矣。


就算勁傳出招，但新盤仍然拍烏蠅。（關永浩攝）


上週勁傳政府再出招壓樓市， whatsapp言之鑿鑿勁詳細，連樓市靜幾耐都估埋。

金牙大狀講嘢
練乙錚誹謗七百萬人

練教授話民意任由黑道擺布，咁咪侮辱晒七百萬人？唔得咁嘅噃。（高仲明攝）

689出律師信指控練乙錚登喺《信報》篇鴻文誹謗佢。細閱全文，練教授其實係誹謗緊七百萬人。大家睇吓佢點講：
堂堂一個香港特別行政長官候選人，得到「江氏紅」中聯辦的點頭去馬之後，是怎樣「斥之乞來」、「呼之不去」，怎樣誠惶誠恐，怎樣卑躬屈膝打哈哈擺和頭酒、最後得到黑道的百分百支持，神一樣替他撐住了比唐氏高的「民意」，讓當時的中聯辦領導得以「名正言順」抬他上位。
各位，「民意」係乜呢？此又豈非七百萬人之意向乎？然而在練教授筆下，七百萬人原來並無陳寅恪所講「獨立之精神，自由之思想」，而是聽任黑道扯線擺布者，咁對七百萬人嚟講，又豈非絕大之侮辱？
若然 689要出律師信，都理應唔係以佢私人名義出，而係代表七百萬市民向練教授討回公道。不過，如果佢都識得咁做，佢又仲係 689乎？ 

中環人語迷你版

如此多的藏品我用盡畢生也品嘗不完。

估中邊個中環人講呢句說話，送你 PNY Mini Hook Attache USB Flash Drive 8GB一件有意參加者，請於二月十八日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

現階段並不適合參與全國政協的高層工作。

答案：曾蔭權
得獎者： Violet Yeung
中獎時間： 1:00pm 6/2/13

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年二月二十一日本欄揭曉。 

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp:6829 5929 

(宗菁華)