探熱針
收緊政策 賣碟唔過五千張 許志安何韻詩接令止血
樂壇一蹶不振，唱片銷量低無可低，賣過一萬張已經要開香檳。放血不如止血，當中東亞唱片開始實施新政策，賣唔過五千張的歌手，一律無大碟出；受影響包括許志安、何韻詩、王菀之、盧凱彤、藍奕邦、劉浩龍，全部只能出細碟（ EP）或單曲。有得繼續出大碟的，只剩三張王牌，劉德華、鄭秀文和楊千嬅。
雖然唱片唔賣，但許志安憑住 Big 4人氣，內地演出已經為公司賺夠數，唔似得何韻詩，投資大回報少。
劉浩龍唱片銷量低無可低，最佳出路睇怕係娶容祖兒做老婆。
爭取失敗
歸類一線歌手的許志安、何韻詩，還有剛剛憑《留白》奪得無綫《十大勁歌金曲》金曲金獎的王菀之，表面風光，但實情三人近年推出唱片的銷量都不過五千張。
與其蝕住做，近日東亞唱片內部決定推行新制度，唱片成績賣唔過五千張的歌手，全部無得出大碟，改出成本較低的細碟或單曲碟。
「公司做碟向來好揼本，但大部分歌手都無賣碟保證，長期收支唔平衡。實施收緊政策，改出細碟或者做單曲有助控制成本，情況好似拍戲，刀仔鋸大樹。不過班歌手知道無機會出大碟，好多都唔開心！」一名東亞人說。
將於農曆年同 Big 4開演唱會的許志安，近日亦有新歌《冰山一對》派台，但新歌亦只能出 EP。
「其實安仔都有同公司爭取過，好想喺今年出大碟，但係上張《學愛》 EP賣得二千幾，同規定嘅目標數字距離太遠，梗係拗唔過公司啦！」
唱片業不景，唱片賣唔過五千的王菀之，亦憑《留白》奪得今年《勁歌》頒獎禮金曲金獎。
王菀之（右二）近日憑《老表，你好嘢！》成功出位，變相多條出路。
出乎意料
至於自以為樂壇天后的何韻詩，唱片銷量亦持續處於低位，之前的《 Heroes》、《無名詩》，分別賣三千張和二千多張，跟同公司但名氣差一大截的藍奕邦，其實差不多。
「阿邦唱片銷量唔高但穩定，一路維持喺二千幾張，大家估唔到嘅係阿詩啲碟會賣得咁差，但公司喺佢身上用嘅資源同心機其實高過藍奕邦好多，可以話冇回報，就算《賈寶玉》做完再做，但收益都係好有限；唔似得許安，幾乎個個禮拜要做內地演出，唔使半年已經做到數，同公司交代得到！」知情者說。
雖然何韻詩不停演出舞台劇《賈寶玉》，但收入有限。
劉德華、鄭秀文一直是東亞最賣得兩張王牌。
焗住轉型
網上下載令唱片業潰不成軍，近期因為拍無綫劇《老表，你好嘢！》人氣提高的王菀之，唱片銷量同樣唔達標，出大碟無望。
「公司最唔掂嘅係師兄劉浩龍，佢張《 Le Nouvel》賣得百幾張，公司仲肯幫佢出單曲碟，已經對佢好好！」大碟唔賣得損手爛腳，出單曲爆得到，仍有助維持人氣，否則，歌手只有另覓出路，改行拍劇拍戲。
所剩無幾
今時今日，歌手出碟有如倒錢落海，有出冇入。銷量縮水，以東亞旗下歌手為例，賣得到的，只剩劉華、 Sammi、千嬅等天王、天后。 
留言列表
