818 娛樂八掛大放送★

鄧紫棋 是我小時候：G.E.M.衣架插眼留疤 7,587 


■登登登櫈，G.E.M. cute爆水着look曝光！當年七歲的她充滿童真。

小時候的鄧紫棋（G.E.M.）是一個百厭妹，1歲時打翻熱水燙傷手，3歲時因太頑皮跑來跑去，結果被衣架插損眼皮，令左眼皮留有疤痕！撰文：皓騫

不說不知，G.E.M.出世時重7磅7安士，是一個小肥妹，自細已跟婆婆一齊唱歌，注定長大後做歌手，她說：「細個同婆婆住上海，成日跟婆婆唱卡拉OK，學識咗唱俄羅斯民歌，就鍾意咗唱歌。」G.E.M.的婆婆以前做教師，故G.E.M.三歲已學識一千個生字，又懂背很多唐詩，她說：「屋企畀好多栽培我，爹哋教我英文，媽咪教我中文，公公教我游水，婆婆教我唱歌。」

■G.E.M.出世時有7磅7安士，越大越肥十分可愛。 

■年紀小小的G.E.M.已懂擔遮擺甫士，天生一副明星相。 旅行碌落斜坡

雖然是女孩子，但G.E.M.性格活潑，自小已很百厭，她說：「細個太頑皮成日跑嚟跑去，一歲時俾熱水燙傷左手要入院，家隻手仲有一撻好淺嘅印，三歲時俾衣架插損左眼皮都有疤，讀小學去秋季旅行仲碌落斜坡，半邊臉要包紮，成個月唔食得豉油，好在呢次冇瘌咋！」

■四歲的G.E.M.單腳影相，手舞足蹈好得意。 

■穿了裙仔的G.E.M.好斯文，似足小淑女。

不過，G.E.M.揚言讀書時幾乖，只是經常遲到，她說：「中四、中五時讀書讀到好夜，所以狂遲到要記缺點，但冇試過見家長。」她謂父母管教好嚴，4點放學就要返家，但中二開始就鬆毛鬆翼，放學後常偷偷去旺角逛街，又試過跟媽咪嘈交後玩離家出走，但只敢走到附近的公園，最後被公公接返家。