同你吟一吟
霍震霆 ATV拉布 夢遊選亞姐
選 咗半年都未選完 嘅亞洲小姐,上個星期六晚(十二月十五日) 响大埔總台舉行總決賽,選出最後十強,明年一月中先知道邊個係冠亞季軍。
大會通告八點開騷,原定九點半完,點知話班佳麗分數太過接近,要花多 啲時間計清計楚,中間唯有叫星光家族成員加亞洲先生上台唱歌助興拖多陣,卒之搞到十一點先散 band。
選美都要拉布,身為大會評判之一 嘅霍震霆,自然頭暈暈,上台頒發「東方美魅力大獎」,霍老爺幫得獎佳麗 ⑩許斯閔加冕時,居然將該打斜掛身 嘅彩帶,當頸巾掛上對方條頸,之後當冇件事,頒埋個獎就走番落台。
又好難怪霍老爺甩轆,事關今屆亞姐愈選得耐,質素愈跌 watt,最騎呢係叫班佳麗谷胸跳自摸舞,唔鹹又唔趣。至於才藝表演環節,個個唔係跳舞就係唱歌,唔悶就假,當中⑯吳荻雖然最賣力,表演肚皮舞跳到缽仔糕都露埋,仲差 啲甩裙露底,可惜都入唔到十強!
靈魂出竅
將彩帶當運動員獎牌,霍老爺不自覺將彩帶掛 响 ⑩許斯閔條頸,再頒埋個獎, 瞓醒未呀!
飛糕走底
⑯吳荻 嘅肚皮舞其實跳得唔錯,錯在大會件衫唔 啱身,個 top要用扣針扣住,條裙又過鬆,飛糕走底應該預 咗。
搖肚變搖奶
同樣係跳肚皮舞 嘅⑭陳唯婧,舞姿麻麻,但勝在舞蹈精心編排過,加插多次𠌥身搖奶動作, fing得勁過肚皮好多。
自摸走底
勁舞環節冇拍子美感可言,一眾佳麗只係奉命谷起事業線,再自摸擘髀走底,係咁簡單。
爆肚精選
大部分都係國內佳麗,但為 咗入鄉隨俗,上台自我介紹都會講廣東話,⑮吳娟叫自己做吳尊,更搞笑係佢突然間話:「我今年唔使交稅!」吓?其實佢係話:「我今年二十九歲!」
叮噹馬頭
一直係大熱門 嘅 ④齊真晨(右圖),順利入到十強,至於愈戰愈勇 嘅 ③陳彥蓉,直頭攞埋「最佳進步獎」再入埋十強。
有你冇我
當日同羅霖合照泯恩仇 嘅黎燕珊,原來仲係好唔妥,競選前一日拜神,兩姊妹鬥捉住亞視高層葉家寶做夾心人,到競選當晚避無可避,影完相,黎燕珊第一時間,彈開。
留言列表