Main Camp
學運新勢力 城大學生會爭氣
早前浸大有學生𢱑贊助被市民狂插，而港大學生會空莊半年陷癱瘓，剛成功選出新莊但又被指靠造票當選，大學生組識近年看似一屆不如一屆。
其實香港學運一向以港大中大為首，但最近城大學生會則有異軍突起之勢，除了於校內搞福利如 3蚊買零食益學生之外，對外亦積極參與社會事務，先為碼頭工人籌款、又跟支聯會合作於校內再搞「六．四展覽館」，城大學生會外務副會長姚聖瑋豪語：「大學生就係要為不公義嘅事發聲。」香港大學生仲有希望！
會長：唔會 hea住做（真實對白）身為現屆學生會主席的李浩賢雖然第一次上莊，不過他直言：「上得學生會支莊就唔會 hea住做，真係希望同學多啲關心城大，關心社會！」
幫內地人了解六四
要動員學生，新學生會更識籠絡同學，如之前搞過「三元日」，以 3蚊低價出售烏龍茶等食品，同學當然勁讚兼排長龍。除益同學外，以「快樂抗爭」為宗旨的新學生會，對社會各議題亦相當敏感，於本月初先搞 Band騷宣傳民主，又積極為碼頭工人籌款， 2日間籌到 2萬元成為各大專之冠，最近更與支聯會合作再設立六四紀念館，會長李浩賢說：「其實六四紀念館上屆莊都有搞，於是我哋就傾再合作，除咗展品多咗，我哋都有畀意見支聯會，講出大學生對六四嘅睇法，等佢哋可以針對性咁加強內容，因為我哋近九龍塘火車站，想多啲內地人有機會了解『六四』究竟發生乜事。」
比起已經 4個月沒有派代表到學聯開會的港大學生代表，前學聯秘書長林兆彬盛讚：「城大係比以前積極咗，開會提出好多意見，明顯有進步。」難得新莊校內校外讚多過彈，學生會外務副會長姚聖瑋好熱血話：「大學生就係要為唔公義嘅事發聲，好似啲工人咁樣被人欺壓，我哋唔出聲唔得，咁香港先有希望。」而會長李浩賢則說：「我哋唔係要做大佬、唔係要揸 fit，各大學都係學聯成員，好似最近佔領中環，因為學聯未表態，所以我哋唔會自己發表立場先！」做實事唔邀功，抵讚！
搞六四館
城大學生會與支聯會合辦的六四紀念館，位於城大教學大樓的必經通道，由即日起至 7月 15日開放予公眾，亦已有約 25間中學預約參觀，上週五（ 12日），館內亦不時有學生參觀。
紀念館內展出六四當年的一些主要報章的報道，還有死難者遇害的照片，資料十分珍貴。 
館內還有電視播放早前教協所拍有關六四前後所遇到的種種波折，亦有支聯會職員在場內講解。
平霸益學生
上週一至三舉行的「三元日」，以 3蚊一支烏龍茶和繽紛樂朱古力作招徠，雖然每位學生限買 3件，但仍吸引同學排長龍。
現場學生會成員不時要補貨，而據福利部成員 Heidi表示：「入貨嘅錢都係之前學生會剩低嘅盈餘，嚟緊想 1個月搞一次，月尾仲會免費派 Häggen-Dazs雪糕。」
關心同志
在學生會的 fb專頁中發現兩位城大同學親熱的照片，雖然會長 Timothy指學生會對反歧視同性戀未有共識，但有莊員自行把男男親熱照傳至 fb，學生會亦不會阻止。
高登仔變城大校董
城大校董會每年均有兩名學生代表，除了學生會會長外，另一位則是研究生代表，而「無敵神駒」則是城大首位普選產生的校董，之前一般由研究生會主席兼任。《蘋果日報》圖片
高登紅人「無敵神駒」，除改詞叻外，亦曾自設「高登電台」搞網絡廣播，原來這位 hit爆高登的無敵神駒，原名叫仇思達，現在是中文文學研究生，最近還升呢成為城大校董，早前發起「光復城大研究生會」行動，質疑校內研究生會的選舉及退會制度不公，財政又缺乏監管。
上週五（ 12日）仇思達在電話中說：「諗住透過做學生校董就可以改善研究生會個制度，點知做咗校董都完全冇幫助，發言冇人聽，一啲影響力都冇，係每年開八次會咁大把，但提出嘅嘢一拖再拖，我諗係想拖到我任期完為止， hea住做啩！」
留言列表
