FACEweekly
So in love…… 官恩娜
同官恩娜（ Ella）做訪問，你唔會覺得有壓力，唔少藝人髮型、化妝、助手……身邊總是一大棚人，想埋身都難，但 Ella卻會自己落手落腳化妝，鍾意講星座、生肖，又會介紹你 iPad唱 K app（唔好諗錯陳年新聞，係真係用嚟唱 K嘅 app），成日笑瞇瞇，同佢去年中加盟華納後，由師兄方大同作曲、 C君作詞的首支派台歌叫〈 So in love〉般，筆者係女仔都覺得 sweet到爆，男仔對佢唔 in love就奇。
「 Bisous係我隻狗仔， 10個月大的英國約瑟，佢雙子座㗎， Bisous係法文，通常法國人走嘅時侯都會講 Bisous，意思係 kisses for you、親親，好似小親親咁，而且我好鍾意個 B音，好有親和力。佢好搞笑，每日都會好準時叫我起身， 7點 45分唔會吠、 7點 55分都唔吠，一到 8點正就汪汪汪叫我起身。」
正能量
剛剛完成錄音工作， EP將會暑假推出，共 5首歌，成隻碟會以愛為主題，希望令人覺得 full of love。第一首派台歌〈 So in love〉，當初公司同我講方大同會作歌好開心，好想知佢眼中嘅我會係點，所以任佢發揮。原來佢覺得我好有正能量，所以節奏好輕鬆，較 pop、 urban。其餘幾首分別由柏豪、 Edward Chan、舒文創作，有慢歌、有 hip hop，都幾多嘗試。
有機
我會好留意自己食過咩，聽落好似好簡單，點會唔知自己食過咩，但其實大部分人都唔知放咩落口。以前我好鍾食立雜嘢，但𠵱家唔會，盡量每日唔會食多過 1500至 2000卡路里，亦會選擇 organic、低鹽、少油食物，我食飯一定要食五穀米，加小黃米，對腸胃同膳食纖維好啲。一個月瘦咗約 7磅，唔算快但勝在健康。
騎馬
兩年前開始我去咗騎術學校學騎馬，對住動物真係好開心，每當做嘢做到好懨悶，我就好想去騎馬。雖然學咗兩年，但我覺得騎馬好似藝術永冇學完，目標係跳欄。還有，我發現騎馬配件可以好 fashionable、好有型，我會不時留意，發掘唔同騎馬服品牌。
撰文：翟穎妍
攝影：謝耀恆
髮型： Eve Chiu@Queen's Private i
留言列表
