close


Kyary Pamyu Pamyu只得5呎1吋高，但因衣着獨特，被㗎妹封為潮流教祖。形象古怪連名都夠特別，「Kyary」其實為英文名Carrie，而「Pamyu」其實係佢偶像八木真澄經常掛喺口邊嘅助語詞（解嚟啦嚟啦！），改名都要怪過人！

日本每隔幾年就有潮icon爆出，十年前彈出嘅有濱崎步，近幾年就有西野加奈，不過今年日本潮界大執位，潮流教祖之位由今年19歲的Kyary Pamyu Pamyu坐正。
眼大大嘅Kyary，特徵係身上服裝經常五顏六色，最鍾意玩cosplay懶cute扮怪獸，難得㗎妹like佢古靈精怪，封佢做涉谷系潮模教祖。Kyary除咗係紅爆模，仲出埋唱片做歌手兼踩過界拍日劇，最潮就係佢。


今年19歲的Kyary，由於打扮cute得嚟又怪誕，日本傳媒封佢為「日版Lady Gaga」，而Kyary講明自己的時裝觸覺，唔係抄Gaga，靈感來自佢偶像Katy Perry，所以Kyary無論頭髮、甚至MV都學足Katy咁五顏六色勁繽紛。

潮誌常客
十幾年前日本潮icon濱崎步，家陣已33歲，近年已絕少出現界潮流雜誌。步姐out咗，取而代之係鍾意染髮又愛玩cosplay嘅Kyary，經常現身如《Zipper》同《KERA》等日本少女時裝雜誌，示範潮女衣着。

偶像激讚
Kyary封Katy Perry做偶像，而早前Katy睇過Kyary嘅MV後，都响留言度話好鍾意Kyary，仲話Kyary搞到佢好high。

街模出身
唔好睇Kyary儍得嚟又癲癲哋，其實勁有料，09年開始由界時裝雜誌《KERA》做街頭snap shot模起家嘅佢，唔只識寫blog吸fans，仲識自己作曲做歌手。百足咁多爪，最近成為各大小時裝騷常客，上月尾先代表日本來港參加《活力日本展in香港》，同AKB48一齊幫日本谷宣傳。最近日劇低迷，連富士電視台都搵佢拍住怪雞型男小田切讓合演新一季日劇《家族之歌》搶收視，難怪日本傳媒都話2012年係Kyary嘅世界。

空降香港
上月尾，Kyary亦曾到香港出任《活力日本展in香港》演唱嘉賓。由於當時剛宣布退隊嘅AKB48主將前田敦子同時來港，所以鋒頭被敦子搶晒，但Kyary照樣落力又唱又跳。

拍怪雞男
喺模界超紅，最近Kyary仲撈過界演日劇，喺新劇《家族之歌》中飾演偶像歌手，搵過氣搖滾歌手小田切讓（中）作曲。據稱處女拍劇嘅Kyary，埋位時竟然冇NG，導演都讚佢有演戲天分。

拍住一姐
爆紅後，Kyary（上）今年已接咗5個廣告，最新一個係夾埋日劇一姐長澤正美同潮媽土屋安娜一齊為洗頭水Reveur做代言人。

輸畀KARA
Kyary剛於前週三（4日）出新細碟《CANDY CANDY》，首週賣出接近一萬張佔Oricon細碟榜第8位，銷量高唔過韓國女子天團KARA已推出兩個禮拜嘅《Speed Up》。

交換衫着
雖然Kyary啲job多到爆燈，但一有時間即去冧仔解悶，早前Kyary被人影到佢同25歲拍過《花樣少年少女》的奀星小谷昌太郎返香閨過夜，有報道指2人性格同嗜好都好夾，不時交換潮流心得，最激係間中會交換衫着。吓，唔通Kyary男友都鍾意玩cosplay扮Katy Perry？

豬扒變靚女
家喺日本紅到爆嘅Kyary，最近被人大起底。原名叫竹村桐子，Kyary細個曾做童裝模特兒，家眼大大嘅Kyary，細個唔只單眼皮，仲係矇豬眼，而且打扮娘到貼地，同家個潮女look簡直差天共地。 ####


《蘋果日報》圖片


早前Kyary影到同奀星小谷昌太郎返愛巢，雖然男方戴晒口罩好謹慎，但一樣俾人認得出。


娘爆13歲 13歲做童裝模特兒的Kyary，唔只矇豬眼同嵋家兩個樣，仲擺埋啲娘爆托腮甫士，點都估唔到潮流教祖以前娘成咁


雖然已貴為潮流教祖，但Kyary依然好玩得，經常喺綜藝節目扮鬼臉，唔怕核突。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄