踏入大門，屋內瀰漫聖誕氣氛，連兩隻狗狗 Hugo（左，威爾斯爹利）和婷婷（右，史納莎）也着上聖誕裝，十分應節。
星悅居
何國鉦 快樂聖誕
臨近年尾，節日氣氛特別濃厚，大家忙於籌備聖誕 party同時，家居布置亦是重要一環。
著名時裝設計師何國鉦（ Dorian Ho）五年前購入九龍塘又一村一個面積千二呎單位，設計走黑、白、灰的簡約路線。特別着重聖誕節的他，每年親自落手粉飾安樂窩。「我成日幫人 design靚衫扮靚，返到屋企就想舒舒服服。間屋愈簡單愈好，可因應唔同節日，去買裝飾品布置間屋。
如果間屋本身已經好 busy，再加其他嘢就會好雜亂。」
何國鉦家居
五呎高的聖誕樹，充滿節日氣氛的裝飾，配合柔和燈光，溫暖舒服，突出家的感覺。著名時裝設計師何國鉦（ Dorian Ho）自小居於九龍塘，對該區情有獨鍾。「我鍾意呢度低密度，靜中帶旺，加上父母都住附近，好方便。」平日埋頭設計的他，回家只希望能放下工作休息。所以他屋內設計簡約，以黑、白、灰為主色調，方便換布置。
為不少名人紅星設計靚衫的何國鉦，與鄭裕玲老友鬼鬼，他更將去年嘟姐所送的英國旗狗狗座椅，放在家中當眼位置。「因為間屋顏色比較素，又到聖誕喜慶日子，所以鍾意襯番啲紅色嘢。」
bear bear聖誕樹
聖誕樹是真松樹，而裝飾則以啡 tone為主，設計獨特，飄出淡淡松樹香味。「布置材料唔一定要貴，除咗 DIY嘅熊仔吊飾，其他飾物喺出口店，或者外國二手市場尋寶返嚟。」
茶几中間放有燭台及布置聖誕樹剩餘的熊仔，與聖誕樹上下呼應。
加工皮櫈
「張皮櫈喺意大利買，我再將朋友送嘅皮，裁做櫈套，扶手柄再釘上唔同動物公仔，好似攬住張櫈咁。」
摩登飯廳
飯廳側面放了鏡面趟門，望落開揚。餐枱擺設因應節日主題轉變，加上華麗黑色水晶燈，簡潔而摩登。「黑白櫈配上灰色牆身，視覺上空間較大。」
尋寶粉飾
每逢聖誕，何國鉦都會為家居度身訂做不同主題，今年亦不例外。「我好多時間都喺屋企，所以會特別花心機布置。聖誕節唔係求其擺下聖誕樹咁簡單，我覺得一定要用心， enjoy個過程。朋友每次嚟到都周圍影相，好似當旅遊景點。」去年出動過萬粒 Swarovski水晶構成 bling bling屋，今年他又有新搞作，以寶貝狗 Hugo的色調為創作靈感，周圍尋寶搵材料，造成獨一無二的聖誕樹。「今年我想望上去柔和啲，所以以啡色 tone為主， inspire by Hugo。其實裝飾品唔一定要貴，好似呢棵喺花墟買嘅五呎聖誕樹，批發價唔使一千蚊，好超值。而 bear bear熊就喺玩具批發市場買，一 pack買成本十零蚊一隻，返嚟自己用線穿住變吊飾。」不論設計衫或家居，他都花盡心思。
鍾情動物的何國鉦，屋內放有不少狗仔擺設及用品。「之前去英國做嘢，因為太掛住啲狗仔，所以就買咗咕𠱸。」
從事時裝設計已有廿年的何國鉦，品牌近年走向國際，自家品牌的相片當然放在客廳當眼位。
古董陀錶
走廊玻璃櫃的上層，放置由陀錶改製的相片夾。古董陀錶由何國鉦的爺爺留低，提醒他時間觀念重要性，極有紀念價值。
觀音放廳
何國鉦自小便信奉觀音，「媽媽同婆婆話我細個身體弱，就將我契俾觀音。直至十年前我婆婆過身，我就戒牛肉。白色觀音係婆婆留落嚟，佢以前每日都會對住唸經，對我意義好大。」
狗狗小天地
何國鉦屬愛狗之人，露台改成的小花園也為他寶貝狗而設，成為一個戶外小天地。「香港地方比較細，要善用空間，多個室外地方，俾狗狗多啲活動空間。我又可以聞下花香。」
朋友私竇
自認宅男的何國鉦，花大部分時間逗留家中。而出名好客的他，一到假日便親自下廚大宴親朋，安樂窩頓時變得熱鬧起來。「人大咗鍾意喺屋企。自從養咗呢兩隻狗，真係當佢哋係仔女，我已經係一個住家男人。我身邊好多朋友做娛樂圈，大家又唔想去多人地方。呢度就成為咗佢哋嘅私竇，飲醉又冇人見到。」為了與朋友更多互動，可以邊煮邊傾，他更花三十多萬打造開放式廚房，無遮無擋。「朋友嚟食飯，我可以一路煮一路招呼佢哋，有時佢哋會企晒喺度睇，大家交流煮食心得。」除了廚房夠開放，他對飯廳擺設亦一絲不苟，務求讓朋友食得暢快。
型格廚房
30萬裝修的開放式廚房，用跑馬地訂購的銀色廚櫃，襯以西門子鋼面廚具，突顯時代感。
應節咖啡機
「我同啲朋友都鍾意食甜品，呢個咖啡機為咗嚟緊開 party用，係聖誕 edition。」
收藏名錶
何國鉦將幾隻極具意義的手錶，收藏在盒中。「大學畢業收到嘅第一份禮物，係爸爸送嘅卡地亞手錶，可能係生意人嘅習慣，我由細到大都係守時嘅人。」
開放式浴室
主人房以深色為主調，透明玻璃浴室，配茶色玻璃鏡櫃門，視覺上空間更大。「依家好興開放式洗手間，方便沖涼 嗰陣可以睇電視，不過我都整定幢簾。」
留言列表
