探熱針
半百莎莉開騷無場爆
七年無開演唱會的葉蒨文，將於本月廿一至廿四日，舉行一連四場《完全是你演唱會》。久休復出，不容有失，莎莉樂於接受各大媒體訪問谷個唱，不過距離開騷得番三個星期，門券僅售出七成，只得最平的$180門票爆滿，與此同時，有名氣品牌搵上門，邀請出席活動，有錢收又可以作最後宣傳衝刺，但莎莉嫌錢腥一口拒絕，冇有怕！
距離開騷尚有三星期，莎莉的票房只有$180平飛爆滿，比起 10月尾先開騷的《草蜢森巴大戰軟硬 Fans演唱會 2012》和早已爆滿的黃子華棟篤笑，差很遠。
（《蘋果日報》圖片）
跳舞出醜
表明演唱會會以勁歌熱舞示人的莎莉，記者會上拗晒腰示範苦練拉丁舞的成果。（《蘋果日報》圖片）
五十歲的葉蒨文，自己包製作，搵來東亞「科水」搞今次演唱會。為了刺激票房，莎莉願意全方位配合，接受各大小傳媒訪問，力 sell演唱會以勁歌熱舞上陣，又預告苦練拉丁舞。做晒順得人，甚至空降亮相無綫只得小貓三四隻歌星到場的《勁歌優秀選》，以及《奧運金牌精英匯演》，十分積極。
莎莉為個唱風塵僕僕，但直至上週五（八月三十一日）為止，距離開騷不夠一個月的時間，票房只勉強七成滿，亦僅得$180平飛售罄，積極宣傳未能幫到手，有人歸咎莎莉年初擔任《 2011年度十大勁歌金曲頒獎典禮》嘉賓累事。
「嗰次莎莉啱啱出番嚟，都未算好 ready，就同班後生（歌手）載歌載舞，跳唔郁，又唱到喘晒氣，點會吸引到觀眾買飛吖！」一名演唱會製作人員說。
嫌錢腥
演唱會包製作，事事自己揸 fit，同逐場計袋歌酬開騷好唔同，今次票房僅賣出七成，只夠收支平衡，同真真正正有錢落袋仍然有一大段距離。
時間所餘無幾，原本苦無谷飛良方，但突然有護膚、時裝同手袋品牌搵上門，邀請莎莉出席公開活動，對方更願意配合，支付莎莉指定用的星級化妝師 Zing要求的天文化妝費，有機會谷人氣同票房，莎莉行行企企便有錢落袋，但她竟然一口拒絕，冇情講。
「莎莉好堅持自己嗰套，因為佢好少出呢類活動，唔想俾外界覺得自己好 hard sell，點樣都唔聽，就算品牌話肯俾阿 Zing化妝錢，莎莉都唔肯。」一名宣傳人員說。企硬嫌錢腥，實質莎莉自己知自己事，要最後衝刺，決定臨急抱佛腳打溫情牌，原本事先張揚演唱會無嘉賓，最後改口安排老公林子祥同繼子林德信同台演出，集家人之力，望能扭轉劣勢。
演唱會銷情欠理想，莎莉焗住搵老公同繼子林德信做嘉賓救亡，一家人齊整見人已是 05年阿 Lam的演唱會慶功宴上。（《蘋果日報》圖片）
奧運金牌運動員訪港，莎莉毫不介意淪為陪襯，與林丹等羽毛員同台打波及唱歌。
今年初為無綫頒獎禮做表演嘉賓，表現未如理想，為演唱會慘淡收場埋下伏線。
復出開演唱會，莎莉堅持己見，凡出席公開活動及上電視節目一定要用動輒過萬收費的 Zing化妝。
莎莉對上一次紅館開演唱會已經是 05年，同港樂合作，當年只是以歌會友，無須載歌載舞，舒服得多。（《蘋果日報》圖片）
留言列表
