豪語錄
不能說的秘密 何嘉麗
本刊喜歡測度別人，今次亦帶着疑問訪問何嘉麗。
在八十年代憑主持港台節目《三個小神仙》及《只此一嘉》當紅的 DJ何嘉麗，在事業如日中天時選擇離開電台，之後在中電、證監會和九巴做公關。今年五十一歲的她，其實在九巴企業傳訊部做主管再做多幾年便可以退休，但上月廿四日她偏偏離開人工高福利好的九巴工作，𢭃少啲都要重返港台開咪。
但如果何嘉麗對做 DJ有鋪癮，當年又為乜急流勇退，偏偏大勢已去才回來主持心靈節目，實在吊詭。
吊詭二，去年和她一起主持《三個小神仙》的舊拍檔鄭丹瑞、林珊珊在紅館搞《 30小神仙吹唱會》，何嘉麗無現身。若然她一直有心復出，至少應該行出來為自己鋪路，她卻偏偏不演出，反而做了其他港台第二台開台三十周年的特備節目，這更令人懷疑他們反了面。
究竟何嘉麗為乜復出？
打救倦人
何嘉麗是一個怕悶、靜極思動的人。當年她轉行去中華電力，之後做過證監會企業傳訊部和九巴企業傳訊部主管，原因是畢業於浸會傳理系的她，想知自己的能力。
「我讀 journalism，要 take公關科，要學以致用，於是寫信見工，中電又請我。我鍾意做 corporate image，所以做公關。」兩日前她已開咪，她的節目是頂晚上九時開始的麥潤壽《星空奇遇鐵達尼》，節目轉咗一次人，現在由何嘉麗接棒。是她想做的時段嗎？「不想太早起，太夜唔使瞓咩，現在又約不到人食飯，我唔係有好多自由去揀。」
那又為什麼復出？「做咗廿多年（公關），唔希望窮途末路才轉，我自己都唔想悶。上個月去以色列朝聖，讀經讀到用言語扶助疲倦的人，我諗會否也是自己的方向，嘗試用我靈活的說話技巧去援助疲倦的人。」
犯十戒
何嘉麗不單說話動聽，她唱的歌如《無可奉告》現在亦受落，不愧當年出過八張唱片，八五年更獲十大中文金曲最有前途新人獎銀獎，贏咗鄺美雲輸俾張學友。當年她主持的《只此一嘉》，收聽率穩坐第二，在車淑梅的《晨光第一線》之後，現在大家也期待上週一晚已開了咪的她表演如何？何嘉麗輕鬆地說。
「收聽率從來不是我考慮，我無所謂升或跌，但點樣做一個善向節目又唔趕客就難。」
她向善的方法，還包括辭去九巴後，獵頭公司找她做醫院公關，身為天主教徒，在聖神修院讀了神學的她，即時問醫院會否做墮胎手術？
「醫院話唔做非法墮胎。墮胎無非法與合法，胎兒是生命，我要利用這機會宣傳一下，對方以為同修女傾緊偈。」
何嘉麗還自爆差不多犯齊十戒，有咁嚴重？「迫人做嘢逼得好緊要，都可能殺咗人，因為都市病、癌病也來自壓力。又譬如無行邪淫，但某某女星影了張相你話 send俾人，某程度上也是 promote呢啲嘢。依家唔講大話，盡量唔講。」
慈祥咗
何嘉麗出名寸嘴，和她共事的同事也嫌她心急，要求高，令人緊張。
電台同事見她重返，也帶疑問說：「想睇佢是否慈祥咗。」港台電視部助理廣播處長張文新很早已對她說，如果何嘉麗識做人會好掂，要學林珊珊，種種外圍因素令人相信何嘉麗惡哽，加上節目受歡迎，自然有恃無恐。她也承認說：「做電台好處係，節目受歡迎就無人理你，以前唔鍾意就行咗去，呢個時間唔係我做邊個做？（但你又做到公關？）代表公司發言時，我就以公司做依歸。但日常會做番自己性格。」
又不能怪她惡，做人要有獨特性格及見解才可以上位，結果何嘉麗的鬧人節目被讚好聽，今次會否重施故技？「以前在電台，好似廿四小時講每一句說話都要好到，當時我鬧咩我唔知，有人寄番錄音帶俾我，我整斷咗餅帶，唔敢再搞，怕斷晒似涼粉。但神學對自己有影響，好自然會諗人哋會否唔開心，依家未必鬧得咁狠心。」
收聽率從來不是我考慮，我無所謂升或跌。
鬧人好聽
是否要學林珊珊？「我唔覺自己唔識做人，又唔覺佢好識，我用我方法生存到，我方法不是好也不是太差。」
她同期有車淑梅、鄧靄霖、鄧慧詩、區瑞強和伍家廉。和鄭丹瑞、林珊珊也有聚會，那為什麼不出席《 30小神仙吹唱會》？「我當時做緊公關，唔通一秒鐘喺台上跳紮紮，跟住下一秒就話九巴點點點，好似好精神分裂。」
在別人眼裡，他們疑似反面？「大家大人，你唔會知我嘅感情，我個人係咁，唔係時時要見，但有咩事大家會明白，我哋嘅默契普通人唔會明，你唔會想揸爛少年嘅美好回憶。」
上月以色列之旅令她有啟發。
當年她和張學友也是唱得之人。
自家飲品
她在港台的美好日子，還包括以前電台裡有一間酒吧，有一杯檸雜加梳打水，是以何嘉麗命名。
「有個 bar好英式，有時不想食碟頭飯就在這裡食飛碟三文治，有次落到去好不開胃嗌咗杯飲品，第二次飲唔返嗰種味道，我自己溝咗一大輪叫嗰度嘅葉生記住個味道，我以後來到就飲這杯，搞搞吓杯嘢變咗叫何嘉麗，仲有杯混血何嘉麗和夏妙然。」
何嘉麗的戀情，一直少談，只知曾和導演區丁平（毛舜筠現任老公）拍拖，現在的感情生活如何？「依家有拍拖，佢係圈外人。結婚是否人生終向？有小朋友係 blessing，無亦可以做好多嘢，如果我有小朋友可能唔可以做這決定，因為供小朋友要錢，現在可以好豪唔使賺咁多。」
在九巴時佢傍住上司陳祖澤出席記招。
結婚是否人生終向？
有小朋友係 blessing，無亦可以做好多嘢。
人人如是
何嘉麗很早時已傾過 Radio是否已死的問題？她說：「總有班人鍾意聽。」她還樂觀說：「做夜晚節目唔應該覺得自己做夜晚節目，美加可能早上聽緊。你仲話你寂寞嗎？唔係好得。」又例如她話自己經常遲到，她可以大有理由說：「準時有咩意思，左手揸着腿蛋包，右手揸着奶茶，無意思。老闆知有咩事發生，我一定喺度。」再和鄭丹瑞談他對舊拍檔何嘉麗的感覺，他有個性話：「佢哋當時初出茅廬，只有我俾壓力佢哋，我唔覺佢寸嘴，佢後期好倔，都只是想做得好。佢仲叫我聽佢節目俾意見。」
其實成名又點會無個性。
四歲的何嘉麗。
撰文：李苑欣
攝影：葉志明
化妝、髮型： Yan
部份服裝提供： HUGO BOSS
場地： The Nooch Bar@麗悅酒店
留言列表
