入TVB前已認識陳敏之，兩個識咗接近10年，情同姊弟。
《缺宅男女》本週結局篇，彈出嘅唔係鍾嘉欣吳卓羲，更加唔使講三哥同郭羨妮，而係由頭乞人憎到尾嘅關二哥同關二嫂！關二哥劇中又廢又鵪鶉，仲搞到有抑鬱，估唔到現實中梁烈唯（唯唯）唔只開朗活潑又搞笑，而且人緣超好勁多friend，路見不平仲會即刻喺微博開火喪鬧。醒目又有火，第時肯定唔會俾老婆恰啦！
《缺宅》結局篇講關二哥兩公婆為咗呃埋阿媽間居屋而私自轉名，搞到四兄弟姊妹反面收場。縮骨又自私，但唯唯真人其實不知幾有義氣，得閒會落表哥跑馬地間「大少爺茶餐廳」幫手執頭執尾，連車馬費都唔收，仲不時喺微博免費宣傳，兩老表感情好過親兄弟。
群星拱照
一場親戚乜都冇計。入行10年、拍劇8年嘅32歲唯唯對朋友原來都好好，所以圈中有大量真心friend，由前輩黃日華、苗僑偉，到歌星幫草蜢張智霖，連索腿天后陳敏之都當佢自己人，經常圍埋一齊吹水食飯。人面廣，除咗因為識做人，唯唯契姐、蔡一智老婆周雪芳亦介紹唔少相熟藝人畀契細佬，喺唯唯微博亦見到佢同劉華等巨星合照！夠襟撈，但唯唯亦曾經做過過街老鼠，人見人憎。佢話初入TVB時以為自己好紅好有戲，19歲已經做過電影男主角，高峰期試過一個月閒閒哋搵6、7萬，年少囂張搞到冇監製肯用，好在陳敏之同陳豪點醒佢，先肯收斂脾氣唔再自大。咁多人撐，唯唯上週五回應：「我好好彩身邊有好多好朋友，同埋我觀察過華哥同三哥點樣待人接物，加上自己大個仔，又睇咗好多關於哲學嘅書，例如《人性的弱點》同《與神對話》，睇完就覺得自己其實好渺小，唔應該將自己放到咁大！」知錯能改，關二哥抵你紅！
《缺宅》一出街俾網友話抄《蝸居》，唯唯即時喺微博反駁，敢言過其他演員多多聲！
排骨變肌佬
初入行時奀到似支竹，但近年唯唯積極做gym操肌，終於練到有6嚿腹肌，遲啲出街嘅新劇《飛虎》，唯唯仲會同羅仲謙、王浩信齊齊晒肌！ ####
同五虎其中兩虎相熟，梁烈唯去劉華演唱會探班，輕易埋身影合照。
同陳豪(右一)拍過《心花放》、《胭脂水粉》等劇做埋好朋友，阿Mo當年仲點醒唯唯，好兄弟！
唯唯同契姐夫蔡一智(右一)感情好，成日約埋飯局。
加入晨曦足球隊後，同黃日華三哥等更加熟絡，唯唯仲學埋前輩嘅優點，成個人成熟晒！
同女友Tina拍拖9年，兩人經常喺微博sweet爆留言。
由排骨變鋼條，唯唯家成日幫雜誌影肌相，身形靚過大部分一線小生！
未結婚生仔，唯唯一得閒最鍾意攬住愛犬曬太陽，超級黐家。
操肌成功，不過上年幫TVB影嘅大隻廣告相，一張都冇出街！
留言列表
