來路貨
史上最變態之 SUPER HERO
人人都話無綫嘅《神探高倫布》同《金枝慾孽貳》重口味,唉,當你睇過日本電影《變態超人》後,就會知道無綫所謂嘅重口味係幾咁小兒科。
先唔講劇情有幾低俗,單係戲入面嘅超人扮相,包你 O晒嘴。美國嘅超人係身着貼身超人衫,而鈴木亮平飾演嘅超人呢,每次出動,必先笠上女人底褲做面罩,再着住連體底褲同絲襪。嘩,後面打出個八月十五,前面呢,只係用塊布仔包住「小小超」,真係重口味到你暈。
話題電影《變態超人》(香港 7月 25日上映)係改編 90年代日本人氣漫畫家安藤慶周嘅《究極﹗瘋狂假面》。真人版電影由當紅男星小栗旬監製,本來小栗旬係想自己上陣,可惜唔單止老婆山田優反對,事務所都驚佢嚇走廣告商,佢惟有搵老友鈴木亮平頂上。
鈴木亮平飾嘅高中生色丞狂介,因做刑警嘅老竇捉賊殉職,從而激發亮平要做一個正義嘅人。喺一次事件中,亮平因為無意中用女人底褲笠住個頭,即產生特異功能,變為儆惡懲奸嘅正義英雄。
鈴木亮平飾演嘅變態超人,打扮跟漫畫如出一轍,絕對原汁原味。
張家輝為電影《激戰》狂谷肌練成嘅完美身形,竟被網友惡搞,真係前世。
低成本 高收入
因為劇情真係幾變態,日本將佢定為兒童不宜,所以只有 12間戲院上映。不過世事真係估佢唔到,電影喺日本及台灣上映,竟然吸引大批師奶粉絲,票房收入竟比預期高出逾十倍有多。事實上呢部電影成本只係大約 400萬左右,依家埋單計數,不單回本,仲賺到有突。名副其實低成本、高收入。
男主角鈴木亮平由泳褲模特兒轉入演藝界,可惜浮沉咗十年有多,終於得老友小栗旬帶挈,憑《變》人氣急升。但戲中太多裸露鏡頭,令身為一子之父嘅亮平話拍攝時,真係有啲尷尬喎。話係咁話,依家日本很多製作公司想搵佢合作,威水到震呀!
超人懲奸方法唔係用刀、槍、棍,而係將惡人臉部貼緊「小小超」,呢招叫做「精神打擊」喎!
30歲嘅亮平着住校服扮高中生,睇起嚟確實「年齡與相貌」不相稱。唉,寧願睇佢兩條人魚線。
超人最變態、亦係最強一招,係「地獄風火輪」。
女主角清水富美加拍呢場戲,雖然感到尷尬,但亦自嘲話大飽眼福喎。
超人不停四處儆惡懲奸,誰不知最奸嗰個,竟然係學校入面道貌岸然嘅教師。
香港𡃁模近兩年興起拍妄攝,其實亮平早喺五、六年前已經拍啦。
被封為「日本陳妍希」嘅清水富美加,因《變》而受關注,佢亦識打鐵趁熱,推出處女寫真。
撰文:姜培綺
留言列表