劉雅麗自言性格和外形，不適合在娛樂圈生存，但自己在歌影視發展過，算是幸運兒。
好男好女 未有《那些年》之前，港產片一樣有這樣的奇跡，九四年上映的《我和春天有個約會》由攝時間播特別場，至映期長達一百四十二日，票房二千一百多萬，無人識的主角劉雅麗，由此彈起。擺明不是靚女的她，在偶像派橫行的天下，她也紅過一年半載，拿下音樂和電影新人獎，及舞台劇女主角獎等，算是異數。劉雅麗在歌影視兜了一圈，高峰與低潮，入行廿年來她也嘗過，由春天演到秋天，即將再演姚小蝶，百般滋味在心頭。四十三歲的劉雅麗，跟劇中姚小蝶一樣，事業和愛情，總是不能並存。兩年前跟拍拖十二年的男友分手，甩拖比拍拖開心的她，距離結婚與生育的時限愈來愈遠，她卻開懷笑道：「劉華仲教我雪住啲卵先。」
無計可施
一開口，劉雅麗已說自己不是靚女，因為皮膚差，多年來困擾著她，「我唔係天生麗質，人哋十八歲最靚，但我就最醜，爆晒瘡。」因為內分泌失調，十來歲已背住這個包袱，不論中醫、西醫，任何偏方，以至激光、微創手術等，她通通都試過，「依家比以前好咗好多，以前睇電視見到自己個爛面樣，真係想喊咁滯。」奈何造物弄人，偏偏她是做幕前，靠樣搵食不行，幸好她有一身好本領，演技和唱功搭夠，捱了廿個年頭。畢業於玫瑰崗中學，十七歲便考入演藝學院，九○年加入香港話劇團當全職演員。媽媽曉華是六十年代歌手，自小熏陶，因為識唱歌，劇團讓她登上做《我》劇女主角之位，一炮而紅。可惜，當時她剛失戀，「當時排緊劇，剛剛失戀，第一次拍拖真係好hurt，成世人最瘦都係嗰次，瘦咗十幾磅，命運好得意，有事業就無愛情。」
解脫
向來少談感情的Alice，上月在《我和秋天有個約會》記招上，自爆跟拍拖十二年的男友分手兩年，問及因由，Alice爽快的說：「係啊！我提出，依家好開心。」她形容，開心是來自解脫的感覺，「完全無第三者問題，我係金牛座嘅人，唔喜歡變，一直以來有好多問題，無去解決，去到某日忍唔到，同對方講分手，佢竟然話你鍾意啦，淡到咁，我喊咗一鑊咁大把。」男友去年移民西雅圖，臨走前兩人再見亦是朋友，吃了餐飯餞行。拍過兩次拖，年屆四十三歲的她，對終身大事仍不着急，「我向來都無plan，唔驚死至驚有病，可能將來得番自己一個，不過我都有個同父異母的細佬。」說得瀟灑，因為媽咪是人板，「阿媽同阿爸上個月尾，去拉斯維加斯旅行，打電話番來同我講，兩個即興去咗註冊結婚，佢哋一齊咗三十幾年，阿媽六十幾歲先結婚，我都仲有希望。」已屆生育限期的Alice還笑道：「劉華仲同我老豆講，叫雅麗雪住啲卵先，但我無打算咁做，自己唔係太想要小朋友，拍咗十幾年拖，要生都生咗啦。」
春去秋來
感情無望，但人生總有希望，Alice早已看透，自小想做歌星的她，當年參加過兩次新秀但無入圍，以為自己唱得差，向戲劇進發，卻因演《我》劇爆紅，舞台跳入大銀幕，成為票房神話，唱歌機會自然又搵上門，出過兩張唱片，各大電台的新人獎她都拿下。但事實告訴她，這行是講彩數，連劉媽媽也潑冷水的說：「唱歌，只會捧偶像派，你又唔靚女。」幸好Alice睇得開，從沒強求，「我覺得自己好幸運，可以揀興趣當職業。」過往她拍過電影、電視，開過演唱會，就如師兄黃秋生所說：「雅麗，你在舞台上最靚最有魅力，你係屬於舞台。」前前後後她演的《我》劇，已超過一百場，這次因編劇杜國威的召喚，「四朵金花」再次重逢，下月她將與蘇玉華、羅冠蘭和馮蔚衡演出舞台劇《我和秋天有個約會》，由春天演到秋天，人與角色也變老，她豁達的說：「演戲只會愈老愈順，我會向《桃姐》進發。」 ####
劉雅麗憑《我》片，九四年獲金像獎最佳新演員，旁為獲最佳男配角的陳小春。（《蘋果日報》圖片）
九二年演舞台劇《我和春天有個約會》，令劉雅麗一炮而紅，同劇的蘇玉華（右一）和羅冠蘭（右二）相繼在電視圈發展。
當年高志森帶劉雅麗入電影圈，更成為她的經理人，兩人曾一度傳不和，但二人至今亦師亦友。
回復單身的劉雅麗，對愛情睇得開看得淡，她笑言媽媽六十幾歲才註冊結婚，她還有時間。
劉雅麗的爸爸劉山本，和媽媽曉華相處了三十多年，上月尾在美國旅行時，即興註冊結婚。
畢業於第三屆演藝學院表演系的劉雅麗，演技上經常獲導師鍾景輝指點。
留言列表
