close
醒吓啦！（設計對白）
上流社會個個都要靚要威，有啲講到明兼做到出晒面；亦有啲鬼鬼祟祟，又要威，又要戴頭盔。
何鴻燊 瞓住過節
賭王何鴻燊有四房子女，本週日父親節就俾三房mark實攞晒彩。晚上七時半賭王在三太、女兒何超雲（左二）、超蓮（右二），及超雲男友陳山聰（右一）陪同下，去四季酒店龍景軒慶祝，出發時賭王精神奕奕在車廂內揮手，不過一落車就全程瞌眼瞓，三太見狀上前拍賭王說：「起身啦！你好攰咩？」
飯後
食完飯叉足電，賭王成個人精神晒，不過兩行鼻水流咗出來，三太塞張紙巾俾賭王就算，好彩仲有超蓮幫老豆抹鼻涕（右下圖）。問佢哋送乜俾老豆，超雲話：「送帽，仲有套衫，夏天先著到。」此時超蓮驚蝕底，細細聲提家姐：「我都有份（夾）。」
鄺淑嫻 撞到正
李民橋的太太鄺淑嫻，上週四首次以「成長希望基金會」籌委身份現身晚宴，還透露自己好喜歡小朋友，當問她何時生B？她卻說：「多謝，唔好問呢啲啦。」為咗呢個晚宴，她一早準備咗白色ELIE TAHARI的連身衫褲，誰知卻跟同日出席美容院開幕的2R黃婉君（左圖）撞衫撞到正！
雷林靜怡 拒絕扮嘢
九巴後人雷兆光和太太林靜怡，上週四晚出席主題DIY建築的「成長希望基金會」晚宴，雷生在公司借了一套工程衫，頭盔、眼罩、熒光背心上晒身，但老婆就唔肯扮醜，要著Valentino背心裙以靚樣見人，雷兆光話：「借咗兩件工程衫，好大件佢話著唔到。」
今期新星 林利兒
林建岳和前女友陳浥萍（圓圖）所生的女兒林利兒，轉眼間已十二歲，最近保險公司英國保誠在六月初出了條廣告片，搵咗十二位小朋友講咩叫健康，利兒在片中說：「儘量早啲瞓。」利兒在廣告片中只是出鏡幾秒，所以上週六在葉麗儀×姚珏×陳潔靈演唱會中，問陳浥萍有冇睇過條片，佢只話：「Ballet學校幫佢決定，我啱啱返嚟未睇。」 ####
全站熱搜
留言列表
