Veronica帶齊相機及腳架,又𠌥身又踎低影相,她說在英國習慣坐低拍攝,「英國草地落完雨好濕,無論幾污糟,我好多時坐低影番上嚟好睇啲,我鍾意直影。」
名氣生活
林煒珽 捕風捉影
前男友啟發
問林煒珽( Veronica)在大名娛樂的職銜係乜?她風趣說:「打雜。演唱會、藝人管理、員工問題都要跟。」工餘時她則化身攝影師,上月她便應朋友邀請影時裝騷,事前她輕描淡寫說:「影吓酒會情況及影模特兒行騷。」臨場她卻不慎跌閃燈又跌鏡頭,她笑話:「你哋個攝影師喺我身邊,佢影我時打晒燈,搞到我好似唔 professional,所以緊張。」但 Veronica亦覺得自己影得麻麻,「可能我未試過影 fashion show,下次影要睇佢哋彩排,可能影唔識嘅人我 predict唔到佢行路姿勢。」
Veronica六年前開始影相,「以前喺英國去邊都帶住相機,因為英國有好多嘢影。」愛影相全因前男友啟發,「前男友教我影相,就係咁鍾意咗影相。」之後她再在紐約 Parsons School of Design修讀短期攝影課程,她最初先影風景後開始影人,「我之前影風景,後來開始悶要影人。最想邊方面都影到,人哋叫我,我都影到就得。」她的攝影偶像有印尼攝影師 Hengki Koentjoro,「佢專影黑白相,可以 show到啲 mood出來。」問她投資了幾多錢買攝影器材?她坦言:「無計。」部分「架生」是朋友借的,「啲朋友好好,佢哋去旅行才用,平日放喺度倒不如借俾我。」
農曆年間,她和大家姐林煒珊(右一)、二家姐林煒琦(左一)及父親同去南非旅行。
整個騷得她一個大會攝影,都咪話唔緊張。
Veronica即場叫模特兒擺甫士影多幾款硬照,「佢個樣幾 sharp。」
影景唔影人
三年前英國學成歸來的她,在開 wine bar加畫廊的朋友提議下開相展,展出十二張她在不同國家影的風景照,結果朋友買晒她的作品。「差唔多全部相都有人肯買,千幾蚊一張,全部係 friend,收錢好奇怪,所以佢哋鍾意就俾晒佢哋。」
早前農曆年她跟父親、兩個家姐及二姐夫去南非玩了八天,家人就靠她影相,她笑瞇瞇話:「得我一個有相機。」南非之旅她更首度影動物,「因為有去 safari。」但相片只限風景相,大少(林建名)個帥樣呢?她蠱惑說:「無影屋企人,在香港都可以影,去旅行當然介紹當地,影當地人。」林建名把口就投訴個女不替他拍照,但查實就十分支持,更打算在公司做個 studio讓她練習。問 Veronica會否幫旗下藝人影相?她猶豫一會說:「睇吓點,要同嗰個人熟先會影得好,公司同事影得咁好唔使爭。」
不愛飲酒的她亦隨大隊參觀酒莊,期間當然亦忍不住拍照,「葡提子好靚。」
身為馬主的林建名,南非旅程第二日亦睇馬,「佢哋啲馬好大好靚,我唔鍾意動物都覺靚。」
Veronica專登去馬拉人聚區的 Bo kaap取景,「屋企人唔肯去,佢哋喺車上等我。」
旅行時,姐夫友人家中的一頭狗,也變成拍攝對象,「有籐有花好寫意,間屋係我就好。」
撰文:李苑欣
攝影:葉志明
協力:羅婉玲
留言列表