close
同你吟一吟
阿 B細女 玩足半個鐘
已經六十歲嘅阿 B鍾鎮濤，雖然仲有心有力，同范姜生多兩個囡囡，但講到要體力勞動行出行入湊女，阿 B始終有心無力。
上個禮拜阿 B做湊女公，帶住鍾懿同鍾幗兩姊妹，到金鐘太古廣場買新鞋。幫襯法國芭蕾鞋品牌 repetto，阿 B由得兩個女自己去貨架搵鞋試，大女鍾懿就快九歲，亦比較聽話，試完鞋會企响爸爸面前攞意見，唔會四圍走，相反細妹鍾幗冇時停，明明試緊鞋，轉個頭攞起支夏威夷小結他（ Ukulele），彈歌仔引 sale姐姐注意，姐姐問佢借嚟玩，鍾幗嘟長個嘴收埋支結他唔肯俾。
阿 B全程坐梳化以靜制動，好在等咗半個鐘，老婆范姜終於出現，細女見到媽咪，即刻搶佢個 Chanel手袋四圍走，媽咪冇錢埋單，阿 B唯有攞銀包碌卡。其實邊個俾錢唔重點，最緊要有救兵，幫佢手睇實兩個女。
個樣勁攰嘅阿 B（箭嘴），入到鞋店坐响度唔願郁，大女鍾懿試完鞋，自動波行去爸爸身邊攞意見。 
坐唔定嘅鍾幗，攞住支夏威夷結他四圍走，之後又收埋响背脊，唔俾 sale姐姐掂。 
玩完結他，鍾幗連媽咪嘅 Chanel手袋都唔放過，攞住四圍走，阿 B同范姜企响收銀機面前叫佢行埋嚟都唔聽。 
撰文：八珍
全站熱搜
留言列表
