無綫繼晒冷騷《2012翡翠歌星紅白鬥》、《玩轉三周1╱2》及港姐爛尾普選後又有新搞作，構思製作一個如同中央台年度盛會的港版春節晚會，集中、港、台、韓國、星馬、澳洲各地人氣歌手力量跨年演出。賀歲節目長達4小時，初步擬定於來年2月9日（周六大除夕晚）在電視城內進行，歌手除了獻唱外，更加入趣劇、抽獎及玩遊戲等歡樂環節，務求熱熱鬧鬧慶蛇年。就算五大唱片跟無綫的版權問題仍未解決，無綫都冇有怕，因為再由百足咁多爪的曾志偉、曾寶儀父女齊齊「吹雞」，港、台兩地歌手都會畀足面，無綫非戲劇製作總監余詠珊說：「香港方面，我哋想搵四大天王、天后鄭秀文扯頭纜！總之做到好大型。」
TVB綜藝科總監余詠珊，今年發動的港姐普選爛尾惹來風波，但毋須負責任，因為老闆陳國強Buy她鬼主意多多，亦要依賴她在綜藝節目方面「食胡」。余詠珊曾誇下海口，表示希望以3年時間追回近10年的成績，無綫果然坐言起行，繼今年7月歌手舉行晒冷騷《2012翡翠歌星紅白鬥》、8月搞《玩轉三周1╱2》及港姐普選後再有大Project，現正着手籌備一個超大型春節晚會，香港以外地方的歌手都有得玩，以大卡士大堆頭取勝，就算五大唱片公司唔參與，都唔會受到掣肘。再者，隨着謝安琪、薛凱琪離開五大唱片，演出人腳漸多，而環球大粒歌手李克勤屬無綫「契仔」，阿倫和志偉又有交情，做唱歌以外的事，未必會太決絕。
節目勁過台慶余詠珊求證時，她直認不諱：「啱啱去完台灣開會洽談，今次會同TVBS聯手一齊搞嘉年華晚會，如何合作有待構思，但卡士陣容一定會好勁，比起台慶更加大型，仲會喺電視城做直播。我哋會出晒力碌人情卡，志偉一定走唔甩，香港方面希望可以搵到天王、天后，四大天王同鄭秀文係目標人選。由於今次涉及好多海外歌手嘅複雜版權問題，今個節目無綫未必可以賣到埠，間接緩和五大唱片同無綫嘅版權爭議，可能造就到五大唱片歌手嘅演出。」
余詠珊表示，晚會還會邀請賀歲片演員加入演出。
劉德華：未收到通知，睇檔期。
郭富城經理人小美：（斬釘截鐵）唔做，無時間！（點解咁決絕？）不願置評！
張學友：該檔期應該有工作在身，唔喺香港。（預先錄影呢？)有待了解演出形式。
黎明：未收到無綫通知，睇下咩形式，原則上都感興趣。
陳慧琳：都有興趣演出嘅，但要睇唱片公司同無綫傾掂未。
鄭秀文:睇檔期，配合到都會做。
留言列表
