《黃雀飛》現正密鑼緊鼓地排練，韋少力表示：「我哋劇團想申請藝發局資助，但一直唔批，冇政府資助惟有墊支住先，好彩每次演出都爆滿，未蝕過錢。」
搜尋氣
六四劇《黄雀飛》監製：我一定喺黑名單入面
六四「 24周年」，將於 7月上演的舞台劇《黃雀飛》，由天安門學生流亡講到香港人更貼身的反國民教育、佔領中環等話題。《黄雀飛》亦曾走進校園，讓更多學生了解真相。
兼任《黃雀飛》編劇及監製的韋少力，正職平面設計師，卻又是支聯會義工、前民陣和人權委員會小組召集人，身份多多，她稱目的只有一個，「等大家親自去判斷六四！」
「六四事件」時我啱啱 18歲，後生一輩應該喺唔同渠道認知呢件事，好似我都好想知南京大屠殺係咩事，就去搵資料、睇紀錄片，大家都好應該親自去判斷「六四」，我哋去過 20間學校演出，最遺憾係入唔到自己母校，佢哋話因為攞咗教育局啲資助，所以唔方便喎！
我參與民主運動 10年，以前媽媽話你搞乜都好，唔好搞共產黨。因為文革時期阿公係校長，媽媽係老師，屋企人被捉去虐待，媽媽睇住婆婆跪玻璃，佢經歷過，好驚共產黨，我亦只敢做啲阿四式嘅義工工作。
爸爸早過身， 06年媽媽離世，我 07年真正做民主工作，呢幾年更感受到類似紅衞兵嘅恐怖，我一定喺「黑名單」入面，只係有關方面冇啟動個機制禁我過境啫，每年 6、 7月個電話好明顯俾人勾咗線，好似打咗落地獄咁㗎，講嘢有回音重複自己嘅說話，有時技術好差會 cut咗線，反而阻住我講嘢，我索性對住個電話講你可唔可以技術好啲唔好阻住我呀？
親人得番家姐同姐夫，佢哋唔多關心政治，而搞舞台劇係想多啲人關心香港，家姐從來唔理，但上年佢睇完個劇之後，話原來我知咁多嘢！今年佢話會嚟 7． 1遊行，佢平時咁冷淡都有改變，證明個劇係成功。
10年上演的《在廣場放一朵小白花》，描寫天安門學運，去年重演，韋少力親自設計舞台效果，用簡單的布置重建天安門場景。 
上年公演的《讓黃雀飛》講述拯救民運領袖的「黃雀行動」和新一代「反高鐵後」事件，更在 20間中學公演。而今年重新改編的《黃雀飛》，亦會繼續在各中學上演。 
《黃雀飛》將於 7月 26日至 28日在牛池灣文娛中心劇院演出 5場，韋少力指演出日期是配合佔領中環行動，到時劇本或會根據事態發展而修改。
採訪、撰文：何志衡
攝影：鄭明川
留言列表
