江若琳現身在深圳拍攝兩套大陸劇《愛閃亮》及《待嫁十年》,出碟一事起碼要到出年先成事。
真面目
走為上着 錫晒嘉欣 BB 江若琳嬲爆解約
原本都算人強馬壯嘅星煥唱片,有一姐謝安琪、鍾嘉欣、江若琳同許廷鏗等,不過揸弗人何哲圖( Herman)偏愛嘉欣 BB,將大部分資源畀晒愛將,冷落其他歌手,搞到歌手大逃亡!
繼關心妍、農夫和陳法拉先後離開,最近連江若琳都頂唔住,主動提早解約。加盟星煥差唔到兩年嘅江若琳,只係出過一隻碟同兩個簽名會咁大把,上年頒獎禮又幾乎捧蛋,搞到江若琳經理人兼寰宇老闆林小明嬲到震,就算江若琳仲有一年約,都寧願賠錢走人。
何哲圖最寵愛鍾嘉欣, 08年新城頒獎禮慶功宴上,嘉欣亦被拍得與何哲圖抱抱慶祝。《忽然 1周》圖片
11年江若琳簽約星煥國際,簽約 3年,當日老闆林小明亦有現身撐場支持。《蘋果日報》圖片
出咗碟冇人知
11年江若琳簽約星煥時,開晒記者會宣布,可惜雷聲大雨點小,兩年嚟只出過一隻廣東碟《天空之樹》,之後舉行過 2次簽名會,不過宣傳不足,銷量強差人意。
一心靠無綫幫手嘅江若琳,只被安排上《勁歌》及《明愛暖萬心》呢啲冇錢騷;反觀何哲圖錫到燶嘅鍾嘉欣,一年一碟,今年 11月又再出第三隻碟,何哲圖更公開承諾幫鍾嘉欣 9月開個唱,公司歌手梗係眼紅啦!不過,最令寰宇不滿嘅係,在四台頒獎禮上,江若琳近乎捧蛋收場,只在分豬肉的新城攞咗個「勁爆改編歌曲」,據知頒獎禮之後,林小明曾搵何哲圖「傾偈」。
捧愛將嘉欣 BB係無綫親生女,加上何哲圖力谷,令嘉欣喺樂壇成績拍得住同門師姐謝安琪。
鍾嘉欣有何哲圖射住,每次簽名會都喺大型商場舉行,而且舉行次數又比江若琳多。
未加盟星煥前,江若琳由寰宇出碟, 07年至 11年分別出過 1隻廣東碟和國語碟,當年都賣到幾千張。
提前一年解約
雖然江若琳同星煥仲有一年合約,但據知寰宇寧願賠錢走人。知情者說︰「星煥都唔會谷 Elaine(江)㗎啦!嘥時間,不如早啲解約,搵過第二間唱片公司好過啦!」除咗江若琳,一哥許廷鏗、欣宜今年都滿約,如果星煥留唔住人,睇怕只可以專心做嘉欣 BB。
記者致電身在深圳拍劇嘅江若琳,對提早解約一事,她說:「係離開咗星煥,不過都算和平分開!(覺唔覺得公司偏心鍾嘉欣?)都唔覺,公司有自己嘅政策,做歌手好被動,都有其他唱片公司接觸,但嚟緊只會出國語碟。」
冷處理江若琳出碟期間除咗有兩個簽名會外,都係出席吓《勁歌金曲》及無綫冇錢騷,宣傳明顯不足。
上年頒獎禮江若琳只在新城攞過改編歌曲獎,同林欣彤、張智成、陳思彤一齊分豬肉,其他頒獎禮全部捧蛋。
江若琳已離開星煥,而星煥網頁亦相當快手,即時將江若琳個名剷走。
專攻影視
江若琳唱歌事業未理想,反而影視就愈撈愈掂。上年同杜汶澤合作嘅《高舉•愛》提名今年金像獎「最佳女主角」,而大陸劇更連續接拍 3部,最近同吳卓羲忙拍《待嫁十年》,之後會到大馬宣傳新戲《結婚那件事之後》。
江若琳憑《高舉•愛》首度提名最佳女主角,雖然最後輸咗,但能夠同楊千嬅、周迅爭影后,好過攞新城豬肉獎啦!
江若琳現於深圳為大陸劇《待嫁十年》埋尾,劇中同吳卓羲談情。
早走早着
星煥原本歌手眾多,但隨着嘉欣 BB愈嚟愈得老闆寵幸,搞到其他歌手眼紅走人,現時有實力嘅除咗嘉欣 BB,就只有謝安琪,而年尾約滿嘅許廷鏗亦密謀轉會。
許廷鏗
今年底將會約滿,據知太陽娛樂嘅 Paco對佢好有興趣,好大機會轉會。
鄭欣宜
欣宜同何哲圖關係一般,宣傳亦明顯不及鍾嘉欣,故今年約滿之後亦好大機會唔留低。
陳法拉
農夫
上年 8月農夫原本喺九展開個唱,但最後因銷情不理想而腰斬,即時辣㷫農夫,之後主動提早 1個月解約。
留言列表